"ზარზმის აკადემიის" ახლად შექმნილ ააიპ–ს, სექსუალურ შევიწროებაში დადანაშაულებული არქიმანდრიტი ნიკოლოზ გეწაძე აღარ უხელმძღვანელებს. ამის შესახებ სამხრეთის კარიბჭე წერს. მათი ინფორმაციით, ნიკოლოზ გეწაძე კვლავ რჩება ადიგენში დაარსებული "ზარზმის" აკადემიის დირექტორად.

როგორც გამოცემა წერს, ნიკოლოზ გეწაძე ახალციხის მუნიციპალიტეტის მერიის მიერ დაფუძნებული ა(ა)იპ "სკოლისგარეშე სახელოვნებო — საგანმანათლებლო დაწესებულება - წმ. სერაპიონ ზარზმელის სახელობის აკადემია — ზარზმის" დირექტორად, გასული წლის დეკემბერში დაინიშნა. სექსუალურ შევიწროებაში მხილებული სასულიერო პირის, დირექტორად დანიშვნის შესახებ, სამხრეთის კარიბჭემ მიმდინარე წლის 6 თებერვალს დაწერა. 7 თებერვალს კი ახალციხის მუნიციპალიტეტის მერიამ, საჯარო რეესტრს დირექტორის ცვლილების მოთხოვნით მიმართა. თუმცა, ხარვეზის გამო, ჯერ ცვლილება რეგისტრირებული არ არის.

ბრძანების თანახმად ააიპ-ის ახალ დირექტორად ახალციხის მუნიციპალიტეტის მერის თანაშემწე შალვა ხატიძე დანიშნეს.

ახალციხის მუნიციპალიტეტის მერის ირაკლი ლაზარაშვილის განმარტებით, არქიმანდრიტმა ააიპ–ის ხელმძღვანელობაზე უარი თავად თქვა.