სამხრეთის კარიბჭის, ცნობით, ახალციხის მუნიციპალიტეტის მერიის მიერ დაფუძნებული ახალი ა(ა)იპ "სკოლისგარეშე სახელოვნებო“ (საგანმანათლებლო დაწესებულება) დირექტორად დაინიშნა არქიმანდრიტი ნიკოლოზ გეწაძე, რომელსაც საპატრიარქოს ზნეობის კომისიამ მღვდელმოქმედება მას შემდეგ შეუჩერა, რაც ქალებმა ის სექსუალურ შევიწროებაში ამხილეს.

სამხრეთის კარიბჭის ცნობით, არქიმანდრიტი, აღსარების ჩაბარების დროს, ახალგაზრდა ქალებს სექსუალურ ურთიერთობას სთავაზობდა

"ორი წლიდან ვიცნობ მამა ნიკოლოზს. მისი სულიერი შვილი ვარ 6–7 წლიდან, უფრო სწორად ვიყავი. ეს დაახლოებით წელიწადნახევრის წინ მოხდა, მამაოს ჩავაბარე აღსარება იმაზე, რასაც მძიმე ცოდვად აღვიქვამდი. მოვუყევი და ტირილი დავიწყე. [...] ფიზიკურადაც შემავიწროვა, მითხრა ფეხზე ავმდგარიყავი, როდესაც ავდექი, ტუჩებში მაკოცა და ხელით უკანალზე შემეხო", — ამბობს "სამხრეთის კარიბჭესთან" ახალგაზრდა ქალი.

დაზარალებულების განმარტებით, ბოლო შემთხვევა გასული წლის სექტემბერში მოხდა, ფაქტის გახმაურების შემდეგ, სასულიერო პირმა ქვეყანა დატოვა. ნიკოლოზ ბერიძემ სამხრეთის კარიბჭეს გადასცა აუდიო მასალა, სადაც მისი თქმით, სასულიერო პირი ჩადენილ ქმედებას აღიარებს.

რამდენად მიზანშეწონილია საგანმანათლებლო დაწესებულებაში არქიმანდრიტ ნიკოლოზ გეწაძის ყოფნა ხელმძღვანელ პოზიციაზე, — ამ კითხვით სამხრეთის კარიბჭე ახალციხის მუნიციპალიტეტის მერიას დაუკავშირდა, რაზეც პასუხი ვერ მიიღეს.

ცნობისთვის, საპატრიარქოს საზოგადოებასთან ურთიერთობის სამსახურის ხელმძღვანელი დეკანოზი ანდრია ჯაღმაიძე ადასტურებს, რომ არქიმანდრიტ ნიკოლოზ გეწაძეს მღვდელმოქმედება შეჩერებული აქვს.