მიუხედავად იმისა, რომ ზოოპარკს თბილისის ზღვის მიმდებარე ტერიტორიაზე 48 ჰექტარი გამოუყვეს, ზოოპარკს არ აქვს საკმარისი თანხა იქ გადასასვლელად.

თბილისის ზოოპარკი, 2016.

თბილისის ზოოპარკი, 2016.

ფოტო: გვანცა ნემსაძე / On.ge

როგორც ზოოპარკის საზოგადოებასთან ურთიერთობის მენეჯერი, მზია შარაშიძე On.ge-სთან საუბარში ყვება, ზოოპარკს სტიქიამდეც ჰქონდა სახელმწიფოს მიერ გადაცემული 48 ჰექტარი ფართობის ტერიტორია თბილისის ზღვაზე, რომელიც სტიქიის შემდეგ მერიამ ღობეებით შემოსაზღვრა. თუმცა, ამ ეტაპზე ერთადერთი, რაც იქ გერმანიის საერთაშორისო თანამშრომლობის საზოგადოების (GIZ) დაფინანსებით შენდება, დათვებისა და მგლების ვოლიერებია, რის შემდეგაც ირმებისა და ნიამორების ვოლიერებიც აშენდება.

თბილისის ზოოპარკი, 2016.

თბილისის ზოოპარკი, 2016.

ფოტო: გვანცა ნემსაძე / On.ge

შარაშიძის თქმით, იმისათვის, რომ ზოოპარკის მთლიანად გადატანა მოხერხდეს, დაახლოებით 40-45 მილიონი ლარია საჭირო. სწორედ ამიტომ, ზოოპარკი ახლაც ეძებს საერთაშორისო დონორებს, რათა მოიპოვოს დაფინანსება და თბილისის ზღვის ტერიტორიაზე ცხოველებისთვის საკმარისი ვოლიერები აშენდეს:

“რაც შეეხება დატბორვის ზონაში არსებულ ტერიტორიებს, რომლებიც წყალდიდობის შედეგად განადგურდა, იქ ცხოველების ვოლიერები აღარ აგვიშენებია. ყველა ცხოველი არის განთავსებული ზედა ტერიტორიაზე, სადაც წყალი არ ასულა, გარდა დათვებისა და მგლებისა, რადგან ფიზიკურად მათთვის სხვა ადგილი არ გვაქვს. ამიტომ დროებით ძველი ვოლიერები გავასუფთავეთ და იქ გადავიყვანეთ”.

თბილისის ზოოპარკის ის ტერიტორია, რომელიც 2015 წლის 13 ივნისის სტიქიის შედეგად დაიტბორა, 2016.

ფოტო: გვანცა ნემსაძე / On.ge

შარაშიძის განმარტებით, სტიქიის შემდეგ ზოოპარკის გზისპირა ტერიტორიაზე განადგურებული ვოლიერების სრული დემონტაჟი განახორციელეს, ადგილი მიწით მოასწორეს და სხვადასხვა მცენარე დარგეს, სამომავლოდ კი რეკრეაციული ზონის გაკეთება იგეგმება.

შარაშიძემ ასევე განაცხადა, რომ სტიქიის შემდეგ თბილისის მერია თავიდანვე ჩაერთო გაწმენდით სამუშაოებში, მოგვიანებით კი შენობა-ნაგებობების რეაბილიტაციაში. გარდა ამისა, მერიის დახმარებით აშენდა ჰიპოპოტამის ზამთრის ვოლიერიც:

“არსებული ტერიტორიის რეაბილიტაციაში 500 ათას ლარამდე დაიხარჯა, აქიდან 300 იყო ჩვენი, 200 იყო მერიის, რაც გულისხმობს იმას, რომ ინფრასტრუქტურის მოწყობაში დაგვეხმარა. ასევე დაიგო ახალი ასფალტის საფარიც”.

თბილისის ზოოპარკი 2015 წლის 13 ივნისის სტიქიიდან 1 წლის შემდეგ.

ფოტო: გვანცა ნემსაძე / On.ge

ჩვენს შეკითხვას, ხომ არ ჰქონია ზოოპარკს რომელიმე ბიზნესმენისგან ან კომპანიისგან რაიმე სახის შეთავაზება მის დასაფინანსებლად, შარაშიძემ გვიპასუხა, რომ ასეთი შეთავაზება ზოოპარკისთვის არავის გაუკეთებია და მისი თანამშრომლები თავად ცდილობენ ფინანსების მოძიებას სხვადასხვა დონორებისგან.

თბილისის ზოოპარკი, 2016.

თბილისის ზოოპარკი, 2016.

ფოტო: გვანცა ნემსაძე / On.ge

2015 წლის 13 ივნისის სტიქიამდე ზოოპარკში, თევზების ქვეწარმავლებისა და ფრინველების ჩათვლით, 1155 ცხოველი ცხოვრობდა, სტიქიის შედეგად კი 281 მათგანი დაიღუპა. დაღუპულ ცხოველებს შორის არიან: თეთრი ვეფხვი, უშურიის ვეფხვი, ზოლებიანი აფთარი, ხალებიანი აფთარი, მელა, დიდყურა მელა, სირაქლემები, ფრინველები, ძირკბილა, იაგუარი, ჰამადრილები, გიბონები, სიამანგები, მწვანე აფთრები, პინგვინები.

მიუხედავად დანაკარგისა, ზოოპარკს 2016 წლის გაზაფხულზე ახალი ბინადრები შეემატნენ. მათ შორის არიან: თუთიყუშები, ალპაკები, პინგვინები, ემუები, გნუები, კენგურუეbი, ცხვრები, ზოლებიანი მანგუსტები, სამხრეთ ამერიკული კოატი, აზავერი და აქლემი.

თბილისის ზოოპარკი, 2016.

თბილისის ზოოპარკი, 2016.

ფოტო: გვანცა ნემსაძე / On.ge

დღეს, 13 ივნისის სტიქიიდან ზუსტად 1 წლის შემდეგ თბილისის ზოოპარკმა ევროპის ზოოპარკებისგან საჩუქრად 45 ცხოველი მიიღო. 20 ჰამადრილი (10 ანტვერპენის ზოოპარკიდან, ბელგია, 5-5 Beekse Bergen-ისა და ამერსფორტის ზოოპარკებიდან, ჰოლანდია), 24 დეგუ და 1 ინდური მაჩვზღარბა (AAP, ჰოლანდია) თბილისში დღეს გამთენიისას ჩამოიყვანეს.