აჭარის უმაღლეს საბჭოში მთავრობის თავმჯდომარის პოსტზე სულხან თამაზაშვილის კანდიდატურას დღეს უნდა უყარონ კენჭი. სხდომა მედიისთვის დახურულია. ადგილზე იმყოფებიან ჟურნალისტები და სხდომაზე დასწრებას ითხოვენ. ამასთან ერთად ისინი სოლიდარობას უცხადებენ ბათუმელების და ნეტგაზეთის უკანონო პატიმრობაში მყოფ დირექტორს, მზია ამაღლობელს, რომლის სასამართლო სხდომაც დღეს, 13:00 საათზე უნდა გაიმართოს.

ადგილზე მყოფი ბათუმელების რედაქტორი ეთერ თურაძე ტვ პირველთან აცხადებს, რომ რეჟიმს ეშინია სიტყვის თავისუფლებს და ეს "შიში იწვევს თვითიზოლაციას, ეს არის რეჟიმის ქცევა".

"რეჟიმის ყველაზე დიდი მტერი არის სიტყვის თავისუფლება, ანგარიშვალდებულება საზოგადოების წინაშე და, შესაბამისად, შიში იწვევს თვითიზოლაციას, პოლიციის კორდონების ჩაყენებას, ეს არის რეჟიმის ქცევა, დისტანცირება და საზოგადოებისგან დისტანცირება და ამ შენობებში არიან გამაგრებულები და იქმნება იმიტაცია, რომ ასე იმართება სახელმწიფო. მოქალაქეებთან კონტაქტი სრულად აქვთ გაწყვეტილი და, შესაბამისად, მმართველობაც არის არაეფექტური და უფუნქციოდ დარჩნენ, გარდა იმისა, რომ ხელფასებს იღებენ ამ შენობაში, სხვა ამათი ფუნქცია და ანგარიშვალდებულება არაფერი არაა", — განაცხადა ეთერ თურაძემ.

ქართული ოცნების მთავრობის მეთაურმა, ირაკლი კობახიძემ და ოცნების არჩეულმა პრეზიდენტმა მიხეილ ყაველაშვილმა აჭარის ავტონომიური რესპუბლიკის მთავრობის თავმჯდომარის პოსტზე სულხან თამაზაშვილი 4 აპრილს, წარუდგინეს საზოგადოებას.
მანამდე აჭარის ავტონომიური რესპუბლიკის მთავრობის თავმჯდომარემ, თორნიკე რიჟვაძემ სოციალურ ქსელში დაწერა, რომ თანამდებობას ტოვებდა. რიჟვაძე თამაზაშვილის წარდგენას არ დასწრებია.