აზერბაიჯანის პრეზიდენტმა ილჰამ ალიევმა განაცხადა, რომ აზერბაიჯანის სახმელეთო საზღვრების 2020 წლის მარტიდან ჩაკეტვამ ქვეყანა "საგარეო რისკებისგან" დაიცვა.

აზერბაიჯანის სახმელეთო საზღვრები თავდაპირველად კოვიდ-19-ის პანდემიის გამო ჩაიკეტა. მას შემდეგ, სახმელეთო გზით, ქვეყანაში შესვლა და იქიდან გამოსვლა შეუძლებელია.

ალიევმა განცხადება 1 სექტემბერს, ვადამდელი არჩევნების შემდეგ, ახალი პარლამენტის გახსნის სესიაზე გააკეთა.

"აბსოლუტურად დარწმუნებული ვარ, რომ გასულ რამდენიმე წელიწადში სახმელეთო საზღვრების დაკეტვამ დიდი კატასტროფებისგან გვიხსნა. დღესაც კი, დაკეტილი საზღვრების პირობებში, ხიფათი იქმნება და პრევენცია ხდება. აზერბაიჯანში შიდა რისკები არ არსებობს, საზღვრების დაცვა კი გარე რისკებისგანაც დაგვიცავს. უსაფრთხოება და მშვიდობა მრავალი წელია უზრუნველყოფილია", — განაცხადა ალიევმა.

რა წარმოადგენს საფრთხეს აზერბაიჯანისთვის?

აზერბაიჯანის მხრიდან სახმელეთო საზღვრების ჩაკეტვა კრიტიკის საგანია როგორც ქვეყნის შიგნით, ისე საერთაშორისო საზოგადოებაში.

ალიევის განცხადებამ კითხვები გააჩინა იმასთან დაკავშირებით, თუ რომელ პრობლემებს გულისხმობდა ალიევი და რამ გამოიწვია საზღვრების დაკეტვა.

ჯამილ ჰასანლიმ, ოპოზიციური კოალიცია დემოკრატიული ძალების ეროვნული საბჭოს თავმჯდომარემ, OC-Media-ს განუცხადა, რომ სახმელეთო საზღვრის დაკეტვა აზერბაიჯანელი მოქალაქეების კონსტიტუციური უფლებების დარღვევაა. ასევე, მან დაამატა, რომ საზღვრების ჩაკეტვას სერიოზული ეკონომიკური გავლენა აქვს.

"ეს მეორე შემთხვევაა, როცა ილჰამ ალიევმა განაცხადა, რომ საზღვარი უსაფრთხოების მიზნითაა ჩაკეტილი, თუმცა ის არ ხსნის ამ მიზეზებს და იმას, თუ საიდან მოდის საფრთხე. იქნებ, ეს აუცილებლობაა და მოსახლეობამ ამ საფრთხის შესახებ უნდა იცოდეს", — განაცხადა ჰასანლიმ.

ჰასანლიმ მაგალითად რუსეთის უკრაინაში შეჭრის შემდგომი რუსეთ-უკრაინის საზღვარი მოიყვანა.

"რატომ არ დაკეტა თავისი საზღვრები რუსეთმა, ქვეყანამ, რომელიც უკრაინაში შეიჭრა? ან, რატომ არ დაკეტა საზღვარი უკრაინამ? ან რატომ არ კეტავს ირანი, რომელიც სანქციების ქვეშ ცხოვრობს? საქართველო და სომხეთი? საფრთხე მხოლოდ აზერბაიჯანისთვის არსებობს და ალიევმა ეს საფრთხე უნდა დაასახელოს", — განაცხადა ჯამილ ჰასანლიმ და დაამატა, რომ საზღვრის ჩაკეტვის მთავარი მიზეზი ჩაკეტილი ქვეყნის შექმნაა.

ისტორიის პროფესორ ალტაი გოიუშკოვის აზრით, საზღვრების გახსნაზე ალიევი უარს იმიტომ ამბობს, რომ ძალაუფლების დაკარგვის ეშინია.

"მაგალითად, ეს შიში მიზეზია იმისა, რომ ის უდანაშაულო ადამიანებს აპატიმრებს. მას სჯერა, რომ დაკავებულები მისი ძალაუფლებისათვის საფრთხეს წარმოადგენენ. საზღვრის საკითხთან დაკავშირებით, მას სჯერა, რომ ხალხის თავისუფლება და საზღვრის თავისუფალი კვეთა მისი ძალაუფლებისათვის საშიშია", — დაწერა გოიუშკოვმა Facebook-ზე.

საქართველოს საზღვართან ახლოს, გაზახის რეგიონში მცხოვრებმა რაფიგ მურადოვმა OC-Media-ს განუცხადა, რომ თავი საფრთხეში არასდროს უგრძნია.

"საქართველოში ბავშვობიდან დავდიოდი და არასდროს შემხვედრია ადამიანი, რომელიც შესაძლოა მე, ჩემს სახლს ან ჩემს რეგიონს თავს დასხმოდა. საზღვართან თავი საფრთხეში არასდროს მიგრძვნია", — განაცხადა რაფიგ მურადოვმა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.