თანაინვესტირების ფონდის ყოფილმა ხელმძღვანელმა ტვ პირველისთვის მიცემულ ინტერვიუში ისაუბრა პერიოდზე, როცა ბიძინა ივანიშვილის ნდობით აღჭურვილი პირი იყო და მიზეზებზე, რის გამოც ქართული ოცნების საპატიო თავმჯდომარეს დაუპირისპირდა.

ბაჩიაშვილის აზრით, "ივანიშვილის გარემოცვაში ძალიან ცუდი მაგალითი იყო", რადგან საკუთარი აზრი გააჩნდა და მას ბრმად არ ემორჩილებოდა. ასევე, მისი თქმით, ურთიერთობის გაუარესების მიზეზი 2022 წელს, რუსეთის უკრაინაში შეჭრის შემდეგ, ამ უკანასკნელის ღია მხარდაჭერა იყო, რაც ბიძინა ივანიშვილს არ მოსწონდა.

"მე უბრალოდ ივანიშვილის გარემოცვაში ვიყავი ძალიან ცუდი მაგალითი ადამიანის, რომელსაც აქვს თავისი აზრი. მე ვიყავი ერთადერთი ივანიშვილის გარემოცვაში, სხვა არავინ ყოფილა, ვინც უკრაინის ომის დაწყებისას აქტიურად ჩემი სოციალური მედიის მეშვებით დავიწყე რუსეთის აგრესიის დაგმობა და უკრაინის მხარდაჭერა", — განაცხადა ინტერვიუში თანაინვესტირების ფონდის ყოფილმა ხელმძღვანელმა.

გიორგი ბაჩიაშვილმა აღნიშნა, რომ Credit Suisse-თან ფინანსური პრობლემის გადაწყვეტას თავად ხელმძღვანელობდა, თუმცა, მიუხედავად ამისა, არ ეთანხმებოდა ბიძინა ივანიშვილს, რომ მას გარე ძალები ებძროდნენ, რადგან ეს ფიზიკურად შეუძლებელი იყო.

"ივანიშვილის ანაგარიშების დასუფთავება და ასე ვთქვათ, კრიმინალური საქმიანობის ჩადენა, დაიწყო 2006-2007 წლებში. ანუ, პრაქტიკაში გამორიცხულია, რომ მაშინ ივანიშვილს ჰყოლოდა ვინმე გლობალური ომის პარტიისნაირი მტერი, რომელიც ასე გაუსწორდებოდა ივანიშვილს", — აღნიშნა გიორგი ბაჩიაშვილმა.

ბოლოს, მან ისაუბრა ე.წ "ოფშორების კანონზეც" და აღნიშნა, რომ ამ კანონით, ივანიშვილმა სახელმწიფოს, სულ მცირე, "400 მილიონი დოლარი მოჰპარა".

"მარტივ რამეს გეტყვით - ბიძინა ივანიშვილმა "ოფშორების კანონი" ისეთ დროს შემოიტანა, როდესაც "რუსული კანონის" გარშემო აურზაური იყო ანუ ის "გააძვრინა". რეალურად ეს რისთვის იყო გაკეთებული — ივანიშვილმა 2022 წელს თვითონ თქვა ჩემი ნახატების კოლექციას არ მატანდნენო. გამოატანეს ნახატების კოლექცია და მან შემოიტანა საქართველოში, დაახლოებით, 1 მილიარდი დოლარის ღირებულების კოლექცია. რა თქმა უნდა, მას არ უნდოდა არც დღგ-ის, არც ქონების და არც მოგების გადასახადის გადახდა ამ ნივთებზე", — განაცხადა გიორგი ბაჩიაშვილმა.