შინაგან საქმეთა მინისტრი ვახტანგ გომელაური ამბობს, რომ შეერთებული შტატების მიერ სანქცირებული უწყების თანამშრომლები — ზვიად ხარაზიშვილი (ხარება) და მისი მოადგილე მილერი ლაგაზაური ჩვეულებრივ იღებენ ხელფასს.

ტელეკომპანია პირველის ჟურნალისტმა ვახტანგ გომელაურს ჰკითხა, როგორ იღებენ ხელფასს, როცა მათ ფინანსური სანქციები აქვთ დაწესებული.

"ძალიან კარგად ვუხდით ხელფასს. ჩვეულებრივად იღებენ ხელფასს. ბანკში მარტო ვიზა ბარათებია, სხვა ბარათები არ არსებობს? რა მნიშვნელობა აქვს [რომელი ბანკი ემსახურება]? არ ვიცი, მე არ ვარ ვალდებული, ყველა თანამშრომელზე ვიცოდე, რომელ ბანკში იღებენ. ეგ არის ინდივიდუალური, თუ მინდა, ავიღებ ერთ ბანკში, თუ მინდა — მეორეში, თუ მინდა — მესამეში. არ ვიცი რომელ ბანკში იღებენ", — თქვა გომელაურმა.

ჟურნალისტმა მინისტრს ისიც ჰკითხა, ელოდა თუ არა თავად სანქცირებას შეერთებული შტატების მიერ. გომელაურმა უპასუხა, რომ ის ყველაფერს საქართველოსთვის აკეთებს და ამის გამო თუ დაასანქცირებენ, მას პრობლემა არ აქვს.

"მე პრობლემა არ მაქვს თუ დამასანქცირებენ, მე ჩემი სამშობლოს გულიზე ვაკეთებ ყველაფერს, ჩემი ქვეყნის გულისთვის. იმედი მაქვს, შეცდომაა, გაირკვევა და მოიხსნება ეს ყველაფერი". — თქვა ვახტანგ გომელაურმა.

შეგახსენებთ, შინაგან საქმეთა სამინისტროს მაღალჩინოსნები ზვიად ხარაზიშვილი (ხარება) და მისი მოადგილე მილერი ლაგაზაური 2024 წლის 16 სექტემბერს აშშ-ის სახაზინო დეპარტამენტმა დაასანქცირა "ადამიანის უფლებების სერიოზული დარღვევების გამო". მათთან ერთად სანქციების სიაში მოხვდნენ ულტრამემარჯვენე, პრორუსული პარტიის ალტ ინფოს ლიდერები ზურა მახარაძე და კონსტანტინე მორგოშია.

საქართველოს ეროვნულმა ბანკმა სანქციების გამოცხადებიდან მალევე გაავრცელა განცხადება, რომ ისინი იმავე პრინციპით იხელმძღვანელებდნენ სანქციების აღსრულების ნაწილში, როგორც ეს აგრეთვე შეერთებული შტატების მიერ სანქცირებული ყოფილი პროკურორის ოთარ ფარცხალაძის შემთხვევაში გააკეთეს. ეს "შემთხვევა" კი "საგამონაკლისო ბრძანების" გავრცელებას გულისხმობს:

ბრძანების თანახმად, საქართველოს მოქალაქეზე სანქციათა რეჟიმი ვრცელდება იმ შემთხვევაში თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი.

ინფორმაციისთვის, საბანკო სამართლის სპეციალისტები "საგამონაკლისო წესის" ამოქმედებაში უდიდეს საფრთხეს ხედავენ, რადგან მსგავსი მიდგომა ეჭვქვეშ აყენებს საქართველოს ფინანსური სექტორის ერთგულებას საერთაშორისო სანქციათა რეჟიმის მიმართ, რაც აღნიშნულ სექტორს თავად უქმნის სანქცირების რისკს.