ამერიკის შეერთებულმა შტატებმა და ევროკავშირმა სავაჭრო შეთანხმებას მიაღწიეს. ინფორმაციას ამის შესახებ BBC ავრცელებს.

გადამწყვეტი მოლაპარაკებები შოტლანდიაში აშშ-ის პრეზიდენტ დონალდ ტრამპსა და ევროკომისიის პრეზიდენტ ურსულა ფონ დერ ლაიენს შორის გაიმართა. აშშ-ის მხრიდან ევროკავშირის საქონელზე 15%-იანი ტარიფის დაწესება გადაწყდა, რაც ორჯერ ნაკლებია იმ 30%-იან იმპორტის გადასახადთან შედარებით, რომლის დაწესებასაც ტრამპი მოითხოვდა. სანაცვლოდ, ევროკავშირი ამერიკული პროდუქციისთვის,გარკვეულ კატეგორიებზე, ნულოვანი ტარიფით ბაზრებს გახსნის.

მოლაპარაკებები შოტლანდიაში, დახურულ ფორმატში გაიმართა.

შეთანხმებით გარკვეულ საქონელზე გამონაკლისებია გათვალისწინებული, მათ შორის ავიაციის ნაწილებზე, კონკრეტულ ქიმიკატებსა და აგრარული პროდუქტებზე. ამავდროულად, ტრამპის მიერ დაწესებული 50%-იანი გლობალური ტარიფი ფოლადსა და ალუმინზე ძალაში რჩება.

ტრამპმა აღნიშნა, რომ მომდევნო სამ წელიწადში ევროკავშირი აშშ-ში 600 მილიარდი დოლარის ინვესტიციას მოამზადებს, მათ შორის სამხედრო ტექნიკის მიმართულებით, და 750 მილიარდ დოლარს ამერიკულ ენერგეტიკაზე დახარჯავს (თხევადი ბუნებრივი აირი, ნავთობი, ბირთვული საწვავი). ფონ დერ ლაიენის თქმით, ეს ევროპას რუსულ ენერგიაზე დამოკიდებულების შემცირებაში დაეხმარება.

საფრანგეთის ევროპის საქმეთა მინისტრმა ბენჟამენ ჰადადმა აღნიშნა, რომ შეთანხმებას გარკვეული დადებითი მხარეები აქვს, მათ შორის საფრანგეთისთვის მნიშვნელოვანი ინდუსტრიების (მაგალითად, სპირტიანი სასმელების) გამონაკლისები, მაგრამ შეთანხმება მაინც "დაუაბალანსებელია".

შარშან აშშ-სა და ევროკავშირს შორის საქონლით ვაჭრობის მოცულობა დაახლოებით 976 მილიარდი დოლარი იყო, საიდანაც აშშ-მა ევროკავშირიდან 606 მილიარდი დოლარის პროდუქცია შეიძინა, ხოლო ექსპორტზე 370 მილიარდი გაიტანა . ტრამპს მიაჩნია, რომ ეს სავაჭრო დეფიციტი ნიშნავს, რომ აშშ "წაგებული მხარეა".

ტარიფების სრული ამოქმედების შემთხვევაში, საფრთხე ესპანურ ფარმაცევტულ კომპანიებს, იტალიურ ტყავის ნაწარმს, გერმანულ ელექტრონიკასა და ფრანგულ ყველს ემუქრებოდა. ევროკავშირი აშშ-ის პროდუქციაზე საპასუხო ტარიფებს დაწესებას გეგმავდა — მათ შორის ავტომობილების ნაწილებზე, Boeing-ის თვითმფრინავებსა და საქონლის ხორცზე.