მზეზე წამოგორებული, ფანჯრების რაფაზე მოკუნტული ან ჩვენს კალთაზე დაკოსებული ფისოების გარეშე ცხოვრების წარმოდგენა, ალბათ, ყველასთვის რთულია. ეს გრაციოზული არსებები ადამიანთა ცხოვრებას ისე იდეალურად ერგებიან, რთულია, წარმოვიდგინოთ, როგორები იყვნენ მოშინაურებამდე. ადამიანმა ცხოველთა უმეტესობა აშკარა მიზეზების გამო მოიშინაურა — ძაღლები სანადიროდ, ცხენები გადასაადგილებლად, ძროხები კი რძის ნაწარმისთვის — თუმცა კატებმა, როგორც ჩანს, თავად მოიშინაურეს თავები, ამის მიზეზმა კი შეიძლება, გაგაკვირვოთ.

საჭიროებით გამოწვეული პარტნიორობა

ეს ისტორია დაახლოებით 10 000 წლის წინ დაიწყო, შუამდინარეთში, როდესაც ადამიანებმა სასოფლო-სამეურნეო საზოგადოებებად დასახლება დაიწყეს. ადრეული ფერმერები ზედმეტი რაოდენობის მარცვლეულს აწარმოებდნენ, რაც მღრღნელებს იზიდავდა. იქ კი, სადაც მღრღნელები ჩნდებიან, კატებსაც მალე უნდა ველოდოთ. დღევანდელი შინაური კატების წინაპრებმა, რომელთაც ლათინურად Felis silvestris lybica ეწოდებათ, ჩვენ კი ველურ კატებად მოვიხსენიებთ, გემრიელი შესაძლებლობა მალევე დაინახეს და ფერმერების დასახლებების ხშირი სტუმრები გახდნენ.

ადამიანები მალევე მიხვდნენ, რომ ამ მოქნილ ღამის მონადირეებს მავნებელთა განადგურებაში უდიდესი წვლილის შეტანა შეეძლოთ. დროთა განმავლობაში, კატებსა და ადამიანებს შორის ორმხრივი “შეთანხმება” შედგა: ადამიანები კატებს სტაბილურ გარემოს სთავაზობდნენ (სადაც უხვად იქნებოდნენ თაგვები და ვირთხები), სანაცვლოდ კი კატები კი მათ განეიტრალებას თავიანთ თავებზე იღებდნენ.

ეს ყველასთვის ნაცნობი ისტორია მედალიონის მხოლოდ ერთი მხარეა, რომლითაც ვიგებთ, რაში იყენებდნენ ადამიანები კატების შესაძლებლობებს, თუმცა, იმის გასაგებად, თუ როგორ მოინადირეს ჩვენი გულები ამ ფუმფულა არსებებმა, კიდევ ერთი ამბავი უნდა გიამბოთ.

ემოციური კომპანიონობა

კატები სუპერ-დუპერ-დამოუკიდებელი ცხოველები არიან, ამიტომ, ძაღლებისა და სხვა შინაური ცხოველებისგან განსხვავებით, ადამიანებთან მათი ურთიერთობა არასდროს იყო მორჩილებითა და მსახურებით განპირობებული. როგორ გადაიზარდა ეს დამოკიდებულება ასეთ ღრმა ემოციურ კავშირში, რომელიც ახლა კატებთან გვაკავშირებს?

სოფლის მეურნეობის განვითარებასთან ერთად, ადამიანები სულ უფრო იკიდებდნენ ფეხს იმ ტერიტორიაზე, სადაც მოსავალი მოჰყავდათ. ნელ-ნელა ქრებოდა “პრაქტიკულ” ცხოველთა საჭიროებაც — ადამიანს აღარ სჭირდებოდა გამუდმებული ნადირობა ან მომთაბარეობა და მწყემსვა. ის, რაც ახლა ადამიანს ყველაზე მეტად სჭირდებოდა, ემოციური სიახლოვე იყო.

ჩვენ სოციალური არსებები ვართ, ქალაქური ცხოვრების აურზაურში კატის მსგავსი მშვიდი თანამგზავრი კი კომფორტის უნიკალურ ფორმას გვთავაზობს. კატები, თავიანთი იდუმალი ბუნებით, ნაზი კრუტუნით და სითბოსა და სიყვარულის (მხოლოდ თავიანთი პირობებით!) გაცემის ნიჭით ადამიანებს იმაზე უფრო ღრმა პრობლემებს უგვარებდნენ, ვიდრე მავნებელთა განადგურებაა.

მათი მისტიკური ხასიათი ამ ემოციურ კავშირს კიდევ უფრო აღრმავებდა. კატების გულის მოგება რთულია, მათი მავნებლური ხასიათი და “ვაზების გადმოგდებისკენ” მიდრეკილი ქცევები კი მათ ჩვენს სახლებში ცხოვრებას კომიკურ ეფექტსაც სძენს. კატები თავიანთ კომპანიონ ადამიანებს დაკვირვებით ირჩევენ, ამიტომ ამ წუნია არსებების ნდობისა და სიყვარულის დამსახურება განსაკუთრებულ სიხარულს გვანიჭებს.

ამ ყველაფრის სანაცვლოდ, ადამიანებმა კატებს ის შესთავაზეს, რასაც თვითონ ვერ შექმნიდნენ — სამუდამო თავშესაფარი, საჭმელი და დიდი მტაცებლებისგან დაცვა.

იდეალური მეგობრობა

ბევრ სხვადასხვა ასპექტში კატებმაც ზუსტად ისე მოგვიშინაურეს, როგორც ჩვენ — ისინი. კატები იდეალურად მოერგნენ ჩვენს სახლებს, ცხოვრების სტილს, თუმცა მხოლოდ თავიანთი შეუვალი, მკაცრი პირობებით. კატების როლი უბრალო მღრღნელებზე მონადირეებისგან ჩვენს უძვირფასეს მეგობრებამდე გაიზარდა და ახლა მათ გარეშე ცხოვრება, უბრალოდ, წარმოუდგენელია.

შინაური ცხოველების მეგობრებს, ძაღლებისა და კატებისთვის საუკეთესო კვებისა და მოვლის შეთავაზებისთვის Petverse ეხმარება. Petverse ოთხფეხა მეგობრების ჰიპერპრემიუმ კლასის იტალიური საკვები ბრენდის, Farmina-სა და აქსესუარებისა და მოვლის საშუალებების ბელგიური ბრენდის, M-Pets-ის, დისტრიბუტორია საქართველოში. Farmina-ს ნუტრიციოლოგთან უფასო კონსულტაციით შეგიძლია შეურჩიო შენს ძაღლსა თუ კატას შესაბამისი საკვები. დაურეკე Farmina-ს ნუტრიციოლოგს ნომერზე: 032 211 20 12 ან ეწვიე Petverse-ის შოურუმს, მის: მერაბ კოსტავას #71.