ბიძინა ივანიშვილის მოსალოდნელი დასანქცირების ფონზე, ხვალ პრემიერ-მინისტრი, ირაკლი კობახიძე, აშშ-ში გაეროს გენერალურ ასამბლეაზე დასასწრებად გაემგზავრება.

ირაკლი კობახიძე გაეროს გენერალურ ასამბლეაზე სიტყვით გამოსვლას გეგმავს. ჯერჯერობით უცნობია, რა ორმხრივი შეხვედრები ექნება პრემიერ-მინისტრს გენერალური ასამბლეაში მონაწილეობის გარდა.

მთავრობის ადმინისტრაციის ცნობით, ორმხრივ შეხვედრებთან და გეგმებთან დაკავშირებული დეტალური ინფორმაცია ოფიციალურად ხვალ გასაჯაროვდება.

შეგახსენებთ, რომ ირაკლი კობახიძე აშშ-ს ელჩს, რობინ დანიგანს 17 სექტემბერს, ამერიკული სანქციების დაწესების შემდეგ შეხვდა.

მთავრობის ადმინისტრაციის მიერ გავრცელებულ ინფორმაციაში ეწერა, რომ შეშფოთება გამოთქვა აშშ-ის სახელმწიფო დეპარტამენტის გუშინდელი გადაწყვეტილების გამო, რომელიც საქართველოს მოქალაქეების, მათ შორის პოლიციელების მიმართ სანქციებისა და სავიზო შეზღუდვების დაწესებას ითვალისწინებს.

აღინიშნა, რომ ამ გადაწყვეტილებით ამერიკული მხარე კრიტიკულ ზღვარს მიუახლოვდა, რამაც, კიდევ ერთი მსგავსი გადაწყვეტილების მიღების შემთხვევაში, შესაძლოა, ქართულ-ამერიკული ურთიერთობების მიმართ საქართველოს პოზიციის თვისებრივი გადახედვა განაპირობოს.

20 სექტემბერს კი ამერიკის ხმამ გაავრცელა ინფორმაცია იმის შესახებ, რომ აშშ-მ ბიძინა ივანიშვილის წინააღმდეგ სანქციების პაკეტი შეიმუშავა.

"ჩვენ გვაქვს ინფორმაცია, რომ მან [ბიძინა ივანიშვილმა] გადადგა ნაბიჯები, რათა განევითარებინა ურთიერთობები რუს ოლიგარქებთან, გადადგა ნაბიჯები, რათა რუსეთისთვის მიეცა უკეთესი წვდომა საქართველოს ბაზრისთვის. ფაქტობრივად, მან გარკვეული ქმედებები რუსეთის სადაზვერვო სამსახურის მითითებით გაატარა", – წერს ამერიკის ხმა.