16 სექტემბერს, შეერთებული შტატების ხაზინამ სანქციები დაუწესა საქართველოს ძალოვანი სამსახურის მაღალჩინოსნებს ზვიად ხარაზიშვილს (ხარება) და მილერი ლაგაზაურს.

სანქციები ასევე დაუწესდათ პრორუსული პარტიის ალტ-ინფოს ლიდერებს კონსტანტინე მორგოშიასა და ზურა მახარაძეს.

სანქციები ფინანსური ხასიათისაა, შესაბამისად მისი აღსრულება საქართველოს ფინანსურ სექტორსაც მოუწევს.

გასული წლის 14 სექტემბერს, აშშ-მა სანქციები საქართველოს ყოფილ მთავარ პროკურორს ოთარ ფარცხალაძესაც დაუწესა. ქართული ოცნების მაშინდელმა თავმჯდომარემ, ირაკლი კობახიძემ შეერთებული შტატების მიერ დაწესებულ სანქციას დაუსაბუთებელი უწოდა და აღნიშნა, რომ საქართველოს მოქალაქე განსაკუთრებულად არის დაცული ქვეყნის კონსტიტუციით და არ შეიძლება დაირღვეს მისი ძირითადი უფლებები, მათ შორის უდანაშაულობის პრეზუმფცია.

ირაკლი კობახიძის განცხადებიდან მალევე ეროვნული ბანკის პრეზიდენტის მოვალეობის შემსრულებელმა ნათია თურნავამ საგამონაკლისო ბრძანება გამოსცა და ქართული ბანკებისთვის სანქციათა რეჟიმების შესრულების წესი შეცვალა;

ბრძანების თანახმად, საქართველოს მოქალაქეზე სანქციათა რეჟიმი ვრცელდება იმ შემთხვევაში თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი.

აღნიშნული გადაწყვეტილების გამო, პროტესტის ნიშნად, ეროვნული ბანკი ოთხიდან სამმა ვიცე-პრეზიდენტმა, პაპუნა ლეჟავამ, არჩილ მესტვირიშვილმა და ნიკოლოზ გაგუამ დატოვეს. თანამდებობა დატოვა ასევე ეროვნული ბანკის პრეზიდენტის მრჩეველმა, გიორგი ბაქრაძემ.

“ვერ ვიქნები იმ გადაწყვეტილების მონაწილე, რომელზეც არც გავლენა მაქვს და არც ვეთანხმები”, – თქვა, ეროვნულ ბანკში მიმდინარე პროცესებთან დაკავშირებით არჩილ მესტვირიშვილმა

დღეს, 18 სექტემბერს ეროვნულმა ბანკმა გაავრცელა ცნობა, რომ ის იცავს და დაიცავს საერთაშორისო სანქციებს, მაგრამ საქართველოს მოქალაქესთან დაკავშირებით ეროვნული ბანკი იხელმძღვანელებს საქართველოს ეროვნული ბანკის პრეზიდენტის 2023 წლის 4 აგვისტოს №208/04 ბრძანების მიხედვით.

"როგორც მოგეხსენებათ, საქართველოს ეროვნული ბანკის მითითებით, საქართველოში მოქმედი საფინანსო სექტორის წარმომადგენლები იცავენ საერთაშორისო სანქციათა მოთხოვნებს. ამასთან, "საქართველოს ეროვნული ბანკის ზედამხედველობას დაქვემდებარებული ანგარიშვალდებული პირების მიერ სანქციათა რეჟიმების შესრულების წესის დამტკიცების თაობაზე" საქართველოს ეროვნული ბანკის პრეზიდენტის 2023 წლის 4 აგვისტოს №208/04 ბრძანებით განისაზღვრა საერთაშორისო საფინანსო სანქციების შესრულებასთან დაკავშირებული კონკრეტული საკითხები.

კერძოდ, აღნიშნული ბრძანების თანახმად, საქართველოს მოქალაქეზე სანქციათა რეჟიმი ვრცელდება იმ შემთხვევაში, თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი. შესაბამისად, აღსასრულებელ სანქციებთან დაკავშირებული ზოგადი პრინციპი მითითებულია ზემოაღნიშნულ ბრძანებაში.

საქართველოს ეროვნული ბანკი სისტემატურ ზედამხედველობას უწევს საფინანსო სექტორის ცალკეული მონაწილის მხრიდან როგორც საერთაშორისო სანქციების აღსრულების, ისე საკუთარი რეგულაციების და ეროვნული კანონმდებლობის შესრულების პროცესს.

აქვე ხაზგასმით აღვნიშნავთ, რომ ქართული საფინანსო სექტორი მოქმედებს სანქციათა რეჟიმებით გათვალისწინებული მოთხოვნების სრული დაცვით. საქართველო ამ დრომდე არასდროს ყოფილა და არც მომავალში იქცევა სანქციების თავის არიდების ადგილად". — წერია ეროვნული ბანკის განცხადებაში.

საბანკო სამართლის სპეციალისტები "საგამონაკლისო წესის" ამოქმედებაში უდიდეს საფრთხეს ხედავენ, რადგან მსგავსი მიდგომა ეჭვქვეშ აყენებს საქართველოს ფინანსური სექტორის ერთგულებას საერთაშორისო სანქციათა რეჟიმის მიმართ, რაც აღნიშნულ სექტორს თავად უქმნის დასანქცირების რისკს.