დღეს, 4 აგვისტოს "ინდიგოს" ინტერაქტიული, მულტიმედიური პროექტის "საპატრიარქოს კაპიტალის" პრეზენტაცია გაიმართა. პროექტის მიზანი იყო იმ დოკუმენტების შესწავლა, რომლებიც შეიცავდა ინფორმაციას საქართველოს საპატრიარქოსა და სინოდის წევრების ქონების, ბიზნესისა და არაკომერციული ორგანიზაციების შესახებ.

ფონდ ღია საზოგადოების მხარდაჭერით, შეისწავლეს დაახლოებით ხუთი ათასი დოკუმენტი. უძრავი და მოძრავი ქონებას, ბიზნესსა და არასამთავრობო ორგანიზაციებს დოკუმენტების შესწავლას დაახლოებით ერთი წელი დასჭირდა.

ნინო ჯაფიაშვილის განცხადებით, ყველაზე მნიშვნელოვანი ბუნდოვანების გაფანტვა იყო:

"ეს პროექტი სწავლობს მართლმადიდებელი ეკლესიის რეგისტრირებული ქონების მასშტაბებს. ეს არის პირველი შემთხვევა, როდესაც შესაძლებელი გახდა საჯარო დოკუმენტების ერთად თავმოყრა. ამ პროექტის მთავარი ამოცანა იყო, ბიუჯეტის მონიტორინგი, რადგან ჩვენ ვეძებდით და ჩვენი ამოცანა იყო იმის პოვნა თუ სად მიდის დაფინანსება ბიუჯეტიდან".

კვლევის ავტორების განცხადებით, პროექტის ფარგლებში დათვალეს, რა მასშტაბის უძრავ ქონებასა და მიწას ფლობს ეკლესია. მათივე თქმით, გამოიკვეთა, რომ ეს რიცხვი გაცილებით მეტია ვიდრე მანამდე წარმოედგინათ.

პროექტი შედგება რამდენიმე თავისგან:

• კონსტიტუციური შეთანხმების ანალიზი, რისი მიზანიც იყო გამოეკვეთათ გარკვეული ტიპის პრივილეგიები, რომლებიც გააჩნია რელიგიურ ორგანიზაციას. ამ თავის ფარგლებში დათვალეს, რა მასშტაბის უძრავ ქონებასა და მიწას ფლობს ეკლესია;
• საბიუჯეტო სახსრები. ამ თავში მნიშვნელოვანი იყო, თუ რამდენი ირიცხება ამ ორგანიზაციის ანგარიშზე ბიუჯეტიდან;
• პროცესის სამართლებრივი მხარე, როგორ მიმდინარეობს ეკლესიისათვის სახელმწიფოს მიერ აღიარებული, მიყენებული ზიანის კომპენსაციის და სამართლინობის აღდგენის პროცესი. რა სამართლებრივ საფუძვლებს ეყრდნობა ეს საკითხი;
• უმაღლესი სასულიერო პირების უძრავი და მოძრავი ქონების შესახებ ინფორმაცია. რა ბიზნესებს ფლობენ სასულიერო პირები და რომელ არასამთავრობო ორგანიზაციებს მართავენ;
• საჩუქრები - რომელი მთავრობა რას ჩუქნის საქართველოს საპატრიარქოს;
• განათლების ალტერნატიული სისტემა - ის კომერციული და არაკომერციული ორგანიზაციები, რომელსაც მართავს საქართველოს საპატრიარქო. ასევე, თუ რაში დებს საპატრიარქო ყველაზე მეტ რესურს;

ნინო ჯაფიაშვილმა აღნიშნა ისიც, რომ ყველა დოკუმენტი საჯარო და ხელმისაწვდომია. გარდა ამისა, ყველა ადამიანს აქვს საშუალება, მოიძიოს და მიამატოს ახალი ინფორმაციები და მაგალითები:

"მთელი პროცესი ქონების გადაცემის, იქნება ეს მატერიალური, არამატერიალური, უძრავი თუ მოძრავი, დაფუძნებულია დიდწილად სწორედ ამ ფუნდამენტურ დოკუმენტზე, რომელიც ხან კარგად არეგულირებს ხან კი, ბუნდოვანებას ტოვებს ქონების გადაცემის პროცესში ამიტომ ჩავთვალეთ საჭიროდ, რომ ეს უნდა ყოფილიყო პროექტის ნაწილი".

პროექტის ავტორები იყვნენ: მკვლევარი-ჟურნალისტი ნინო ბაქრაძე, რედაქტორი და ერთ-ერთი ავტორი ნინო ლომაძე, დიზაინერი გიორგი წოწკოლაური და ვებ დეველოპერი დათო მაკარიძე.