ადამიანები კომპანიების მიერ გამოშვებულ აქციებს მოგების მიღების მიზნით ყიდულობენ. როგორც ცნობილია, აქციებით ვაჭრობისას სარგებლის მიღების ორი მთავარი გზა არსებობს: როდესაც ფასიან ქაღალდებს იმაზე ძვირად ყიდი, ვიდრე იყიდე და როდესაც აქციების ფლობის სანაცვლოდ კომპანიები დივიდენდებს გიხდიან.

ალბათ გსმენია იმის შესახებაც, რომ ათი წლის წინ Amazon-ში გაკეთებული 10,000 დოლარიანი ინვესტიცია დღეს 100,000 დოლარს აჭარბებს. იმის მიუხედავად, რომ მსგავსი არაერთი მაგალითი არსებობს, ისიც უნდა გვახსოვდეს, რომ მოკლევადიან პერიოდში ბაზარი ყოველთვის ზრდის ტენდენციით არ ხასიათდება — ზოგჯერ კომპანიების აქციების ფასი სტაგნაციაშია, ან იკლებს.

არსებობს შემთხვევები, როდესაც ბაზარზე დაღმასვლა საერთო ეკონომიკური მდგომარეობით არის გამოწვეული, თუმცა უმეტესწილად ის ცალკეული ფაქტორების ერთობლიობას უკავშირდება. ბოლო მნიშვნელოვანი კრიზისი როგორც საფონდო ბირჟისთვის, ისე გლობალური ეკონომიკისთვის პანდემიის დროს დადგა. 2020 წელს კომპანიების უმრავლესობის აქციების ღირებულება დაეცა, თუმცა გარკვეული პერიოდის შემდეგ ბაზარი აღდგა და კომპანიების უმრავლესობისთვიsფასიანი ქაღალდების ზრდაც გაგრძელდა.

აგვისტოს პირველ კვირაში აშშ-ს ყველა ძირითადი ინდექსის მაჩვენებელი მნიშვნელოვნად შემცირდა. მათ შორის იყო S&P 500-ის ინდექსი, რომელიც 1-5 აგვისტოს პერიოდში 6%-ით დაეცა. ამჟამად ბაზარი აღმავლობის პერიოდშია — ბოლო მონაცემებით, S&P 500-ის ინდექსი წლის დასაწყისთან შედარებით 16,45%-ით, ხოლო სამი თვის ჭრილში 4,73%-ით არის გაზრდილი.

ამ სტატიაში იმ ძირითად მიგნებებზე გიყვებით, რომლებსაც ინვესტორები საფონდო ბირჟაზე დაღმავალი პერიოდის მომზადებისთვის იყენებენ.

1. მუდმივად ამოწმებენ ინვესტიციების მდგომარეობას

მთავარი საქმე, რომლითაც ინვესტიციების მართვისას შეიძლება დაკავდე შენს პორტფელში არსებული აქციების შესახებ მუდმივად განახლებადი ინფორმაციის მიღებაა. ბაზრის აყვავების პერიოდში კომპანიების აქციების ზრდა ჩვეულებრივი ამბავია, თუმცა როდესაც ბირჟაზე შედარებით რთული სიტუაცია, ბევრი კომპანიისთვის ასეთი პერიოდი გამოწვევად იქცევა ხოლმე.

როგორც წესი, ბაზრის კრიზისი აქციების "გამოცდისთვის" კარგი დროა. ასეთ დროს ინვესტორები აკვირდებიან, თუ როგორ იქცევიან მათი აქციები და რამდენად მყარად დგანან ისინი სირთულეების პირისპირ. თუ ბიზნესს ძლიერი გუნდი მართავს, მისი ფინანსური მდგომარეობა წესრიგშია და კონკურენტულ უპირატესობაშია სხვა კომპანიებთან, სავარაუდოა, რომ ის კრიზისებსაც გაუძლებს და განვითარდება კიდეც.

2. ინვესტირებისას თანმიმდევრულები არიან

ინვესტირებაში თანმიმდევრულობა წინასწარ განსაზღვრული სტრატეგიის ქონას გულისხმობს. უფრო კონკრეტულად, გასათვალისწინებელია, რომ ბაზარზე არსებულმა ცვალებადმა მდგომარეობამ შენი სტრატეგია მნიშვნელოვნად არ შეცვალოს. ანალიტიკოსები ამბობენ, რომ რეგულარული ინვესტირება ერთ-ერთი საუკეთესო და საჭირო მიდგომაა, რაც ინვესტორმა შეიძლება აირჩიოს.

არ არსებობს განსაზღვრული რეცეპტი, რომელიც ინვესტორებისთვის აქციების ყიდვის ან გაყიდვის ზუსტ დროს გამოწერს. ბაზრისთვის ყველაზე რთულ პერიოდშიც კი შეიძლება არსებობდეს ისეთი აქცია, ან აქციების კრებული, რომელთა ყიდვაც იმ კონკრეტულ დროს მოგებიანია. ის, ვინც ამ საქმეს მსგავსი პერსპექტივიდან შეხედავს, ინვესტირების ახალ შესაძლებლობებსაც აღმოაჩენს.

3. მუდმივად ეძებენ ინვესტირების ახალ შესაძლებლობებს

როგორც ცნობილია, ბაზარი მთელი წლის განმავლობაში რამდენჯერმე აღწევს მაქსიმალურ მაჩვენებელს. როდესაც აქციების ფასები იზრდება, მათი ყიდვა ინვესტორებისთვის ნაკლებად ხელსაყრელია. ამასთან, ბირჟის დაღმავალი ტენდენციის დროს ინვესტორებს მაღალი ხარისხის აქციების დაბალ ფასად მოპოვება კარგი დროა.

უნდა ითქვას, რომ ეს მნიშვნელოვანი შესაძლებლობაა, რომელსაც არაერთი გამოცდილი ინვესტორი იყენებს. მათი მიზანია, კარგ ფასად ნაყიდი მაღალი შედეგების მქონე აქციები საკუთარ პორტფელში იმ დრომდე შეინახონ, ვიდრე ბაზარზე შემცირების ახალი ტენდენცია არ დაიწება. შესაბამისად, ისინი აქციებს სწორედ მაშინ ყიდიან, როდესაც საფონდო ბირჟაზე კომპანიები მორიგ პიკურ ნიშნულს აღწევენ ხოლმე.

საქართველოს ბანკის მობილბანკში 6000-მდე ცნობილი კომპანიის აქციის შეძენა არის შესაძლებელი. შენც შეგიძლია დაიწყო ინვესტირება ნებისმიერი თანხით და გახდე ისეთი ცნობილი კომპანიების აქციონერი, როგორებიცაა: Apple, Amazon, Microsoft, Tesla, Google და სხვა.

*ეს არ არის ფინანსური რჩევა

თუ ამ სტატიაში განხილული თემებით ხარ დაინტერესებული, შემოგვიერთდი ჯგუფში ინვესტიციები და გაიგე მეტი აქციებით ვაჭრობის შესახებ.