ალჟირელმა მოკრივემ და უკვე ოლიმპიურმა ჩემპიონმა, იმან ხალიფმა, საფრანგეთის სასამართლოში სარჩელი წარადგინა, რომლითაც იგი შესაძლო კიბერბულინგის შემთხვევების გამოძიებას ითხოვს. ხალიფის ადვოკატის, ნაბილ ბუდის თქმით, სარჩელში ბრიტანელი მწერალი ჯოან როულინგი და ამერიკელი ტექმაგნატი ილონ მასკიც არიან მოხსენიებულნი.

პარიზის პროკურატურის ონლაინსიძულვილთან ბრძოლის ეროვნული ცენტრი ადასტურებს, რომ ხალიფის წარდგენილი სარჩელის საფუძველზე კიბერშევიწროების შემთხვევების გამოძიება დაიწყო. ცენტრი აზუსტებს, რომ გამოძიება "გენდერული ნიშნით საჯარო შეურაცხყოფის, დისკრიმინაციის გაღვივებისა და წარმომავლობის გამო თავდასხმის" საქმეზე მიმდინარეობს.

იმან ხალიფი პარიზის წლევანდელი ოლიმპიადის ერთ-ერთი ყველაზე განხილვადი მონაწილე იყო. მას შემდეგ, რაც ქალების კრივში, 66 კგ წონით კატეგორიაში მოასპარეზე ხალიფთან დაპირისპირებული იტალიელი მეტოქე 46 წამში დანებდა, ინტერნეტი მოიცვა ცრუ ინფორმაციამ იმის შესახებ, რომ ალჟირელი მოკრივე ტრანსგენდერი ქალი იყო. ამ ცნობის გავრცელებას სოციალურ ქსელში ხელი შეუწყვეს როულინგმა და მასკმაც, ასევე აშშ-ის პრეზიდენტობის კანდიდატმა, დონალდ ტრამპმა.

• 46 წამში დასრულებული მატჩი, სიცრუის პროპაგანდა და რუსული გავლენები კრივში

აღსანიშნავია, რომ ხალიფის სარჩელი X-ის (ყოფილი ტვიტერის) წინააღმდეგ არის წარდგენილი. ადვოკატის განმარტებით, ეს ნიშნავს, რომ გამოძიება, სარჩელში დასახელებულ პირებთან ერთად, ყველა დანარჩენ ადამიანსაც შეეხება, მათ შორის, ანონიმური ანგარიშების მფლობელებს. ამასთან, მართალია, სარჩელი საფრანგეთშია წარდგენილი, მაგრამ ის სხვა ქვეყნებში მცხოვრებ პირებსაც უკავშირდება, ამდენად, პარიზის პროკურატურას აქვს უფლება, საერთაშორისო სამართლებრივი თანამშრომლობა მოითხოვოს.

ბუდი ასევე აღნიშნავს, რომ სასამართლო სისტემა კიბერბულინგის საქმეებს ბოლო პერიოდში უფრო სერიოზულად ეკიდება და ზოგიერთ შემთხვევაში დამნაშავედ ცნობილ პირს თავისუფლების აღკვეთაც მიესჯება.

რაც შეეხება ხალიფს, მართალია, ალჟირელმა მოკრივემ ოლიმპიური ოქროს მოპოვება შეძლო, მაგრამ მისი მწვრთნელი, პედრო დიასი, აღნიშნავს, რომ იმანზე და მის გარშემომყოფებზე "ძალიან იმოქმედა" შექმნილმა სიტუაციამ. მწვრთნელი იხსენებს, რომ სპორტსმენს ურჩია, სოციალურ ქსელებში საერთოდ აღარ შესულიყო, რათა მიზანზე კონცენტრაცია არ დაეკარგა.

"იგი ძალიან ჭკვიანი და მოტივირებულია", — აღნიშნავს დიასი, — "მისი ოქროს მედალი ჩემი სამწვრთნელო კარიერის ყველაზე დიდი მიღწევაა".

იმან ხალიფის საქმე კი წლევანდელი ოლიმპიადის ერთადერთი დრამა როდია, რომელიც სასამართლომდე მივიდა. პროკურატურა ასევე აწარმოებს გამოძიებას პარიზი 2024-ის გახსნის ცერემონიის რეჟისორის, ტომა ჟოლის, და ღონისძიების მონაწილის, ბარბარა ბუჩის, სარჩელებზე. ორივე მათგანმა სასამართლოს კიბერბულინგისა და მუქარების მიღების გამო მიმართა.