ავღანელ ქალ სპრინტერს, კიმია იუსოფის, წლევანდელ ოლიმპიურ თამაშებზე 100-მეტრიან დისტანციაზე სირბილში გამარჯვებამდე 2 წამი დააკლდა. თუმცა, იუსოფიმ, რომელიც ავღანეთის ოლიმპიური ნაკრების ექვსი წევრიდან ერთ-ერთია, ეს მომენტი თავისი სათქმელის გახმოვანებისთვის გამოიყენა.

"განათლება, სპორტი, ჩვენი უფლებები", — იუსოფიმ ფინიშის ხაზთან ფურცელი გაშალა ავღანეთის დროშის ფერებში დაწერილი ამ სიტყვებით.

"ავღანელი გოგოებისთვის სათქმელი მაქვს", — განაცხადა 28 წლის სპრინტერმა, — "არ დანებდეთ. უფლება არ მისცეთ სხვებს, თქვენ მაგივრად გადაწყვიტონ. უბრალოდ, ეძებეთ და გამოიყენეთ შესაძლებლობა".

ფოტო: Tom Jenkins / The Guardian

თალიბანის წინა მმართველობის დროს ირანში გადახვეწილი მშობლების ოჯახში დაბადებული კიმია იუსოფი სამშობლოს 2016 წელს დაუბრუნდა რიოს ოლიმპიურ თამაშებზე წარსადგენად. სპრინტერი ტოკიოს ოლიმპიადაზე თავისი ქვეყნის ნაკრების მედროშეც იყო. თუმცა, 2021 წელს, როცა თალიბანმა ძალაუფლება დაიბრუნა, იუსოფიმ ავღანეთი დატოვა და ირანში დაბრუნდა. აღსანიშნავია, რომ ავღანეთის ოლიმპიური კომიტეტიც ქვეყნის გარეთ მუშაობს, თალიბანის წარმომადგენლებს კი საერთაშორისო ოლიმპიურმა კომიტეტმა (IOC) პარიზში ოლიმპიურ თამაშებზე ჩასვლა აუკრძალა.

"მინდა, ავღანელი ხალხი წარმოვადგინო ამ დროშით, ჩვენი კულტურით. ავღანეთში გოგოებს, ჩვენს ქალებს უნდათ საბაზისო უფლებები, განათლება და სპორტი", — აღნიშნა იუსოფიმ, — "მე ვიბრძვი ქვეყნისთვის, რომელიც ტერორისტების ხელში აღმოჩნდა. ისინი რომ თქვენთან შემოიჭრან, ეტყვით, გაეთრიე, ეს ჩემი სახლიაო. ახლა წარმოიდგინეთ, მე როგორ ვგრძნობ თავს. მათ ჩემი სახლი წამართვეს. ავღანეთში მათ მთავრობად არავინ თვლის. არავინ. მათ ლაპარაკის უფლება არ აქვთ. მე მაქვს".

თალიბანმა, ნაციონალისტურ-ფუნდამენტალისტურმა მოძრაობამ, რომელსაც არაერთი ქვეყანა ტერორისტულ დაჯგუფებად მიიჩნევს, 2021 წელს ძალაუფლების ხელში ჩაგდებიდან დღემდე არაერთი დისკრიმინაციული ზომა მიიღო, დიდწილად, ქალების წინააღმდეგ. 2022 წელს მათ ავღანელ ტელეწამყვან ქალებს სახის გამოჩენა აუკრძალეს, მოგვიანებით შეუზღუდეს უმაღლეს სასწავლებლებში სწავლისა და არასამთავრობო ორგანიზაციებში მუშაობის უფლებაც. ამასთან, ავღანელ ქალებს მხოლოდ კონკრეტულ დღეებში აქვთ საჯარო სკვერების მონახულების შესაძლებლობა, ხოლო გრძელ გზაზე "მეურვე კაცის" გარეშე გადაადგილება საერთოდ ეკრძალებათ. გასულ წელს თალიბანის ბრძანებით ქვეყანაში სილამაზის სალონებიც დაიხურა.

გაეროს წინა თვეში გამოქვეყნებულ ანგარიშში აღნიშნულია, რომ თალიბანის ეგრეთ წოდებული მორალის პოლიცია მიზანში იღებს ქალებსა და გოგოებს, რითაც ქვეყანაში "შიშისა და მუქარის კლიმატს" ქმნის.

ასევე იხილეთ: