მსოფლიოში ერთ-ერთმა ყველაზე გავლენიანმა ამერიკულმა გაზეთმა, The New York Times-მა, 21-ე საუკუნის საუკეთესო წიგნების ასეული დაასახელა. რადგან უკვე საუკუნის მეოთხედი იწურება, გამოცემამ დროის ამ პერიოდში გამოქვეყნებული 100 საუკეთესო წიგნის სია შეადგინა. ჩამონათვალი 503 რომანისტის, პოეტის, კრიტიკოსის, რიგითი მკითხველისა და თავად NYT-ის ჟურნალისტების რჩეული წიგნებით შედგა.

სრული სია შეგიძლიათ გაზეთის ვებგვერდზე ნახოთ, ქვემოთ კი საუკუნის საუკეთესო წიგნების ათეულს იხილავთ.

  1. ელენა ფერანტეს My Brilliant Friend
  2. იზაბელ უილკერსონის The Warmth of Other Suns
  3. ჰილარი მენტელის Wolf Hall
  4. ედვარდ პ. ჯოუნსის The Known World
  5. ჯონათან ფრენზენის შესწორებები (ქართულად თარგმნა თამარ ჯაფარიძემ, სულაკაურის გამომცემლობა)
  6. რობერტო ბოლანიოს 2666
  7. კოლსონ უაითჰედის მიწისქვეშა რკინიგზა (ქართულად თარგმნა ზაზა ჭილაძემ, გამომცემლობა პალიტრა L)
  8. ვ. გ. ზებალდის აუსტერლიცი (ქართულად თარგმნა მაია ბადრიძემ, გამომცემლობა დიოგენე)
  9. კაზუო იშიგუროს არასოდეს გამიშვა (ქართულად თარგმნა დავით აკრიანმა, გამომცემლობა პალიტრა L)
  10. მერილინ რობინსონის Gilead

იმის მიუხედავად, რომ ამ ათეულიდან ექვსი წიგნი ქართულად ნათარგმნი არაა, მათგან ერთი-ორის ავტორს ქართველი მკითხველი მაინც იცნობს. მაგალითად, მერილინ რობინსონის რომანი მშობლიური კერა გამომცემლობა პალიტრა L-მა დაბეჭდა 2014 წელს (მთარგმნელი ლალი გოგაძე), ელენა ფერანტე კი გავიცანით რომანით მარტოობის დღეები, რომელიც 2020 წელს შემოგვთავაზა გამომცემლობამ ზოლიანი კატა (მთარგმნელი ხათუნა ცხადაძე).

თუმცა, აღსანიშნავია, რომ NYT-ის მიერ საუკუნის საუკეთესო რომანად დასახელებული My Brilliant Friend (ორიგინალური იტალიური სახელწოდებაა L'amica geniale — "შესანიშნავი მეგობარი") ელენა ფერანტეს — ფსევდონიმით ცნობილი უცნობი იტალიელი მწერლის — ყველაზე პოპულარული წიგნიცაა. ავტორმა მისით დაიწყო ნეაპოლიტანური რომანების ოთხნაწილიანი სერიის გამოშვება. წიგნის მიხედვით გადაიღეს სერიალიც, რომელსაც მსოფლიო აღიარება ხვდა წილად.

ქართველი მკითხველისთვის ცნობილ და საყვარელ წიგნებს კი ათეულს მიღმაც შეხვდებით. მაგალითად, ჯოან დიდიონის ჯადოსნური ფიქრის წელიწადი მე-12 ადგილზე გავიდა, კორმაკ მაკარტის გზა — მე-13 ადგილზე, იენ მაკიუენის მონანიება — 26-ე ადგილზე, ნ.კ. ჯემისინის მეხუთე ტალღა — 44-ე ადგილზე, მარჯან სატრაპის პერსეპოლისი — 48-ე ადგილზე, ფერანტეს ზემოხსენებული რომანი, მარტოობის დღეები კი, 92-ე ადგილზე აღმოჩნდა.

თუმცა, სიისთვის თვალის ერთი გადავლებითაც ჩანს, რომ საუკუნის საუკეთესო წიგნებად დასახელებული ტექსტების ასეულიდან უდიდესი ნაწილი ქართულად არაა ნათარგმნი. ასე რომ, იმედი ვიქონიოთ, ქართველი გამომცემლები სამომავლოდ ამ საქმეზე იზრუნებენ.

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...