დღეს ადამიანები ციფრულ სამყაროში ვცხოვრობთ. უდავოა, რომ ტექნოლოგიებისა და მეცნიერების განვითარება ჩვენს ცხოვრებაზე დადებითად აისახება და ყოველდღიურობას მნიშვნელოვნად ამარტივებს. თუმცა, არ შეიძლება უყურადღებოდ დავტოვოთ ფაქტი, რომ ხშირად, ტექნოლოგიურ მიღწევებს მავნე მიზნებისთვის იყენებენ.

ციფრული სამყაროს განვითარებასთან ერთად, იხვეწება კიბერდანაშაულის ფორმებიც. ამიტომ, მნიშვნელოვანია შეგვეძლოს მათი ამოცნობა და ვიცოდეთ, როგორ დავიცვათ თავი.

ბოლო პერიოდში სოციალურ ქსელებში კიბერთაღლითობის ახალი ფორმები შეინიშნება:

ადამიანები ფოსტის სახელით იღებენ წერილს, რომელიც ატყობინებს, რომ თითქოს მათი ამანათი ჩამოვიდა და მისამართთან დაკავშირებით არის უზუსტობა. ისინი მომხმარებლისგან ითხოვენ, გადავიდნენ მითითებულ ბმულზე და შეიყვანონ სწორი მისამართი. ამასთან ერთად, სთხოვენ პირადი ნომრისა და საბანკო ანგარიშის მითითებას. ამგვარად, თქვენი პერსონალური მონაცემები გადადის უცხო პირის ხელში.

ფოტო: NEXT.On.ge

თაღლითობის კიდევ ერთი გავრცელებული ფორმაა, როცა ინტერნეტ-მომხმარებლებს სთავაზობენ ინვესტიციების განხორციელებას მაღალი უკუგებით, ან დასაქმებას მაღალი ანაზღაურების სანაცვლოდ.

ინტერესის გამოხატვის შემთხვევაში, მომხმარებელს ამ პროცესში დახმარებას სთავაზობენ და არწმუნებენ, თითქოს ამისთვის საჭიროა მათ მოწყობილობაში Anydesk-ის ჩამოტვირთვა (Anydesk არის აპლიკაცია, რომლის საშუალებითაც შესაძლებელია დისტანციური წვდომა სხვა მოწყობილობაზე). ამის შედეგად, მომხმარებლის მოწყობილობაზე წვდომას მესამე, უცხო პირი იღებს და მას თავისუფლად შეუძლია მის ნაცვლად სხვადასხვა ტიპის ოპერაციის განხორციელება.

იყო შემთხვევები, როცა მომხმარებელი ხედავდა, როგორ მოქმედებდა მის მოწყობილობაში კიბერთაღლითი — ირიცხავდა თანხას ან/და იაქტიურებდა სესხს. ზოგიერთ შემთხვევაში კი კიბერთაღლითები სხვის მოწყობილობაში შეღწევის შემდეგ მათ მფლობელებს აშანტაჟებენ.

არის თაღლითობის ასეთი ფორმაც: Instagram Story-ში დასპონსორებულია მეგაბაიტების შეღავათიან ფასად შეძენის შესაძლებლობა. ამისთვის ითხოვენ მითითებულ ბმულზე გადასვლას და ინსტრუქციისთვის მიყოლას, რაც მათ შორის, გულისხმობს ბარათის მონაცემების გაზიარებასაც.

როგორ მოვიქცეთ კიბერუსაფრთხოების უზრუნველსაყოფად?

  • მნიშვნელოვანია, რომ სხვა ადამიანების დავავლებით, არ გადმოვწეროთ აპლიკაციები, მათი სანდოობის გადამოწმების გარეშე;
  • უცხო ადამიანებს არ მივცეთ წვდომა ჩვენს მოწყობილობებსა და პერსონალურ ინფორმაციაზე;
  • დასაქმების შემოთავაზების შემთხვევაში, შეამოწმეთ მისი რეალურობა, რადგან ხშირად გვხვდება ყალბი კომპანიების ვაკანსიები.