მოკლედ: ოზურგეთის საკრებულოს ფრაქცია ერთიანი ნაციონალური მოძრაობის წევრის, დავით მჟავანაძის განცხადებით, საკრებულოში საქმიანობას წყვეტენ და ბოიკოტის რეჟიმში გადადიან.

  • ფრაქციამ გადაწყვეტილება პროტესტის ნიშნად მიიღო, რომელიც უკავშირდება გუშინ, 28 მაისს, პარლამენტში, რუსულ კანონზე, პრეზიდენტის ვეტოს დაძლევას.

ამ თემაზე: "ოცნების" წევრის თქმით, რუსული კანონის მიღების გამო, პარტიას და თელავის საკრებულოში თანამდებობას ტოვებს

დეტალები: მჟავანაძის თქმით, დღეს, 29 მაისს, ბოიკოტში გადასვლის გადაწყვეტილება საკრებულოს სხდომაზე უნდა გაეცხადებინათ, მაგრამ ქართული ოცნების წარმომადგენლებმა მათ ამის საშუალება არ მისცეს.

ტელეკომპანია პირველის ინფორმაციით, სხდომაზე სიტუაცია მას შემდეგ დაიძაბა, რაც ოპოზიციამ რუსული კანონის დაკანონება გააპროტესტა.

ოცნების დეპუტატი სხდომაზე რუსული რუბლებით მივიდა: "84 კაცის ჭკუაზე როგორ ატარებთ ქვეყანას. ნუ მიყვებით მათ პოლიტიკურ სამარეში", — უთხრეს ოპოზიციის წევრებმა ოცნების დეპუტატებს.

  • "კომუნისტური პარტიის წარმომადგენლებმა არ მოგვცეს იმის შესაძლებლობა, რომ ეს გვეთქვა და ჩვენი კონსტიტუციით განსაზღვრული ფორმა გამოგვეხატა და სიმბოლური იყო ის, რომ ისინი გამოცხადდნენ რუსული რუბლებით.
  • მე მათ მოვუწოდებ, რომ რუსული რუბლები შეინახონ, რადგან მათ დასჭირდებათ, ვეღარ იფრენენ დასავლეთის ქვეყნებში და როდესაც მოუწევთ წითელ მოედანზე წასვლა, აუცილებლად დასჭირდებათ იქ ეს რუსული რუბლები", — თქვა მჟავანაძემ.

კონტექსტი: ოპოზიციურმა პარტიებმა და დეპუტატებმა პარლამენტს და საკრებულოებს ბოიკოტი მას შემდეგ გამოუცხადეს, რაც პარლამენტში, ქართულმა ოცნებამ, რუსული კანონი, მესამე მოსმენით მიიღო.

  • ბოიკოტის რეჟიმში არიან და აღარ მიიღებენ მონაწილეობას საპარლამენტო საქმიანობაში პარტია ლელო, ერთიანი ნაციონალური მოძრაობა, მოქალაქეები და დამოუკიდებელი დეპუტატი სალომე სამადაშვილი.
  • ასევე, 15 მაისს, ბოიკოტს შეუერთდნენ აჭარის უმაღლესი საბჭოს ერთიანი ნაციონალური მოძრაობის დეპუტატები, ხოლო 16 მაისს, აჭარის მუნიციპალიტეტში საკრებულოს წევრები ერთიანი ნაციონალური მოძრაობიდან.
  • გარდა ამისა, 24 მაისს, პარტია ლელომ და გირჩი — მეტი თავისუფლებამ, თბილისის საკრებულოს სხდომებს ბოიკოტი გამოუცხადეს.