რა ხდება: აჭარის უმაღლეს საბჭოში ერთიანი ნაციონალური მოძრაობის დეპუტატებმა ბრიფინგზე განაცხადეს, რომ რუსული რეჟიმის წინააღმდეგ ბრძოლას ხალხთან ერთად იწყებენ.

  • ენმ-ის დეპუტატების თქმით, რუსული კანონის დამტკიცებით, ხელისუფლებამ საქართველოს კონსტიტუციის 78-ე მუხლი დაარღვია და ამით კონსტიტუციური ჩარჩოებიდან გავიდა.

განცხადებიდან: "დაუღალავი და სამაგალითო ახალგაზრდა თაობა ითხოვს თანამედროვე, ევროპული სახელმწიფოს მშენებლობას, ევროპისკენ სვლას, რისთვისაც სამშობლოს სადარაჯოზე დგანან ქუჩაში, წვიმაში თუ დარში, დღისით თუ ღამით.

  • გვინდა, სოლიდარობა გამოვუცხადოთ აქციებზე დაკავებულ, უმოწყალოდ ნაცემ, დაზარალებულ ადამიანებს, რომელსაც თავს ესხმის ხელისუფლება", — განაცხადეს მათ.

აჭარის უმაღლეს საბჭოში ოპოზიციონერი დეპუტატები აცხადებენ, რომ ამ მიზეზების გამო, პროტესტის ნიშნად შეწყვიტეს ყოველგვარი თანამშრომლობა ივანიშვილის რუსულ რეჟიმთან: "შეუძლებელია, მათ ესაუბრო რაიმე საკითხზე გარდა ერთისა, რომ დატოვონ ხელისუფლება."

ისინი მოუწოდებენ პროდასავლურ პარტიებს, რომ პარტიული საკითხებისა და ინტერესების მიუხედავად, ეროვნული იდეის გარშემო გაერთიანდნენ.

კონტექსტი: საპარლამენტო უმრავლესობის მიერ საქართველოში რუსული კანონის მიღების შემდეგ, ბოიკოტის შესახებ განაცხადა საპარლამენტო ოპოზიციის ნაწილმაც. პარლამენტის საქმიანობას ბოიკოტს უცხადებენ პარტიები — ერთიანი ნაციონალური მოძრაობა და ლელო საქართველოსთვის.

  • ენმ-ში თქვეს, რომ გადავიდნენ ბოიკოტის რეჟიმში როგორც საპარლამენტო საქმიანობაში, ისე ყველა მუნიციპალიტეტის საკრებულოში.
  • ბოიკოტს აცხადებს პარტია მოქალაქეებიც — ალეკო ელისაშვილისა და ქეთი თურაზაშვილის წარმომადგენლობით: "ოთხი წელი მართლა გულით ვცდილობდი, დამემტკიცებინა ხალხისთვის, რომ იქ უბრალოდ, ხელფასის ასაღებად არ ვიყავი; მთელი გულით ვიყავი ყველაფერში ჩართული, მაგრამ ახლა, ჩვენ, რა თქმა უნდა, ვუერთდებით ბოიკოტს", — თქვა ალეკო ელისაშვილმა გასული, 14 მაისის ღამეს.
  • ბოიკოტზე უარი თქვა პარტიამ საქართველოსთვის. ყოფილი პრემიერ-მინისტრის, გიორგი გახარიას გუნდის წევრებმა განაცხადეს, რომ საპარლამენტო ბოიკოტს არ უერთდებიან: " გამოვიყენებთ ყველა ტრიბუნას", — განაცხადეს მათ.

მსგავსი: ლელო — "უნდა შეიქმნას ეროვნული წინააღმდეგობის ევროპული პლატფორმა, სალომე ზურაბიშვილთან მჭიდრო კოორდინაციით