მოკლედ: საერთაშორისო გამჭვირვალობა — საქართველოს (TI) ინფორმაციით, სტრასბურგის სასამართლოში, ლევან მურუსიძის განხილულ სულ ცოტა ხუთ საქმეზე, ადამიანის ფუნდამენტური უფლებების დარღვევა დადგინდა.

დეტალები: განხილული საქმეებიდან სამზე, სასამართლომ დარღვევების შესახებ გადაწყვეტილება გამოიტანა, ხოლო ორ საქმეზე, სახელმწიფომ თავად აღიარა დარღვევა.

  • ამ საქმეების გამო, საქართველოს დაზარალებულების სასარგებლოდ ჯამში 105 988 ევროს გადახდა მოუწია.

TI წერს, რომ ევროკომისიის რეკომენდაციის თანახმად, ლევან მურუსიძე, როგორც იუსტიციის უმაღლესი საბჭოს წევრი, კეთილსინდისიერების შემოწმების მექანიზმს უნდა დაექვემდებაროს, რასაც ის, "სასამართლო კლანის სხვა წევრებთან და ხელისუფლებასთან ერთად, აქტიურად ეწინააღმდეგება".

წინაისტორია: ერთი წლის წინ, 2023 წლის აპრილში აშშ-ის სახელმწიფო დეპარტამენტმა ლევან მურუსიძე, მიხეილ ჩინჩალაძე და კიდევ ორი ქართველი მოსამართლე დაასანქცირა.

  • სანქციები დაუწესდათ მათ ოჯახის წევრებსაც და აშშ-ში შესვლა აეკრძალათ.
  • სახდეპის იმდროინდელი განცხადების თანახმად, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, "რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ."

ლევან მურუსიძე ე.წ. სასამართლო კლანის გავლენიან წევრად მოიაზრება. ის იყო სანდრო გირგვლიანის საქმის მოსამართლე ხელისუფლებაში მიხეილ სააკაშვილის ნაციონალური მოძრაობის ყოფნისას.

  • ლევან მურუსიძე 2022 წლის 23 ოქტომბერს იუსტიციის უმაღლეს საბჭოს წევრად ხელახლა აირჩიეს, გადაწყვეტილება კი არასამთავრობო ორგანიზაციებმა და პოლიტიკურმა პარტიებმა გააკრიტიკეს. [მეტი]

5 აპრილს, ინფორმაციის თავისუფლების განვითარების ინსტიტუტმა (IDFI) განაცხადა, რომ თბილისის საქალაქო სასამართლომ ოთხი მოსამართლის, მათ შორის, აშშ-ს სახელმწიფო დეპარტამენტის მიერ სანქცირებული მიხეილ ჩინჩალაძის და ლევან მურუსიძის ქონებრივი მდგომარეობის დეკლარაციის შემოწმების პროცესი გააჩერა.

გაიგე მეტი: მოსამართლეთა ქონების შემოწმების პროცესის გაჩერება, ვეტინგის საჭიროების დამატებითი მტკიცებულებაა — არასამთავროების კოალიცია