მოკლედ: კოალიცია დამოუკიდებელი და გამჭვირვალე მართლმსაჯულებისთვის, რომელშიც 41 ორგანიზაციაა გაერთიანებული, აცხადებს, რომ თბილისის საქალაქო სასამართლოს მიერ, ოთხი მოსამართლის ქონების შემოწმების პროცესის გაჩერება, კეთილსინდისიერების შემოწმების საჭიროების დამატებითი მტკიცებულებაა.

  • კოალიცია მმართველ პარტიას მოუწოდებს, შეწყვიტოს საქართველოს ინტერესების დაზიანება, უარი თქვას ხელახლა ინიციირებულ რუსულ კანონზე და დაიწყოს მართლმსაჯულების რეალური რეფორმა.

დეტალები: კოალიცია წერს, რომ მართლმსაჯულებაში კორუფციის ადგილი არ არის და კეთილსინდისიერი მოსამართლე, პირველ რიგში, თვითონ უნდა იყოს დაინტერესებული, გამოიყენოს ყველა შესაძლებლობა, გამოირიცხოს კორუფციაში მისი შესაძლო ჩართულობა.

კოალიცია აღნიშნავს, რომ ანტიკორუფციული ბიუროს წინააღმდეგ დავის ინიციატორები ის მოსამართლეები არიან, რომელთა კეთილსინდისიერებასთან, მათ შორის, ფინანსურ მდგომარეობასთან დაკავშირებით, საზოგადოებაში მნიშვნელოვანი კითხვები არსებობს:

  • "მოსამართლეს, რომელსაც ეშინია ისეთი ლიმიტირებული ფარგლების მქონე ანტიკორუფციული მექანიზმის, როგორიცაა დეკლარაციის შემოწმება, ის, ბუნებრივია, შეეწინააღმდეგება მისი კეთილსინდისიერების სრულყოფილ გამოკვლევასაც".

კოალიციის თქმით, ამ ფაქტმა, შესაძლოა, შექმნას შესაძლებლობა, რომ კლანის წევრებმა, სასამართლოს გამოყენების გზით, თავი აარიდონ მათი ფინანსური კეთილსინდისიერების გადამოწმებას"

  • "ამ ფონზე, მმართველი პარტია მხარს უჭერს სასამართლო კლანს, ხელს უშლის მართლმსაჯულების გაჯანსაღების სისტემურ რეფორმას და ევროკავშირის მიერ განსაზღვრული 9 ნაბიჯის შესრულების ნაცვლად ხელახლა აინიციირებს რუსულ კანონს".

კონტექსტი: გუშინ, 5 აპრილს, ინფორმაციის თავისუფლების განვითარების ინსტიტუტმა (IDFI) განაცხადა, რომ თბილისის საქალაქო სასამართლომ ოთხი მოსამართლის, მათ შორის, აშშ-ს სახელმწიფო დეპარტამენტის მიერ სანქცირებული მიხეილ ჩინჩალაძის და ლევან მურუსიძის ქონებრივი მდგომარეობის დეკლარაციის შემოწმების პროცესი გააჩერა.

გაიგე მეტი: სასამართლომ გააჩერა სანქცირებული ჩინჩალაძის, მურუსიძის და კიდევ 2 მოსამართლის ქონების შემოწმების პროცესი

2024 წლის 12 იანვარს ანტიკორუფციული ბიუროს მიერ შექმნილმა დამოუკიდებელმა კომისიამ შეარჩია 300 თანამდებობის პირი, მათ შორის 27 მოსამართლე, რომელთა ქონებრივი მდგომარეობის დეკლარაციაც 2024 წელს უნდა შემოწმებულიყო.

  • სიაში მოხვდნენ მიხეილ ჩინჩალაძე, ლევან მურუსიძე, სერგო მეთოფიშვილი და ვასილ მშვენიერაძე.
  • მათ თბილისის საქალაქო სასამართლოს მიმართეს და მოითხოვეს კომისიის სხდომის ოქმის ბათილად ცნობა.

ასევე, წაიკითხეთ: ცნობილია, ვინ იქნება 300 მაღალჩინოსანი, რომელთა ქონებას კორუფციის მაღალი რისკის გამო შეამოწმებენ