რატომ არის მნიშვნელოვანი: სახელმწიფო დეპარტამენტის განცხადებით, მათ ბოროტად გამოიყენეს თანამდებობა, როგოც სასამართლოს თავმჯდომარეებმა და იუსტიციის უმაღლესი საბჭოს წევრებმა.

  • "რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ", — ვკითხულობთ განცხადებაში.
  • სანქცირებულებს შორის არიან ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე.
  • განცხადებაში აღნიშნულია, რომ მოსამართლეები "მნიშვნელოვან კორუფციულ საქმიანობაში ჩართულობის გამო" სანქცირდებიან.

გარდა ამისა, სანქციები დაუწესდათ მათ ოჯახის წევრებსაც და აშშ-ში შესვლა აეკრაძალათ.

  • "პირებს, რომელთა სანქცირებაც განხორციელდა 2023 ფისკალური წლის დაფინანსების აქტის 7031(c) თავის საფუძველზე, რომელიც ეხება სახელმწიფო დეპარტამენტის საგარეო ოპერაციებსა და მასთან დაკავშირებულ პროგრამებს, და მათ უშუალო ოჯახის წევრებს, ეკრძალებათ ამერიკის შეერთებულ შტატებში შესვლა"
  • დეპარტამენტში ამბობენ, რომ აშშ აგრძელებს საქართველოს მოქალაქეების მხარდაჭერას დემოკრატიისა და სამართლის უზენაესობის გაგრძელების კუთხით.
  • "ჩვენ ყველა იმ მოსმართლის გვერდით ვდგავართ, ვისაც აქვს გამბედაობა და კეთილსინდისიერება იმოქმედოს მიუკერძოებლად და დამოუკიდებლად".

დეტალები: ლევან მურუსიძე ე.წ. სასამართლო კლანის გავლენიან წევრად მოიაზრება, ის 23 ოქტომბერს იუსტიციის უმაღლეს საბჭოს წევრად ხელახლა აირჩიეს, გადაწყვეტილება კი არასამთავრობო ორგანიზაციებმა და პოლიტიკურმა პარტიებმა გააკრიტიკეს.

  • რაც შეეხება მიხეილ ჩინჩალაძეს, ის 27 ივნისს 5 წლის ვადით სააპელაციო სასამართლოს თავმჯდომარედ ისევ აირჩიეს, ჩინჩალაძე ამ პოზიციაზე წარდგენილი ერთადერთი კანდიდატი იყო.
  • არასამთავრობო სექტორმა, საერთაშორისო პარტნიორებმა და ოპოზიციამ არაერთხელ აღნიშნა, რომ მოსამართლეთა ნაწილი გადაწყვეტილებებს მმართველი გუნდის პოლიტიკური დაკვეთით იღებს.