მოკლედ: 29 თებერვალს, ცნობილი გახდა, რომ პარტია ქართული ოცნება მზად არის, მოამზადოს მორიგი ანტიდასავლური და ჰომოფობიური კანონპროექტი, რომელიც კრემლის პრინციპებს იმეორებს.

  • "ველოდები კანონპროექტს, რომლის გაცნობის შემდეგაც შევძლებ დეტალების შეფასებას", — აცხადებს ლევან იოსელიანი, სახალხო დამცველი.

ის, ასევე ამბობს, რომ წინასწარ უჭირს შეაფასოს კანონპროექტის შინაარსი, მაგრამ ცალსახად მნიშვნელოვნად მიიჩნევს, რომ:

  • კანონპროექტი წინააღმდეგობაში არ უნდა მოდიოდეს საქართველოს კონსტიტუციით გარანტირებულ ძირითად უფლებებთან,
  • უნდა იცავდეს თანასწორობის პრინციპს
  • და არ ზღუდავდეს სიტყვისა და გამოხატვის თავისუფლებას.

რა ვიცით სახელისუფლებო პარტიის საკანონმდებლო ინიციატივაზე: ამბობენ, რომ კანონპროექტს წარადგენენ 2024 წლის მარტის პირველ ნახევარში.

  • მანამდე, 29 თებერვალს საპარლამენტო უმრავლესობის ლიდერმა მამუკა მდინარაძემ განაცხადა, რომ ქართულმა ოცნებამ მიიღო გადაწყვეტილება მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".
  • მამუკა მდინარაძემ აღნიშნა, რომ კანონპროექტი უახლოესი 2 კვირის განმავლობაში მომზადდება და წარუდგენენ პარლამენტს.
  • 1-ელ მარტს, საქართველოს პრემიერ მინისტრმა მედიასთან თქვა, რომ თუ "ლგბტ პროპაგანდის" ამკრძალავი კანონის მიღებაში მთავრობის ჩართულობა გახდა საჭირო, კანონპროექტის მომზადებაში ჩაერთვებიან.

გაიგე მეტი: "პუტინი აფინანსებს ლგბტ თემსაც და რადიკალებსაც" — რას ამბობდა მდინარაძე 2021 წელს და რას ამბობს ახლა

ბოლო ხაზი: "ჰომოსექსუალობის ამკრძალავი" კანონი რუსეთში 2013 წელს შევიდა ძალაში. ეს კანონი 18 წლამდე ასაკის ადამიანებში "ჰომოსექსუალობის აგიტაციას" კრძალავს.

  • რუსეთის მთავრობა აცხადებდა, რომ აღნიშნული კანონით "მორალს" იცავს, თუმცა, 2017 წელს ევროსასამართლომ განაცხადა, რომ ეს კანონი აძლიერებს სტიგმას, წინასწარგანწყობასა და ახალისებს ჰომოფობიას.
  • რუსეთის უზენაესმა სასამართლომ, 2023 წლის 30 ნოემბრის გადაწყვეტილებით, საერთაშორისო ლგბტქია+ უფლებადამცველი მოძრაობები "ექსტრემისტულ" ორგანიზაციებად ცნო.

გაიგე მეტი: ხელისუფლების მორიგი კამპანია ჰომოფობიური რიტორიკით, ლევან აკინის ფილმი და ანა ხაზარაძის კომპანია — რა ხდება