Apple (AAPL) მსოფლიოს მასშტაბით ერთ-ერთი ყველაზე მსხვილი კომპანიაა. მისი ძირითადი საქმიანობა სამომხმარებლო ტექნიკის წარმოება და რეალიზაციაა. მათ შორის, ის აწარმოებს: სმარტფონებს, ტაბლეტებს, კომპიუტერულ ტექნიკასა და სხვადასხვა სერვისს.

კომპანიის ერთ-ერთი ყველაზე ცნობილი ბრენდია iPhone. ამასთან, მის ყველაზე მეტად გაყიდვად პროდუქტებს შორისაა iPad-ისა და Mac-ის ხაზის ნივთები. გარდა ამისა, Apple საკუთარ მომხმარებელს Apple Tv+, Apple Music და სხვადასხვა ციფრულ კონტენტსაც სთავაზობს.

Apple საკუთარი ფასიანი ქაღალდებით 1980 წლიდან ვაჭრობს. ამჟამად მისი ერთი აქციის შეძენა 182.52 დოლარად არის შესაძლებელი. ამ კომპანიის აქციები ქართველ ინვესტორებს შორისაც პოპულარულია. Apple იმ ტოპ-10 აქციას შორის შედის, რომელსაც საქართველოს ბანკის მობილბანკის საშუალებით ყიდულობენ.

სტატიის მომდევნო ნაწილში კომპანიის ექვს აქციონერს უფრო დეტალურად განვიხილავთ.

ტოპ-3 ინსტიტუციური აქციონერი

Vanguard Group Inc-ის ანგარიშზე Apple-ის 1,25 მილიარდზე მეტ აქციაა, რაც მთლიანი აქციების 7,96%-ს წარმოადგენს. ეს კომპანია სავაჭრო ფონდი, რომელიც დაახლოებით 7,6 ტრილიონი დოლარის გლობალურ აქტივებს მართავს. The Vanguard S&P 500 ETF (VOO) კომპანიის ერთ-ერთი ყველაზე დიდი ფონდია, რომელიც 937.1 მილიარდი დოლარის აქტივებს აერთიანებს. 2023 წლის ნოემბრის მდგომარეობით, Apple ნომერ მეორე კომპანიაა, რომელიც VOO-ს პორტფელის 7,24%-ს მოიცავს.

BlackRock Inc. ფლობს Apple-ის 1,02 მილიარდ აქციას, რაც მთლიანი აქციების 6,44%-ს წარმოადგენს. Vanguard-ის მსგავსად ეს კომპანიაც ფონდია, რომელიც ETF-ების მენეჯმენტით არის დაკავებული — მისი კონტროლის ქვეშ 9,09 ტრილიონი დოლარის აქტივებია. The iShares Core S&P 500 ETF (IVV) ერთ-ერთი უდიდესი ფონდია, რომელიც 2024 წლის იანვრის მდგომარეობით 403 მილიარდი დოლარის წმინდა აქტივს წარმოადგენს. Apple კი სიდიდით მეორე ჰოლდინგია, რომელიც IVV-ის პორტფელის 6,76%-ს მოიცავს.

ETF გაცვლითი სავაჭრო ფონდია, რომელიც ინვესტორებს აქციების კრებულში ფულის დაბანდების საშუალებას აძლევს.

Berkshire Hathaway Inc. კომპანიის თითქმის მილიარდ აქციას ფლობს, რაც მთლიანი ფასიანი ქაღალდების 5,73%-ია. უმდიდრესი ინვესტორის, უორენ ბაფეტის ხელმძღვანელობით Berkshire Hathaway დივერსიფიცირებული ჰოლდინგია, რომელიც სხვადასხვა სექტორის ინვესტიციებს აერთიანებს: სადაზღვევო სფეროში, რკინიგზაში, გაზსა და ელექტრომომარაგებაში და სხვა.

ტოპ-3 აქციონერი ფიზიკურ პირებს შორის

არტურ ლევინსონი Apple-ის 4,590,409 აქციას ფლობს. ის კომპანიის ბორდის თავმჯდომარეა, თუმცა მისი გამოცდილება აუდიტისა და ფინანსების მიმართულებიდან მოდის. ლევინსონი Apple-ში კორპორატიული მმართველობის მიმართულებითაც იყო დასაქმებული.

ტიმ კუკი Apple-ის 3,279,898 აქციას ფლობს, რაც სრულად გამოშვებული ფასიანი ქაღალდების 0,02%-ს წარმოადგენს. მან Apple-თან თანამშრომლობა 1998 წელს დაიწყო და ოპერაციების მიმართულებას ჩაუდგა სათავეში — ის მსოფლიოს მასშტაბით გაყიდვებსა და ოპერაციულ პროცესებზე იყო პასუხისმგებელი. 2011 წელს კი, როდესაც კომპანიის დამფუძნებელი გარდაიცვალა, კუკმა Apple-ის აღმასრულებელი დირექტორის თანამდებობა დაიკავა. აქვე უნდა ითქვას, რომ წარსულში კუკი ხელმძღვანელობდა Apple-ის მაკინტოშის განყოფილებასაც და მნიშვნელოვანი როლი ითამაშა სტრატეგიული გადამყიდველისა და მიმწოდებლის ურთიერთობების ჩამოყალიბებაში.

ჯეფ უილიამსი, რომელიც Apple-ის მთავარი ოპერაციული ოფიცერია, კომპანიის 677,392 აქციას ფლობს. ის Apple-ის ოპერაციებს გლობალურ დონეზე ზედამხედველობს და ჩართულია კომპანიის სხვადასხვა ინიციატივის სწორად წარმართვის საქმეში. უილიამსი კომპანიას 1998 წელს შეუერთდა და ოპერაციების მენეჯერის ვიცე-პრეზიდენტის თანამდებობა დაიკავა. გარდა ამისა, ის კომპანიის გლობალური შესყიდვებსაც ხელმძღვანელობდა.

საქართველოს ბანკის მობილბანკში 6000-მდე ცნობილი კომპანიის აქციის შეძენა არის შესაძლებელი. შენც შეგიძლია დაიწყო ინვესტირება ნებისმიერი თანხით და გახდე ისეთი ცნობილი კომპანიების აქციონერი, როგორებიცაა: Apple, Amazon, Microsoft, Tesla, Google და სხვა.

*ეს არ არის ფინანსური რჩევა