მოკლედ: საქართველო მუშაობს, რათა უკრაინასა და მოლდოვას დაეწიოს, რომლებიც ევროკავშირში გაწევრიანების გზაზე უფრო წინ არიან — უთხრა პრეზიდენტმა ზურაბიშვილმა ინტერვიუში Euractiv-ს..

• ინტერვიუ მიუნხენის უსაფრთხოების კონფერენციის ფარგლებში გაიმართა, ქართულ თარგმანს პრეზიდენტის ადმინისტრაცია ავრცელებს.

დეტალები: ზურაბიშვილს ჰკითხეს, რა გავლენა იქონია კანდიდატის სტატუსის მინიჭებამ საქართველოზე.

• პრეზიდენტის თქმით, ევროკავშირის გადაწყვეტილება ძალიან მნიშვნელოვანი იყო, რადგან ერთი წლის წინ, პირველმა უარმა, საქართველოს მოსახლეობა გაურკვეველ და "შესაძლოა, დაუცველ მდგომარეობაშიც კი დატოვა".
• "მნიშვნელოვანი იყო იმითაც, რომ ყველა პოლიტიკურმა პარტიამ, ევროპული რიტორიკის ირგვლივ, ხელახლა გაერთიანება დაიწყო, რაც წინა თვეებში არ მომხდარა. ახლა, ძალიან ცხადია, რომ 2024 წელი 2023 წელზე არანაკლებ მნიშვნელოვანია და უფრო მეტად კონკრეტული ნაბიჯების გადადგმა დაგვჭირდება, ვიდრე აქამდე", — თქვა ზურაბიშვილმა.
• მისი თქმით, გეგმაა "დავეწიოთ ასოცირებული ტრიოს ორ პარტნიორს — უკრაინას და მოლდოვას".

კითხვას — "გადაწყვეტილების მიღებამდე იყო დებატები, შეიძლება თუ არა ამ პოზიტიურ მოსაზრებას პრორუსული ხელისუფლების გაძლიერება და გარკვეულწილად, მართებულობის დამტკიცება მოეხდინა მის კურსში...", პრეზიდეტი პასუხობს:

• "მე ყოველთვის ამ აღქმის წინააღმდეგი ვიყავი, რომელიც საქართველოს შიგნით უფრო მეტად განიხილებოდა, ვიდრე გარეთ, რადგან ვფიქრობ, რომ მოსახლეობამ ზუსტად იცის რა სურს - საქართველოსთვის ალტერნატიული პერსპექტივა არ არსებობს, ამას უნდა მიჰყვეს ხელისუფლება და ამ დროისთვის, ისინი ამას მიჰყვებიან. საქართველოს ამ უმრავლესობის აღქმის საწინააღმდეგოდ ვერ მართავ, უნდა დადო შედეგი არა მხოლოდ იმიტომ, რომ ამას ევროპელები ითხოვენ, არამედ იმიტომ, რომ ამას შენი მოსახლეობა ითხოვს."

ზურაბიშვილს ჰკითხეს პოლარიზაციის პრობლემის გადაჭრის პერსპექტივებზეც, რაზეც მან თქვა, რომ ეს, გარკვეულწილად, დამოკიდებული იქნება არჩევნების შედეგზე.

• "თუ არ იქნება მკაფიო უმრავლესობა და გვეყოლება კოალიციური მთავრობა (იქნებ დროა საქართველომ ეს გამოცადოს), ეს იქნება პოლარიზაციის დასასრული, რადგან ჩვენ მოგვიწევს ვისწავლოთ ერთმანეთთან მუშაობა და [ქვეყნის] ერთად მართვა", — თქვა პრეზიდენტმა.

შემცირდება თუ არა ევროკავშირში გაწევრიანების შანსები, ივანიშვილის პოლიტიკაში დაბრუნების შემდეგ — ამ კითხვაზე პრეზიდენტმა თქვა, რომ ივანიშვილი აღარ არის პოლიტიკურ სპექტრს მიღმა და უკან დაბრუნებით ის იღებს პასუხისმგებლობას "წინა პოლიტიკაზე და იმაზეც, რაც უახლოეს თვეებში მოხდება".

პრეზიდენტს ჰკითხეს საგარეო საფრთხეებზეც. მან თქვა, რომ რუსული საფრთხე არ შეცვლილა.

• "სანამ რუსეთი ისეთივეა, როგორადაც ჩვენ ყოველთვის ვიცნობდით მას, ყოველთვის ასე იქნება, სადაც კი რბილ ადგილს იპოვის, იქით გადაადგილდება. ყველაზე მნიშვნელოვანია, რომ ასეთი რბილი ადგილები არ არსებობდეს. სწორედ ამიტომ გვინდა ევროკავშირსა და ნატოში გაწევრიანება, რადგან სანამ გარეთ ხარ, არ იმყოფები დაცულ ზონაში."