რა ხდება: საქართველოს პრეზიდენტის, სალომე ზურაბიშვილის მიერ 2024 წლის 29 იანვარს შევსებული დეკლარაციის მიხედვით, პირადი შემოსავლიდან დახარჯა 48 217 ლარი ევროპის ქვეყნებში ვიზიტების განსახორციელებლად.

• მთლიანობაში, გასული წლის 1-ელი იანვრიდან 31 დეკემბრის ჩათვლით, მან ხელფასის სახით 84 220 ლარი აიღო;
• და როგორც დეკლარაციიდან ირკვევა, ხელფასის თითქმის ნახევარი დახარჯა საქართველოს ევროინტეგრაციის მიზნით გამართული შეხვედრებისთვის ევროპის სხვადასხვა ლიდერთან.

რატომ არის მნიშვნელოვანი: პრეზიდენტის ადმინისტრაციამ მედიასთან 2024 წლის 13 თებერვალს დაადასტურა, რომ სალომე ზურაბიშვილი მიუნხენის უსაფრთხოების კონფერენციაზე მიიწვიეს და შესაბამისად, მონაწილეობასაც მიიღებს.

• პრეზიდენტს, მიუნხენის კონფერენციაში მონაწილეობის მისაღებად, მთავრობისთვის თანხმობის მისაღებად არ მიუმართავს, რადგან თვეებია, ხელისუფლება უარს აცხადებს, ბიუჯეტიდან დააფინანსოს ზურაბიშვილის ევროპული ვიზიტები.
• სალომე ზურაბიშვილის გადაწყვეტილება მმართველი პარტიის, ქართული ოცნების ახალმა თავმჯდომარემ ირაკლი ღარიბაშვილმა შეაფასა, როგორც "სირცხვილი" და "ღალატი".
• მიუნხენის უსაფრთხოების კონფერენცია 17-18 თებერვალს ჩატარდება.
• არსებული ინფორმაციით, კონფერენციაში მონაწილეობას არ მიიღებს პრემიერ-მინისტრი ირაკლი კობახიძე, საქართველოს მთავრობიდან კონფერენციას საგარეო საქმეთა მინისტრი, ილია დარჩიაშვილი დაესწრება.

კონტექსტი: 2023 წლის 30 აგვისტოს ცნობილი გახდა, რომ სალომე ზურაბიშვილი საქართველოსთვის კანდიდატის სტატუსის მინიჭების მხარდასაჭერად ევროპულ ლიდერებთან შეხვედრებს იწყებდა, რასაც ქართული ოცნების მიერ ზურაბიშვილის ერთხმად გაკრიტიკება მოჰყვა. პარტიის იმდროინდელმა თავმჯდომარემ, ირაკლი კობახიძემ და სხვებმა ის კონსტიტუციის უხეშ დარღვევაში დაადანაშაულეს და დააანონსეს, რომ ამას "რეაგირების გარეშე ვერ დატოვებდნენ".

• მთავრობის უარის მიუხედავად, ზურაბიშვილის ვიზიტები მაინც შედგა.

• არც სახელისუფლებო რეაგირებამ დააყოვნა — "რეაგირება" კი ქვეყნის ისტორიაში პირველად, საქართველოს პრეზიდენტის წინააღმდეგ წამოწყებული იმპიჩმენტის პროცესი იყო.

პრეზიდენტის ვერშემდგარი იმპიჩმენტის ქრონიკა — მოკლედ: მმართველი პარტია აპელირებდა იმაზე, რომ რომ მთავრობის თანხმობის გარეშე ოფიციალური ვიზიტები არაკონსტიტუციურია, ამიტომ მიიღეს გადაწყვეტილება, პრეზიდენტის მიმართ იმპიჩმენტის პროცედურა დაეწყოთ.

• საკონსტიტუციო სასამართლომ პარლამენტის წევრების [ირაკლი კობახიძის, შალვა პაპუაშვილის, მამუკა მდინარაძის და სხვების, სულ 80 წევრის] კონსტიტუციური წარდგინება პრეზიდენტის იმპიჩმენტთან დაკავშირებით 22 სექტემბერს მიიღო.
• 2023 წლის 16 ოქტომბერს, ექვსი მოსამართლის გადაწყვეტილების შედეგად საკონსტიტუციო სასამართლომ ზურაბიშვილი კონსტიტუციის დამრღვევად ცნო.
• წინააღმდეგი იყო საკონსტიტუციოს სამი მოსამართლე — ირინე იმერლიშვილი, გიორგი კვერენჩხილაძე და თეიმურაზ ტუღუში.

გაიგე მეტი: რა დაწერეს მოსამართლეებმა, რომლებმაც პრეზიდენტი კონსტიტუციის დამრღვევად არ ცნეს

• თუმცა, საკონსტიტუციოს გადაწყვეტილების მიუხედავად, საპარლამენტო უმრავლესობამ, ხმების არასაკმარისი რაოდენობის გამო, პრეზიდენტის იმპიჩმენტი ვერ შეძლო.