მოკლედ: პრეზიდენტმა ჯო ბაიდენმა გუშინ განაცხადა, რომ აშშ უპასუხებს იერიშს ამერიკულ ბაზაზე იორდანიაში, სირიის საზღვარზე თავდასხმას.

  • დრონებით განხორციელებულ თავდასხმის შედეგად 3 ამერიკელი ჯარისკაცი დაუღუპა და ათობით დაიჭრა.

დეტალები: ბაიდენის თქმით, შეტევა ირანის მიერ მხარდაჭერილმა შეიარაღებულმა დაჯგუფებებმა განახორციელეს.

  • "მძიმე ღამე იყო შუა აღმოსავლეთში. დავკარგეთ სამი მამაცი ადამიანი, ჩვენს ბაზაზე თავდასხმისას".
  • მცირე პაუზის შემდეგ კი თქვა: "და ჩვენ პასუხს გავცემთ".
  • თავდაცვის მდივანმა, ლოიდ ოსტინმა თქვა, რომ მიმართავენ ყველა საჭირო ზომას და მოქმედებას, რომ დაიცვან აშშ, "ქვეყნის ჯარი და ინტერესები".

რას პასუხობს ირანი: ირანის საგარეო საქმეთა სამინისტრომ აშშ-ის ბრალდება უარყო. ამბობენ, რომ თავდასხმის უკან თეირანი არ დგას.

  • სახელმწიფო საინფორმაციო სააგენტო IRNA აქვეყნებს საგარეო უწყების სპიკერის, ნასერ ქანაანის კომენტარს, რომ "ირანის ისლამურ რესპუბლიკას არანაირი როლი არ აქვს წინააღმდეგობის დაჯგუფებების გადაწყვეტილებებში, თუ რა სახით დაუჭერენ მხარს პალესტინელ ერს, ან როგორ დაიცავენ საკუთარ ხალხს".
  • ქანაანის თქმითვე, აკვირდება მოვლენების განვითარებას რეგიონში და ხაზს უსვამს, რომ "ირანის წინააღმდეგ პროვოკაციული ბრალდებების შედეგებზე პასუხისმგებლობა ეკისრება მათ, ვინც უსაფუძვლო ბრალდებებს წამოაყენებს“.

როგორია იორდანიის პოზიცია: იორდანიის სახელმწიფო საინფორმაციო სააგენტო პეტრაზე გამოქვეყნებულ განცხადებაში ნათქვამია, რომ ქვეყანამ "დაგმო ტერორისტული თავდასხმა“, რომლის სამიზნე იყო აშშ-ის ჯარები. აქვე აღნიშნულია, რომ თავდასხმას იორდანიელი ჯარისკაცები არ დაუზიანებია.


  • "იორდანია გააგრძელებს ტერორიზმის, ნარკოტიკების და იარაღის კონტრაბანდის წინააღმდეგ ბრძოლას, რომელიც სირიის საზღვრის გავლით შედის იორდანიაში და მტკიცედ დაუპირისპირდება ყველას, ვინც სამეფოს უსაფრთხოებაზე თავდასხმას შეეცდება“, - ნათქვამია მთავრობის სპიკერს მუჰანად მუბაიდინის განცხადებაში.

რა რეაქციებია აშშ-ს პოლიტიკურ წრეებში: რესპუბლიკელი კონგრესმენები ამბობენ, რომ ადმინისტრაციის მიდგომამ აშშ-ის მოწინააღმდეგეები რეგიონში ვერ შეაჩერა.

  • ”ჩვენ გვჭირდება ახლო აღმოსავლეთის პოლიტიკის მნიშვნელოვანი გადატვირთვა, რათა დავიცვათ ჩვენი ეროვნული უსაფრთხოების ინტერესები”, — თქვა რესპუბლიკელმა დეპუტატმა მაიკლ მაკკოლმა.
  • სენატორმა ლინდსი გრეჰემმა კი მოუწოდა ადმინისტრაციას, დაერტყათ მნიშვნელოვანი სამიზნეებისთვის ირანის ტერიტორიაზე, "არა მხოლოდ ჩვენი ჯარისკაცების მკვლელობის საპასუხოდ, არამედ მომავალი აგრესიის შესაკავებლადაც. ერთადერთი, რისიც ირანის რეჟიმს ესმის, არის ძალა".

რა ვიცით თავდასხმაზე: აშშ-ის ცენტრალურმა სარდლობამ განაცხადა, რომ სულ მცირე 34 ჯარისკაცი დაშავდა თავდასხმის დროს, რვამ კი იორდანია მკურნალობის მიზნით დატოვა. მათი მდგომარეობა სტაბილურია.

  • დიდმა დრონმა იორდანიაში ლოგისტიკური მხარდაჭერის ბაზას დაარტყა, რომელიც ცნობილია სახელით Tower 22.
Tower 22

Tower 22

ფოტო: Planet Labs PBC via AP

  • ცენტრალური სარდლობის ინფორმაციით, ბაზაზე, დაახლოებით, 350 ამერიკელი ჯარისკაცი და საავიაციო ძალების წარმომადგენელი იმყოფებოდა.
  • აშშ-ის თავდაცვის მდივნის, ოსტინის თქმით, ჯარი აქ "ისლამური სახელმწიფოს დასამარცხებლად არის განთავსებული".
  • აშშ-ის ჯარები იორდანიას — სამეფოს, რომელიც ესაზღვრება ერაყს, ისრაელს, დასავლეთ სანაპიროს პალესტინის ტერიტორიას, საუდის არაბეთსა და სირიას, დიდი ხანია იყენებს, როგორც საყრდენ პუნქტს. ქვეყანაში, დაახლოებით 3000 ამერიკელი ჯარისკაცია დისლოცირებული.
  • 7 ოქტომბრის შემდეგ, რაც ჰამასისა და ისრაელის ომი დაიწყო, ირანის მიერ მხარდაჭერილი დაჯგუფებები ამერიკის ბაზებს ერაყში 60-ზე მეტჯერ დაესხნენ, სირიაში კი — 90-ზე მეტჯერ. ისინი თავდასხმებს ახორციელებენ დრონებით, რაკეტებით და ბალისტიკური რაკეტებით. გუშინ განხორციელებული თავდასხმა პირველი იყო იორდანიის ტერიტორიაზე.
  • შეიარაღებულები ამბობენ, რომ მათი დარტყმები ვაშინგტონის მიერ ისრაელისთვის გამოცხადებული მხარდაჭერის პასუხია და ეს თავდასხმები მიზნად ისახავს რეგიონიდან აშშ-ის ძალების გაყვანას.

ბოლო ხაზი: ირანისგან მხარდაჭერილმა შეიარაღებულმა დაჯგუფებებმა, აღმოსავლეთ სირიაში, ევაკუაცია დაიწყეს. ისინი შიშობენ, რომ აშშ ავიადარტყმებს განახორციელებს.