ოცნების ხელისუფლების განათლების, მეცნიერებისა და ახალგაზრდობის მინისტრი გივი მიქანაძე 24-26 ივლისს ოფიციალური ვიზიტით აზერბაიჯანის რესპუბლიკას ეწვევა. ინფორმაციას განათლების უწყება ავრცელებს.

მათი ცნობით, ვიზიტის ფარგლებში, ქალაქ ბაქოში დაგეგმილია გივი მიქანაძის პირისპირ შეხვედრები აზერბაიჯანის რესპუბლიკის პრემიერმინისტრ ალი ასადოვთან, აზერბაიჯანის რესპუბლიკის ახალგაზრდობისა და სპორტის მინისტრ ფარიდ გაიბოვთან და აზერბაიჯანის რესპუბლიკის განათლებისა და მეცნიერების მინისტრ ემინ ამურლაევთან.

ოფიციალური ვიზიტისას გივი მიქანაძე საქართველო-აზერბაიჯანის ახალგაზრდული ფორუმის გახსნის ცერემონიაში მიიღებს მონაწილეობას. ასევე, ქალაქ ყუბას ოლიმპიურ-სპორტულ კომპლექსში, ყუბის აღმასრულებელი ხელისუფლების ხელმძღვანელ ილგარ მაჰმუდოვთან ერთად, გივი მიქანაძე ქართულ-აზერბაიჯანული ბანაკის ახალგაზრდებს შეხვდება, — ნათქვამია გავრცელებულ ინფორმაციაში.

შეგახსენებთ, რომ საქართველოში ოფიციალური ვიზიტით იმყოფება აზერბაიჯანის საგარეო საქმეთა მინისტრი, ჯეიჰუნ ბაირამოვი. მან შეხვედრები გამართა ოცნების ხელისუფლების საგარეო საქმეთა მინისტრ მაკა ბოჭორიშვილთან, ოცნების დანიშნულ პრეზიდენტ მიხეილ ყაველაშვილთან. გავრცელებული ინფორმაციით, ის ოცნების პრემიერ ირაკლი კობახიძესა და ოცნების პარლამენტის თავმჯდომარეს შალვა პაპუაშვილსაც შეხვდება.