საახალწლოს სუფრა, ნათესავებისა და მეგობრების შეკრება, დალევა, გართობა, საჩუქრები და დასვენება — ახალი წლის დღეებმა თვალის დახამხამებაში ჩაიარა და სკოლას, უნივერსიტეტსა თუ სამსახურებს დავუბრუნდით.

მართალია, 2024-ში სამი თვის წინ შემოვაბიჯეთ, თუმცა...

არა, მოიცა. 2024 წლის დადგომიდან სამი თვე არ გასულა.

ერთი თვეც კი არ გასულა.

ჯერ. კიდევ. იანვარია.

თუ ამ ინფორმაციით შენც გაოგნებული ხარ, ვერაფრით დაგამშვიდებთ. მხოლოდ ის შეგვიძლია, იანვარივით უსასრულო მოვლენების სია ჩამოგიწიკწიკოთ.

მაშ ასე, რა არის იანვარივით ხანგრძლივი და დაუსრულებელი?

1. წერეთლის გამზირის რეაბილიტაცია

ფოტო: Giphy

ისეთი შეგრძნება გვაქვს, რომ წერეთლის გამზირის რეაბილიტაცია პრეისტორიულ ხანაში დაიწყო. ნეტავ, როდის დადგება დღე, როცა წერეთელზე გადაადგილება მორდორისკენ მიმავალ გზას აღარ მოგვაგონებს?

2. ხალხის ნაკადი სადგურის მოედანზე

ფოტო: Giphy

თუ პიკის საათში (რომელიც უკვე ნებისმიერი საათია) სადგურის მოედანზე აღმოჩნდები და ერთი ხაზიდან მეორე ხაზზე გადასვლას ჟანგბადის, რომელიმე კიდურისა და მოთმინების დაკარგვის გარეშე მოახერხებ, სუპერგმირობამდე ბევრი არაფერი გიკლია.

3. იმ ორშაბათების რაოდენობა, რომლიდანაც ვარჯიშსა და სწორ კვებას ვიწყებთ

ფოტო: Giphy

აი, იანვარი დასრულდეს და დავიწყებთ...

4. ქართული კომენტარები უცხოენოვან პოსტზე, რომელშიც საქართველოა ნახსენები

ფოტო: Giphy

სოციალურ ქსელებს მომხმარებლებისთვის სპეციალური გაფრთხილება უნდა ჰქონდეთ იმის შესახებ, რომ საქართველოზე დაწერილ ერთ პოსტზე საშუალოდ 10 000 ქართული კომენტარი მოდის.

5. გრეის ანატომია

ფოტო: Giphy

შენი ბრალი არაა თუ არ გახსოვს, რომელ წელს გამოვიდა გრეის ანატომიის პირველი ეპიზოდი, რადგან მაგ დროს შეიძლება დაბადებული არც იყავი. იმედი გვაქვს, სერიალის დასასრულს ჩვენი შვილთაშვილები მაინც მოესწრებიან.

6. კინოთეატრის რეკლამები ფილმის დაწყებამდე

ფოტო: Giphy

ყველაზე ცუდი ისაა, რომ პოპკორნს ამ რეკლამების ყურების დროს მთლიანად ვჭამთ...

7. ხელფასამდე დარჩენილი ბოლო კვირა

ფოტო: Giphy

ყველა გაუთვალისწინებელი ხარჯიც რომ ზუსტად მაგ კვირაში უნდა გამოხტეს?!

8. თაროზე შემოწყობილი წაუკითხავი წიგნები

ფოტო: Giphy

3 წლის წინ წიგნების ფესტივალზე ნაყიდი წიგნები თუ ისევ გადაუშლელი გიწყვია თაროზე, მარტო არ ხარ...

9. კონცერტზე მყოფი ადამიანების "სთორები" ინსტაგრამსა და ფეისბუქზე

ფოტო: Giphy

კარგად არაფერი ჩანს, ყველა (ასობით) ვიდეო ერთმანეთს ჰგავს და გადამღები გამაყრუებელი ხმით ყროყინებს. თან თუ კონცერტზე რამდენიმე ადამიანი იყო, ყველაფრის თავიდან ყურება მოგიწევს...

10. ქვიზების წერისას ჩვენი ჟურნალისტების ფანტაზია

ფოტო: Giphy

როცა გგონია, რომ ჩვენი ქვიზებით ვეღარ გაგაოცებთ, ყოველთვის ცდები. ჩვენთან გაიგებ, ოლივიეს რომელი ინგრედიენტი ხარ, გადაურჩებოდი თუ არა ზომბი აპოკალიფსს, რომელი ქართველი მეფე ხარ და ლობიანი ხარ თუ ხაჭაპური. თუმცა ეს იმ ეგზისტენციალური კითხვების მხოლოდ მცირე ჩამონათვალია, რომლებზეც პასუხს მომავალში ჩვენთან იპოვი.