Tbilsi Pride-მა ერთი კვირის წინ დააანონსა, რომ 29 დეკემბერს, The Drag Ball-ის წლის ბოლო ღონისძიებაზე, მოწვეული სტუმარი ნანი ბრეგვაძე იქნებოდა. გუშინ The Drag Ball-ის სოციალურ ქსელში ორგანიზაციამ გაავრცელა განცხადება, რომ ჯანმრთელობის მდგომარეობის გამო, მომღერალი ღონისძიებაზე დასწრებას ვეღარ შეძლებდა.

"სტუმრებისთვის სამწუხარო სიახლე გვაქვს — ჯანმრთელობის პრობლემების გამო, ქალბატონი ნანი ბრეგვაძე ვეღარ გახსნის ღონისძიებას. გვინდა უღრმესი მადლობა გადავუხადოთ და მალე გამოჯანმრთელება ვუსურვოთ ქალბატონ ნანის, რომელიც ამ პერიოდის განმავლობაში მთელი გულით ემზადებოდა ჩვენთან შესახვედრად", — წერია განცხადებაში.

Tbilisi Pride-ის გუნდის თქმით, მომღერლის მხარდაჭერას ღონისძიების დაგეგმვის თითოეულ ეტაპზე გრძნობდნენ. ისინი ამბობენ, რომ ყველაფრის მიუხედავად, The Drag Ball: All Stars ჩვეულებრივ ჩატარდება.

ორგანიზაციის ღონისძიებების სერია უკვე ბევრმა ცნობილმა სახემ გახსნა, მათ შორის, ნიკოლოზ რაჭველმა, გიული ჩოხელმა, ლელა წურწუმიამ, სტეფანემ, ნინო ქათამაძემ და სხვებმა.