გერმანიაში, საქსონია-ანჰალტის მხარის ქალაქ ტანგერჰიუტეში, ერთ-ერთი საბავშვო ბაღისთვის სახელის შეცვლა მოითხოვეს. საბავშვო ბაღი 1970-იანი წლებიდან დღემდე ანა ფრანკის სახელს ატარებს. მოთხოვნას, რომელიც ბოლო დღეების განმავლობაში გერმანული პრესის ყურადღების ცენტრში აღმოჩნდა, მწვავე კრიტიკა მოჰყვა პოლიტიკოსებისა და ორგანიზაციების მხრიდან.

ადგილობრივი გამოცემა Volksstimme-ის ცნობით, მოთხოვნა მშობლებსა და საბავშვო ბაღის აღმზრდელებში გაჩნდა. ისინი ითხოვენ, დაწესებულებას უფრო "ბავშვური" სახელი, "სამყაროს მკვლევრები" ეწოდოს. გამოცემა საბავშვო ბაღის ხელმძღვანელობის განცხადებას ციტირებს და წერს, რომ "ანა ფრანკის ისტორია ბავშვებისთვის რთულად გასაგებია, იმიგრანტ მშობლებს კი ხშირად ამის ახსნა უჭირთ". როგორც Volksstimme იტყობინება, დაწესებულების დირექტორს ბაღისთვის "აპოლიტიკური სახელის" დარქმევა სურს.

"პოლიტიკური სახელი", როგორც ჩანს, ანა ფრანკს, ნაცისტური რეჟიმის 15 წლის მსხვერპლ გოგოს ეკუთვნის. რადგან გერმანიაში დღეს ბევრს საუბრობენ ანტისემიტიზმის კვლავ გაღვივების საფრთხეზე, გავრცელებულ ცნობას საზოგადოებაში დიდი რეზონანსი მოჰყვა.

აუშვიცის საერთაშორისო კომიტეტის აღმასრულებელი ვიცე-პრეზიდენტი კრისტოფ ჰოიბნერი ამბავს ღია წერილით გამოეხმაურა და აღნიშნა, რომ დაწესებულება "ანა ფრანკის სახელს გამიზნულად აქცევს ზურგს".

"როცა ანტისემიტიზმისა და ულტრამემარჯვენე ექსტრემიზმის გაღვივების ფონზე, ადამიანები მზად არიან, აუღელვებლად წაშალონ საკუთარი ისტორია და ანა ფრანკის სახელს უკვე საჯარო სივრცისთვის მიუღებლად მიიჩნევენ, ეს განგაშის ზარების შემოკვრის საფუძველია", — აცხადებს ჰოიბნერი, — "ეს გაფრთხილებაა, თუ რა ბედი ელის ჩვენს ქვეყანაში წარსულის ხსოვნის კულტურას".

კრიტიკის შემდეგ, ტანგერჰიუტეს მერიამ განაცხადა, რომ გადაწყვეტილება ჯერ მიღებული არაა. თუმცა, საქსონია-ანჰალტის სახელმწიფო მინისტრმა სვენ შულცემ უკვე განაცხადა, რომ ქალაქის საკრებულოში მისი პარტიის, ქრისტიან-დემოკრატიული გაერთიანების, წევრები საბავშვო ბაღისთვის სახელის ცვლილებას მხარს არ დაუჭერენ. საკრებულოს თავმჯდომარის ცნობით, ისიც და სხვა წევრებიც ამავე აზრს იზიარებენ.

ანა ფრანკი გერმანიაში დაბადებული ებრაელი გოგო იყო, რომელიც მეორე მსოფლიო ომის პერიოდში ნაცისტურ რეჟიმს ნიდერლანდებში გაექცა. ამსტერდამში ანა და მისი ოჯახი ორ წელზე მეტი ხნის განმავლობაში იმალებოდნენ. თუმცა, საბოლოოდ, პოლიციამ მათ სამალავს მიაგნო და მისი ყველა ბინადარი საკონცენტრაციო ბანაკებში გაგზავნა. ბანაკებს ფრანკების ოჯახიდან მხოლოდ ანას მამა, ოტო, გადაურჩა. 15 წლის ანა ფრანკი კი ომის დამთავრებამდე რამდენიმე კვირით ადრე, ბერგენ-ბელზენის საკონცენტრაციო ბანაკში გარდაიცვალა.

ომის დასრულების შემდეგ, ოტო ფრანკმა ანას დღიურები გამოსცა, რომელსაც გოგო სამალავში წერდა. მას შემდეგ ანა ფრანკის დღიური ერთ-ერთი ყველაზე პოპულარული წიგნი და ნაცისტური რეჟიმის სისასტიკის ისტორიული მტკიცებულება გახდა.

• ანა ფრანკი — დღიურის გოგოს ნამდვილი ამბავი
• "არ იცოდა, რომ კვდებოდა" — ამბავი ქალისა, რომელმაც მომაკვდავი ანა ფრანკი ნახა

გერმანიაში კი დღეს ულტრამემარჯვენე ძალების კვლავ გააქტიურების საფრთხეს ბევრი უსვამს ხაზს — განსაკუთრებით, ისრაელი-ჰამასის ომის ფონზე. რამდენიმე კვირის წინ ასევე გავრცელდა ცნობა, რომ უცნობმა პირებმა ბერლინში მცხოვრები ებრაელი მოქალაქეების სახლებზე დავითის ვარსკვლავები გამოსახეს.