ევროკომისიამ საქართველოს შესახებ 2023 წლის ანგარიშის ძირითადი მიგნებები გამოაქვეყნა, რომელშიც აღნიშნულია, რომ "კვლავ მოუგვარებელია მარეგულირებელი კომისიის ეფექტური დამოუკიდებლობა".

  • "საქართველომ განაგრძო კანონმდებლობის შესაბამისობა აუდიო-ვიზუალური მედია სერვისების დირექტივის (AVMSD) ძირითად პრინციპებთან და ოქტომბერში მიიღო შესაბამისი ცვლილებები მაუწყებლობის შესახებ კანონში.
  • ეროვნული მარეგულირებლის, კომუნიკაციების კომისიის ეფექტური დამოუკიდებლობა კვლავ მოუგვარებელია", — წერია დოკუმენტში.

რა არის კონტექსტი: საქმე ეხება პარტია ქართული ოცნების მიერ ინიციირებულ ცვლილებებს კანონში მაუწყებლობის შესახებ, რომელიც პარლამენტმა 19 ოქტომბერს, მესამე მოსმენით დაამტკიცა და არასამთავრობო სექტორის მოწოდების მიუხედავად, პრეზიდენტმა მას ვეტო არ დაადო.

  • არსებითად, ამით სახელმწიფომ გაზარდა მედიაზე რეგულირების არეალი, რადგან ცვლილებების ამოქმედების შემდეგ, კომუნიკაციის მარეგულირებელ კომისიას მედიაპროდუქტის შინაარსის განხილვაც შეძლება, რაც აქამდე თვითრეგულირების საკითხი იყო და არ ექვემდებარებოდა სახელმწიფო რეგულაციას.
  • პრობლემაა, რომ: "საკანონმდებლო ცვლილება მარეგულირებლის ხელში დამატებითი ძალაუფლების კონცენტრაციას ზრდის, ისევე, როგორც მისი ბოროტად გამოყენების რისკს", — აცხადებენ მედიის საკითხებზე მომუშავე ორგანიზაციები.

ვინ მართავს მარეგულირებელ კომისიას.

კახა ბექაური.

  • ის მესამე ვადით აირჩიეს წელს, 2026 წლამდე.
  • კონკურსში მონაწილეობდა ერთადერთი კანდიდატი — კახა ბექაური.
  • "მაუწყებლობის შესახებ" კანონის 2019 წლამდე არსებული რედაქცია კრძალავდა ერთი და იმავე პირის ერთზე მეტი ვადით არჩევას, მაგრამ პარლამენტმა კანონი შეცვალა.
  • ბექაური მარეგულირებელ კომისიას ხელმძღვანელობს 2017 წლიდან.

ევროკომისიის დასკვნაში, ასევე, აღნიშნულია, რომ:

  • გამოხატვის თავისუფლებასთან დაკავშირებით, საქართველოს აქვს გარკვეული დონის მომზადება და მიღწეულია მცირე პროგრესი.
  • მსოფლიო პრესის თავისუფლების ინდექსში საქართველომ 12 ადგილით გააუმჯობესა პოზიცია.
  • არ არსებობს შეზღუდვები ონლაინ მედია გარემოზე, რომელიც სულ უფრო მრავალფეროვანია.