რა ხდება? "რომეო მიქაუტაძე, პრემიერი ღარიბაშვილის და მერი კალაძის დახმარებით, რუსული მეთოდით ძარცვავს სახელმწიფოსა და ხალხს", — განაცხადა ერთიანი ნაციონალური მოძრაობის პოლიტიკური საბჭოს წევრმა, ლაშა ფარულავამ.

  • ენმ-ის წევრებმა გენერალურ პროკურატურასთან ისაუბრეს ხელისუფლების ელიტური კორუფციის ფაქტებზე.

რას ამბობენ? ეკონომიკის მინისტრის მოადგილემ, რომეო მიქაუტაძემ, რომელიც, ენმ-ის მტკიცებით, "ღარიბაშვილის ძმაკაცია", ზუგდიდში 25-წლიანი იჯარით მიიღო 133 ათას კვადრატულზე მეტი ტერიტორია, მოცვის ბაღების მოსაწყობად.

  • გამოძიების დაწყების მოთხოვნით, ენმ-მ პროკურატურას მიმართა.

  • "რომეო მიქაუტაძე არის ირაკლი ღარიბაშვილის ელიტური კორუფციის ახალი სახე, რომელსაც სახელმწიფო სამსახურში მოსვლისას არაფერი გააჩნდა, ახლა სახელმწიფოსა ძარცვის და ხალხის გაყვლეფის ხარჯზე მდიდრდება და არის მილიონერი. ჩვენ აღნიშნულ კორუფციულ ფაქტებსა და მტკიცებულებებს დავუტოვებთ პროკურატურას დასაარქივებლად, ვინაიდან ესენი არ გამოიძიებენ არაფერს, მაგრამ მალე ხალხი გაასამართლებს ყველა დამნაშავეს, მათ შორის ელიტური კორუფციის მფარველებს პროკურატურაში", — განაცხადა ლაშა ფარულავამ.

დეტალები: ენმ-ის მიხედვით, მიქაუტაძემ, 2022 წლის 20 ივნისს, პრემიერ-მინისტრის მიერ გამოცემული ბრძანებით ისარგებლა და მის სამსახურებრივ დაქვემდებარებაში მყოფი უწყების — სახელმწიფო ქონების ეროვნული სააგენტოს მეშვეობით, პირდაპირი შესყიდვის წესით მიიღო ტერიტორია.

  • საუბარია შპს ,,ბლუბერ ლაბ’’-ზე, რომელმა კომპანიამაც თავდაპირველად მიიღო სახელმწიფო დახმარება 91 000 ლარის ოდენობით.
  • შემდეგ, 2021 წლის 1 ოქტომბერს, შპს-ს მფლობელმა ნინო ქარდავამ აღნიშნულ კომპანიაში ჩუქების წესით 33 % წილი გადასცა რომეო მიქაუტაძეს.