დღეს დილით, დაახლოებით 08:00 საათზე საქართველოში ელექტროენერგიის მიწოდება კვლავ ავარიულად შეწყდა.

სოციალურ ქსელში გავრცელებული ცნობებით, ელექტროენერგია აღარ მიეწოდებათ ბათუმში, რუსთავში, ფოთში, ყვარელში, ქუთაისში, ამბროლაურში, გორში, სიღნაღში და ახმეტაში.

სახელმწიფო ელექტროსისტემის ვებ-გვერდის მონაცემებით სისტემის მიწოდება 1400 მეგავატ საათიდან 360 მეგავატ საათამდე შემცირდა, წერს bm.ge.

"თელმიკოს" ცხელი ხაზის ინფორმაციით, "თბილისში დაფიქსირდა სისტემური გამორთვა. ელექტროენერგია აღდგება გამორთვიდან ერთ საათში".

ამ დროისთვის ელექტროენერგია მიეწოდება თბილისის ნაწილს. რა მდგომარეობაა რეგიონებში ჯერ-ჯერობით უცნობია.

საქართველოს სახელმწიფო ელექტროსისტემას ელექტროენერგიის ავარიულად გათიშვის შესახებ ინფორმაცია ჯერ არ გაუვრცელებია.

ელექტროენერგიის მასშტაბური გათიშვის გამო, მეტროს და რკინიგზის მუშაობაც შეფერხდა.

დღეს დილით ელექტროენერგიის მიწოდება შეწყდა ოკუპირებულ აფხაზეთშიც.

"ოკუპირებული აფხაზეთი ენგურჰესზე მომხდარი სისტემური ავარიის გამო ელექტროენერგიის გარეშე დარჩა.

ელექტროენერგიის მიწოდების აღდგენის პროცესი უკვე დაწყებულია, ინფორმაციას ე.წ. ენერგეტიკის სამინისტრო ავრცელებს", — წერს Apsnypress.

საქართველოში ელექტროენერგიის მიწოდება ავარიულად 24 ივლისს, დაახლოებით 00:10 წუთზეც შეწყდა. საქართველოს სახელმწიფო ელექტროსისტემას გათიშვის მიზეზის შესახებ ოფიციალური ინფორმაცია ამ დრომდე არ გაუვრცელებია. ამის პარალელურად დენი გაითიშა ოკუპირებულ აფხაზეთშიც. დე ფაქტო ხელისუფლების განცხადებით, რეგიონში ელექტროენერგიის გათიშვის მიზეზი "ენგურჰესზე მომხდარი სისტემური ავარია" გახდა.

გუშინ, 24 ივლისის საღამოს სემეკმა საქართველოს ელექტროსისტემაში მომხდარი მასშტაბური ავარიის გამომწვევი მიზეზების შესწავლა დაიწყო.

ინფორმაცია განახლდება.