რა ხდება: "კოალიცია თანასწორობისთვის", რომელიც არასამთავრობო ორგანიზაციებს აერთიანებს, აცხადებს, რომ ომბუდსმენი შრომითი დისკრიმინაციის დავებზე საზიანო პრაქტიკას ამკვიდრებს.

რატომ არის მნიშვნელოვანი: გოგა რაზმაძე შსს-ს მინისტრსა და მისი დეპარტამენტის უფროსს დისკრიმინაციულ მოპყრობაში ედავება. სახალხო დამცველმა კი შეწყვიტა მისი საქმე.

  • როცა მოქალაქე სამინისტროს სისტემას უპირისპირდება და თავად არ შეუძლია მტკიცებულების დამოუკიდებლად მოპოვება, კანონი სწორედ ომბუდსმენს ანიჭებს უფლებამოსილებას, გამოიკითხოს მოწმეები, გამოითხოვოს და შეისწავლოს დამატებითი ინფორმაცია.

ორგანიზაციების არგუმენტები: ომბუდსმენმა, გოგა რაზმაძის საქმეში საკუთარი უფლებამოსილების განხორციელებაზე უარი თქვა და საქმე კანონით დადგენილი ნორმების სრული უგულებელყოფით განიხილა.

  • მსგავსი მიდგომა ასუსტებს საჯარო სამსახურში კორუფციასთან ბრძოლის შესაძლებლობებს;
  • გოგა რაზმაძის საქმეზე სახალხო დამცველის გადაწყვეტილება დაუსაბუთებელი და მიკერძოებულია შსს-ს სასარგებლოდ, რადგან არ ეფუძნება გარემოებების სრულყოფილ გამოკვლევას;
  • მოწმეების გამოკითხვის, სამინისტროსთვის კითხვების დასმისა და დოკუმენტაციის გამოთხოვის გარეშე, ომბუდსმენმა ფაქტობრივად განმცხადებელი დაავალდებულა, თავად მოეპოვებინა მტკიცებულებები;
  • საქმის მსგავსი გადაწყვეტა მტკიცების ტვირთის შებრუნებაა, რაც სრულად ეწინააღმდეგება დისკრიმინაციის საქმეებზე ეროვნული და საერთაშორისო კანონმდებლობითა და პრაქტიკით დადგენილ სტანდარტებს.

რა ვიცით გოგა რაზმაძის შესახებ: ის მენეჯერულ თანამდებობას იკავებს შსს-ში, ადამიანის უფლებათა დაცვისა და გამოძიების ხარისხის მონიტორინგის დეპარტამენტში.

  • რაზმაძემ საჯაროდ ისაუბრა მის მიმართ განხორციელებულ დისკრიმინაციაზე, დამამცირებელ, შეურაცხმყოფელ მოპყრობასა და ახსნა-განმარტების მიცემის იძულებაზე.
  • რაზმაძემ მინისტრის მოადგილეს, ალექსანდრე დარახველიძეს მიმართა, თუმცა მას რეაგირება არ მოუხდენია. სწორედ ამის შემდგომ მიმართა რაზმაძემ სახალხო დამცველს და ითხოვა დისკრიმინაციული მოპყრობის დადგენა.

მეტი: