ცნობილი ამერიკელი მოდელი ბელა ჰადიდი ისრაელი-ჰამასის ომს კონფლიქტის დაწყებიდან თითქმის სამი კვირის შემდეგ ეხმაურება და ამბობს, რომ "ღაზაში შექმნილი ჰუმანიტარული კრიზისი სასწრაფო რეაგირებას საჭიროებს". ინსტაგრამზე გამოქვეყნებულ პოსტში ჰადიდმა "დუმილისთვის" მოიბოდიშა — "რთული და საშინელი ბოლო ორი კვირისთვის შესაფერისი სიტყვები უნდა შემერჩია".

"მეტხანს ვეღარ გავჩუმდები", — წერს მოდელი, — "დუმილი გამოსავალი არაა. პალესტინელ ხალხს და ბავშვებს, განსაკუთრებით ღაზაში, ჩვენი დუმილი ძვირად დაუჯდებათ. ჩვენ არ ვართ მამაცები, ისინი — არიან".

ჰადიდი წერს, რომ გლოვობს ღაზელ "დედებს, რომლებმაც შვილები დაკარგეს" და ისრაელელების ოჯახებს, რომელთაც ქვეყანაზე ჰამასის თავდასხმის შემდეგ "მის შედეგებთან და ტკივილთან" გამკლავება უხდებათ.

"ქვეყნის ისტორიის განურჩევლად, ვგმობ ტერორისტულ თავდასხმებს მშვიდობიან მოსახლეობაზე. ქალებისა და ბავშვებისთვის ზიანის მიყენება სიკეთეს არ მოუტანს მოძრაობას პალესტინის თავისუფლებისთვის", — წერს მოდელი, — "მტკიცედ მწამს, რომ არცერთი ბავშვი, არცერთი ადამიანი არსად არ უნდა გაიტაცონ ოჯახიდან დროებით ან განუსაზღვრელი დროით. ეს თანაბრად ეხება როგორც ისრაელელ, ასევე პალესტინელ ხალხს".

ჰადიდმა განცხადებაში ასევე აღნიშნა, რომ მისი ტელეფონის ნომერი უცხო ადამიანების ხელში აღმოჩნდა, თავად კი ყოველდღიურად ასობით სიკვდილის მუქარას იღებდა.

ბელას მამა, მოჰამედ ჰადიდი, პალესტინელი ემიგრანტია. თავად მოდელი და მისი და კი, ჯიჯი ჰადიდი, წლებია, ღიად უჭერენ მხარს პალესტინას. ამის გამო, როგორც ბელამ აღნიშნა, პირად და საქმიან ურთიერთობებში ბევრი სირთულე შეჰქმნია.

• პალესტინისთვის მხარი ღიად რომ დამეჭირა, პოპულარული ვერ გავხდებოდი — ბელა ჰადიდი
• ნეტავ, მუსლიმურ კულტურაში აღვზრდილიყავი — ბელა ჰადიდი

პროპალესტინური მოძრაობის თანადგომის გამო ჰადიდი ისრაელმა "ებრაული სახელმწიფოს გაქრობის" მხარდაჭერაშიც დაადანაშაულა.

ბოლო ნახევარი საუკუნის განმავლობაში ისრაელზე ყველაზე მასშტაბური თავდასხმა ჰამასმა 7 ოქტომბრის დილას მიიტანა. დაჯგუფებამ, რომელსაც მსოფლიოს არაერთი ქვეყანა და ორგანიზაცია, მათ შორის ევროკავშირი და აშშ, ტერორისტულ ორგანიზაციად მიიჩნევს, ათასზე მეტი მშვიდობიანი მოქალაქე დახოცა, ასობით კი — მძევლად აიყვანა.

თავდასხმის საპასუხოდ, ისრაელმა სამხედრო მობილიზაცია და საომარი მდგომარეობა გამოაცხადა. ქვეყნის პრემიერმინისტრმა ბენიამინ ნეთანიაჰუმ ისრაელის მოქალაქეებს წესრიგის დაცვისკენ მოუწოდა და პირობა დადო, რომ ქვეყანა "ამ ომში გაიმარჯვებს". ღაზის სექტორის ჯანდაცვის სამინისტროს ინფორმაციით კი, 7 ოქტომბრის თავდასხმის შემდეგ, ისრაელის ავიადარტყმების შედეგად, რეგიონში 5 700-ზე მეტი ადამიანი დაიღუპა. ამასთან, თუკი მანამდე ღაზის ელექტრომომარაგებას ისრაელი უზრუნველყოფდა, თავდასხმის შემდეგ მან რეგიონი სრულ ალყაში მოაქცია და, გამშვები პუნქტების ჩაკეტვასთან ერთად, ღაზას ელექტრომომარაგებაც შეუწყვიტა. საერთაშორისო ორგანიზაციების მტკიცებით, საავადმყოფოებს ღაზაში საწვავის მარაგი ეწურებათ, რაც უამრავი ადამიანის სიცოცხლეს რისკის ქვეშ აყენებს. ჰუმანიტარულ ტვირთთან ერთად, ღაზის სექტორში არც საწვავი არ შესულა.

• ომი ახლა იწყება — ისრაელის თავდაცვის მინისტრი

ჰამასის თავდასხმის შემდეგ, ისრაელს სოლიდარობა და მხარდაჭერა გამოუცხადეს მსოფლიო ლიდერებმა, მათ შორის, ევროკომისიის პრეზიდენტმა ურსულა ფონ დერ ლაიენმა, ევროპული საბჭოს პრეზიდენტმა შარლ მიშელმა, უკრაინის პრეზიდენტმა ვოლოდიმირ ზელენსკიმ, გაერთიანებული სამეფოს პრემიერმინისტრმა რიში სუნაკმა და აშშ-ის პრეზიდენტმა ჯო ბაიდენმა.