დონალდ ტრამპის და ვლადიმერ პუტინის პირველი, ისტორიული შეხვედრა, 7 ივლისს, ტრამპის გაპრეზიდენტებიდან 168-ე დღეს შედგება. ამ დროისთვის ტრამპი უკვე შეხვდა თითქმის ყველა დიდი სახელმწიფოს მეთაურს, მათ შორის, ტერეზა მეის, შინძო აბეს, ანგელა მერკელს, საფრანგეთის ახლადარჩეულ პრეზიდენტ ემანუელ მაკრონს, რეჯეპ ტაიპ ერდოღანს, პეტრო პოროშენკოს. აშშ-ს პრეზიდენტი ასევე იმყოფებოდა ახლო აღმოსავლეთში.

ტრამპის წინასაარჩევნო პროგრამის ერთ-ერთი პუნქტი სწორედ რუსეთთან ურთიერთობების დალაგებას წარმოადგენდა. "თუ კი მე გავხდები პრეზიდენტი, ჩვენ რუსეთთან შესანიშნავი ურთიერთობები გვექნება", - ამბობდა ტრამპი.

წინასაარჩევნო კამპანიის დროს ტრამპმაც და პუტინმაც არაერთხელ დაადასტურეს ურთიერთსიმპათიები თუმცა, ტრამპის გამარჯვების შემდეგ, რიგი მიზეზების გამო, ვერ მოხდა საერთაშორისო დაძაბულობის განმუხტვა. აშშ-ში ახლაც მიმდინარეობს მასშტაბური გამოძიება რუსეთისა და ტრამპის წინასაარჩევნო შტაბის უკანონო თანამშრომლობის შესახებ, თავად ტრამპი გამოძიებას "კუდიანებზე ნადირობას" უწოდებს.

თითქმის ექვსთვიანი პრეზიდენტობის განმავლობაში, ტრამპის ირგვლივ არაერთი სკანდალი აგორდა, მათ შორის, ტრამპმა თანამდებობიდან გაათავისუფლა გამოძიების ფედერალური ბიუროს შეფი ჯეიმს კომი, ასევე, სენატის მიერ დაბლოკილი იქნა მისი საკანონმდებლო ინიციატივები. ტრამპის რეიტინგი კი პერიოდულად იკლებს

მოლოდინები ტრამპი-პუტინის შეხვედრაზე

ვლადიმერ პუტინისა და ტრამპის შეხვედრა G20-ის სამიტზე, ჰამბურგში შედგება. შეხვედრის ფორმატის ოფიციალურ გამოცხადებამდე კრემლი ხაზს უსვამდა, რომ ფორმატს პრინციპული მნიშვნელობა არ აქვს თუმცა, პუტინის პრესსპიკერის, პესკოვის განცხადებით, 7 ივლისს გაიმართება სრულყოფილი, "მჯდომარე" შეხვედრა დიპლომატიური პროტოკოლის დაცვით.

რამდენ ხანს გაგრძელდება შეხვედრა, ჯერჯერობით, უცნობია. პესკოვმა BBC-სთან საუბარში განაცხადა, რომ პირველი შეხვედრა ყველაზე მნიშვნელოვანი იქნება კონფლიქტებისა და წინააღმდეგობების დაძლევის გზაზე. კრემლის მოლოდინია, რომ სწორედ ამ შეხვედრიდან დაიწყება ურთიერთობების სტაბილიზაციის პროცესი, რომელიც 2014 წლიდან განუხრელად უარესდებოდა.

ბოლო თვეების განმავლობაში, მთავარი წინააღმდეგობა აშშ-ს საპრეზიდენტო არჩევნებში რუსეთის შესაძლო ჩარევა და ამ საქმის ირგვლივ აშშ-ში მიმდინარე გამოძიება იყო. ამერიკული მედიის ინფორმაციით, სწორედ ეს იქნება ერთ-ერთ- მნიშვნელოვანი საკითხი. საუბარი ასევე შეეხება სირიისა და უკრაინის კონფლიქტებს, ბირთვული განიარაღებისა და სტრატეგიული სტაბილურობის საკითხს, ლიდერები ასევე განიხილავენ ჩრდილო კორეის თემას. არცერთ ამ საკითხთან დაკავშირებით აშშ სა და რუსეთის პოზიციები ერთმანეთს არ ემთხვევა, გამონაკლისს მხოლოდ ტერორისტული დაჯგუფება ისლამური სახელმწიფოს პრობლემა წარმოადგენს.

Foreign Policy-ის ცნობით, აშშ მზადაა, რუსეთს დაუთმოს ლიდერის პოზიცია სირიის შიდაპოლიტიკურ კრიზისის მოგვარების საკითხში და აშშ-ს მთავარ ამოცანას სირიაში დაეშთან ბრძოლა წარმოადგენს. მაისში იგივე განაცხადა სახელმწიფო მდივანმა რექს ტილერსონმა. მოსალოდნელია, რომ რუსეთი წამოწევს მინსკის ხელშეკრულების უალტერნატივობის საკითხს, რაც უკრაინის აღმოსავლეთში მიმდინარე საომარ ოპერაციებს ეხება. თუმცა, იგივე რექს ტილერსონის განცხადებით, ამერიკას არ სურს, თავი შეიზღუდოს მინსკის შეთანხმებით და შესაძლოა, კონფლიქტის დარეგულირების გზები ამ შეთანხმების მიღმა მოიძებნოს.

ერთ-ერთი ყველაზე მწვავე და მნიშვნელოვანი პრობლემა, განსახილველ საკითხთა რიცხვში, რუსეთის მიმართ ამერიკული სანქციები იქნება. წინა თვეში სენატმა დაამტკიცა ახალი სანქციების სია რუსეთისა და ირანის წინააღმდეგ, ასევე, ტრამპის ადმინისტრაციამ გააფართოვა პერსონალური სანქციებისა ფიზიკური პირებისა და კერძო ორგანიზაციების წინააღმდეგ.

ჯამში, მედია და პოლიტიკური მიმომხილველები პუტინისა და ტრამპის შეხვედრიდან გარღვევებს არ მოელიან თუმცა, შეხვედრა ძალზე საინტერესო და მნიშვნელოვანი იქნება მომავალი ურთიერთობისთვის.