23 წლის ჰერშ გოლდბერგ-პოლინი ერთ-ერთია იმ ასობით ახალგაზრდიდან, რომელიც რამდენიმე დღის წინ, ისრაელის სამხრეთით გამართულ ნოვას მუსიკალურ ფესტივალს ესწრებოდა. ღონისძიება, რომელიც ღაზის სექტორის მახლობლად, რე'იმის კიბუცში (ისრაელური დასახლების ტიპი) ტარდებოდა, 7 ოქტომბრის დილას ჰამასის თავდასხმის ერთ-ერთ პირველ სამიზნედ იქცა. ფესტივალის ზოგიერთმა სტუმარმა გაქცევა მოახერხა, მაგრამ ჰამასმა ნაწილი მძევლად აიყვანა, ნაწილი კი — დახოცა. ოფიციალური ცნობებით, ღონისძიების ტერიტორიაზე, სულ მცირე, 260 ადამიანის ცხედარია ნაპოვნი.

სავარაუდოდ, გადარჩენილ მძევლებს შორისაა მუსიკალური ფესტივალებისა და მოგზაურობის მოყვარული ჰერშიც. წარმოშობით ებრაელი, მაგრამ აშშ-ში დაბადებული ახალგაზრდა მშობლებს ბოლოს შაბათ გამთენიისას დაუკავშირდა. რეიჩელ გოლდბერგის თქმით, შვილმა ერთიმეორის მიყოლებით მისწერა მესიჯები: "მიყვარხარ" და "ვწუხვარ". გოლდბერგმა მაშინვე სცადა დარეკვა, თუმცა, ჰერშს არც ზარებისა და არც მესიჯებისთვის აღარ უპასუხია. ნაშუადღევს პოლიციამ მშობლებს აცნობა, რომ ბიჭის მობილურის სიგნალი ღაზის სექტორის საზღვართან დაფიქსირდა.

ამის შემდეგ, გოლდბერგისა და მისი ქმრისთვის, ჯონათან პოლინისთვის, შვილის თავს გადამხდარი ამბავიც გახდა ცნობილი. გოგო, რომელიც თავდასხმის შემდეგ ბუნკერში ჰერშთან ერთად აღმოჩნდა, ჰყვება, რომ ბიჭი თავშესაფარში შეყრილი ყუმბარების გარეთ გატყორცნას ცდილობდა. სწორედ ამ დროს დაკარგა მან ხელი.

"ვიცით, რომ მძიმედ დაშავდა", — ამბობს გოლდბერგი, — "მაისურით სახელდახელო ტურნიკეტი დაუმზადებია. თუმცა, მერე ტერორისტები შევიდნენ და ყველას, ვისაც სიარული შეეძლო, გაყოლა აიძულეს".

თვითმხილველი გოგოს ცნობით, ფეხზე წამომდგარ ჰერშს ცნობიერება არ დაუკარგავს და მეტიც, სიმშვიდეს ინარჩუნებდა. ამის მიუხედავად, იგი ჰამასის მძევლებს შორის აღმოჩნდა.

გოლდბერგ-პოლინების ოჯახი

ახალგაზრდის მშობლებმა შვილის შესახებ მეტი არაფერი იციან. ისინი აშშ-ის მთავრობასა და მსოფლიო ლიდერებს მძევლების დახსნისკენ მოუწოდებენ. მათ სჯერათ, რომ ჰერში ცოცხალია — ჯონათანი ინტერვიუს დროს მკაცრად უსწორებს ჟურნალისტს, როცა ეს უკანასკნელი ბიჭს წარსულში მოიხსენიებს.

რა ხდება ისრაელში

7 ოქტომბერს, გამთენიისას, ღაზის სექტორიდან ისრაელის მიმართულებით რამდენიმე სარაკეტო თავდასხმა განხორციელდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო, რომელსაც არაერთი ქვეყანა თუ გაერთიანება, მათ შორის ევროკავშირი და აშშ, ტერორისტულ ორგანიზაციად მიიჩნევს. მოულოდნელი შეტევა ბოლო ნახევარი საუკუნის განმავლობაში ისრაელზე ყველაზე მასშტაბური თავდასხმა იყო, მის სამიზნედ კი მშვიდობიანი ადამიანებიც იქცნენ. ადგილობრივი მედიის ცნობით, თავდასხმას ისრაელში, სულ მცირე, ათასი ადამიანის სიცოცხლე ემსხვერპლა.

თავდასხმის საპასუხოდ, ისრაელმა სამხედრო მობილიზაცია და საომარი მდგომარეობა გამოაცხადა. ქვეყნის პრემიერმინისტრმა ბენიამინ ნეთანიაჰუმ ისრაელის მოქალაქეებს წესრიგის დაცვისკენ მოუწოდა და პირობა დადო, რომ ქვეყანა "ამ ომში გაიმარჯვებს". ისრაელს სოლიდარობა და მხარდაჭერა გამოუცხადეს მსოფლიო ლიდერებმაც, მათ შორის, ევროკომისიის პრეზიდენტმა ურსულა ფონ დერ ლაიენმა, ევროპული საბჭოს პრეზიდენტმა შარლ მიშელმა, უკრაინის პრეზიდენტმა ვოლოდიმირ ზელენსკიმ, გაერთიანებული სამეფოს პრემიერმინისტრმა რიში სუნაკმა და აშშ-ის პრეზიდენტმა ჯო ბაიდენმა.