საქართველოს ბანკისა და ინოვაციებისა და ტექნოლოგიების სააგენტოს თანამშრომლობით, საქართველოში უკვე მეხუთედ იმართება პრესტიჟული საერთაშორისო კომპანიის, 500 Global-ის აქსელერაციის პროგრამა სტარტაპებისთვის — 500 Georgia.

500 Global ვენჩურული საინვესტიციო კომპანიაა და სტარტაპებს ბიზნესის განვითარებასა და ადგილობრივ თუ გლობალურ ბაზრებზე გაფართოებაში ეხმარება. 500 Georgia-ში მონაწილეობით კი სტარტაპები 12-კვირიან ინტენსიურ გადამზადების კურსს მსოფლიო დონის მენტორებთან გადიან და 500 Global-ის საერთაშორისო ქსელის წევრები ხდებიან.

აქსელერაციის პროგრამაში ამჯერად 5 ქვეყნიდან 10 სტარტაპი მოხვდა. ისინი სხვადასხვა ინდუსტრიაში, მათ შორის ფინანსურ, ადამიანური რესურსების მართვის, ჯანდაცვის და სხვა სფეროებში ოპერირებენ.

My AI Inc. ავსტრიაში დაფუძნებული სტარტაპია, რომელიც ბრენდებს მომხმარებლების ლოიალობის გაზრდაში ფინანსური ინფრასტრუქტურის მიწოდებით ეხმარება.

Perkskit აზერბაიჯანული კომპანიაა, რომელიც ადამიანური რესურსების მართვის მიმართულებით მუშაობს. მათ შეამჩნიეს, რომ თანამშრომლების მოტივაციაზე კორპორაციული ბენეფიტები დადებითად მოქმედებს, თუმცა ტრადიციული მიდგომები საკმარისი არაა, ამიტომ შექმნეს ხელსაწყო, რომლითაც კომპანია ბენეფიტებისთვის გამოყოფილ ბიუჯეტს თანამშრომლებზე ანაწილებს, ისინი კი თანხას საკუთარი საჭიროებებისამებრ ხარჯავენ — ირჩევენ სასურველ პროდუქტებსა და სერვისებს.

Awork დასაქმების ქართული აპლიკაციაა, სადაც შესაძლებელია პროფესიონალური CV-ის შედგენა, ვაკანსიების ადგილმდებარეობით ან სხვა ფილტრებით მოძიება და საიტიდან გაუსვლელად CV-ის გაგზავნა. აპლიკაცია სამსახურის მაძიებლებს კარიერულ კონსულტაციასაც სთავაზობს, ბიზნესებს კი შესაძლებლობას აძლევს, ბიზნეს პროფილის მეშვეობით HR პროცესები ციფრულად მართონ.

UniSub ქართული სტარტაპია, რომლის დახმარებით ბიზნესები რეგულარულ გამოწერებსა (Subscriptions) და გადახდებს კრიპტოვალუტაში მიიღებენ. პლატფორმის დახმარებით ამის გაკეთება სამ წუთშია შესაძლებელი. ბიზნესები პლატფორმას უკავშირებენ კრიპტო საფულეს, ქმნიან ე.წ. ვიჯეტს და ათავსებენ ვებსაიტზე, შემდეგ კი ციფრულად მართავენ გადახდებს.

STORI ქართული სტარტაპია, რომელიც ხელოვნურ ინტელექტს ეფუძნება და მომხმარებლებს ბრენდირებული კონტენტის შექმნას, დისტრიბუციასა და სამიზნე აუდიტორიასთან დაკავშირებას სთავაზობს. პლატფორმაზე შესაძლებელია განსხვავებული ფორმატის კონტენტის შექმნა და სხვადასხვა ტიპის ქსელში განთავსება. ამ ეტაპზე STORI-ზე ოთხი საფასო კატეგორიის პაკეტია ხელმისაწვდომი, რომელიც სხვადასხვა ტიპის სერვისს მოიცავს.

ყაზახური სტარტაპი, GoDays ხელოვნური ინტელექტზე დაფუძნებული ანალიტიკურ ხელსაწყოს ქმნის, რომელიც თანამშრომლებში ე.წ. გადაწვის მდგომარეობის პრევენციას ახდენს.

OHMYSYNT სტარტაპია სომხეთიდან, რომლის ხელსაწყო ხელოვნურ ინტელექტზე დაფუძნებულ პერსონალიზებულ კონტენტს ქმნის. AI-SYNT-ის დახმარებით, ადამიანების, პროდუქტებისა თუ პერსონაჟების გამოსახულებები ხელოვნური ინტელექტის მიერ გენერირებულ ხედებში შეიძლება ჩაისვას. ეს მომხმარებლებს შესაძლებლობას აძლევს, წამებში შექმნან ფოტოკონტენტი და ხარჯები შეამცირონ.

Beep აზერბაიჯანული სტარტაპია, რომლის ხელსაწყოს დახმარებით სამუშაო პროცესი მარტივდება — სქრინშოტების, ეკრანის ვიდეოჩანაწერების თუ შეტყობინებების ნაცვლად, თანამშრომლებთან ვიზუალური უკუკავშირისა და დავალებების მიცემა პირდაპირ ეკრანზე, რეალურ დროშია შესაძლებელი. როგორც სტარტაპში ამბობენ, ხელსაწყო კომუნიკაციას 4-ჯერ უფრო აჩქარებს.

HopShop სომხური სტარტაპია, რომელიც ინფლუენსერებსა და მოდით გატაცებულ ადამიანებს საკუთარი სტილის მონეტიზაციის საშუალებას აძლევს. კერძოდ, მომხმარებლები პლატფორმას უკავშირებენ საკუთარ ინსტაგრამ ანგარიშს, შემდეგ აუდიტორიას უზიარებენ პერსონალიზებული ვებსაიტის ბმულს, სადაც ვიზუალური ძიების ხელსაწყოს დახმარებით, თავს იყრის ის (ან მსგავსი) ნივთები, რომლებიც მომხმარებლის ინსტაგრამზე ფიდზე, ფოტოსურათებში ჩანს. საბოლოოდ კი, ყოველ ჯერზე, როცა ვინმე HopShop-ის ბმულიდან ნივთს შეიძენს, მომხმარებელი საკომისიოს იღებს.

და ბოლოს, მეათე სტარტაპია Porte ყაზახეთიდან, რომელიც სტუმარ-მასპინძლობის ინდუსტრიაში ოპერირებს და მომხმარებლებს “ციფრული კონსიერჟის” სერვისს სთავაზობს. ერთ პლატფორმაზე თავს იყრის ოთახის ციფრული გასაღები, ონლაინ რეგისტრაცია და გასვლა, ოთახის სერვისი, სასტუმროს ნივთების შეკვეთა, wi-fi-ზე წვდომა, უკუკავშირის დატოვების შესაძლებლობა. პლატფორმის მთავარი მიზანი სასტუმროს ოპერაციების გამარტივება და სერვისების მრავალფეროვნების მიღწევაა.

მომდევნო სამი თვის განმავლობაში სტარტაპები აქსელერაციის აქტიურ პროცესში ჩაერთვებიან, საკუთარ პროექტებს დემო დღეზე წარადგენენ და ინოვაციურ ხედვებს ფართო საზოგადოებას გააცნობენ. ასე რომ, წინ ინტენსიური პროცესებია, 500 Georgia-ში მონაწილეობით სტარტაპები საინვესტიციო მიმართულებით ფასდაუდებელ ცოდნას მიიღებენ, გამარჯვებულებს კი კიდევ უფრო მასშტაბური შესაძლებლობებისკენ გაეხსნებათ გზა.

მეტი ინფორმაციის გასაგებად ეწვიეთ ბმულს.