სურსათისა და წამლების ადმინისტრაციის (FDA) საკონსულტაციო კომიტეტმა ალცჰაიმერის საწინააღმდეგო წამალს დაუჭირა მხარი. მედიკამენტს Leqembi ეწოდება. ეს უკვე მეოერე წამალია, რომელიც უშუალოდ მიმართულია დაავადების ფუნდამენტურ პათოფიზიოლოგიაზე.

FDA-ის პერიფერიული და ცენტრალური ნერვული სისტემის წამლების მრჩეველთა კომიტეტმა (PCN) Leqembi 100 მგ/მლ ინექცია დაამტკიცა, ნათქვამია Eisai-ს პრესრელიზში.

იაპონური ფარმაცევტული კომპანიის Eisai-სა და ამერიკული ბიოტექნოლოგიური კომპანიის Biogen-ის მიერ შექმნილი Leqembi ადრე დაჩქარებული ტემპით დამტკიცდა. ამის მიზეზი ის იყო, რომ წამლის სამედიცინო სარგებლობის ზუსტ გაზომვას დიდი დრო სჭირდება. შესაბამისად, გადაუდებელი საჭიროების შემთხვევაში წამლის გამოყეების ნებართვა არსებობდა. თუმცა, ამჯერად, საქმე სრულ ნებართვასთან გვაქვს.

ნებართვა ოფიციალურად 2023 წლის 6 ივლისიდან ამოქმედდება.

ადრინდელ ცდებში დამტკიცდა, რომ Leqembi-ის კოგნიტური დაქვეითების 27 პროცენტით შემცირება შეეძლო.

არსებობს წამლის ინფუზიასთან დაკავშირებული რეაქციების რისკი, რამაც შეიძლება გამოიწვიოს გრიპის მსგავსი სიმპტომები, გულისრევა, ღებინება და არტერიული წნევის ცვლილება. ახალი წამლის ყველაზე ხშირად მოხსენებული გვერდითი მოვლენებია ინფუზიასთან დაკავშირებული რეაქციები, თავის ტკივილი და ტვინის შეშუპება.

ალცჰაიმერი ძირითადად 65 წელზე უფროსი ასაკის ადამიანებს აწუხებს, თუმცა ახლახან ჩინეთში 19 წლის ინდივიდი გახდა მსოფლიოში ყველაზე ახალგაზრდა ადამიანი, რომელსაც დაავადების დიაგნოზი დაუსვეს. ალცჰაიმერის დაავადება უფრო მეტად კლავს ადამიანებს, ვიდრე ძუძუსი და პროსტატის კიბო ერთად. შესაბამისად, ყოველწლიურად მილიონები იხარჯება მეცნიერულ კვლევებზე ამ დაავადების დასამარცხებლად.

ვნახოთ, როგორი ეფექტი ექნება ახალ მედიკამენტს.