საქართველოს საავტორო უფლებათა ასოციაციამ YouTube-თან სალიზენციო შეთანხმება გააფორმა.

შეთანხმება მიხედვით, YouTube საავტორო უფლებათა ასოციაციას ნაწარმოებების განთავსებისთვის საავტორო ჰონორარს გადაუხდის, რომელსაც, ასოციაცია ავტორებს გაუნაწილებს.

ასოციაციის განცხადებით, ეს ფაქტი ასევე სტიმულს მისცემს ქართველ ავტორებს, მათი ინტელექტუალური შრომის შედეგი მეტი მოცულობით განათავსონ YouTube-ზე.

შეთანხმების დეტალები

YouTube-თან თანამშრომლობის დეტალებზე, On.ge საავტორო უფლებათა ასოციაციის თავმჯდომარეს, გიგა კობალაძეს ესაუბრა.

მისი განმარტებით, შეთანხმება მხოლოდ მუსიკალურ ნაწარმოებებზე ვრცელდება და არ ეხება YouTube-ის მონეტიზაციის პროგრამას, რომელიც ე.წ. “კრეატორებისთვის” (YouTube-ზე საკუთარი კონტენტის ლეგალურ განმთავსებლებისთვის) სარეკლამო შემოსავლის გაყოფას ახორციელებს.

შეთანხმების მიხედვით, YouTube საავტორო უფლებათა ასოციაციას ყოველთვიურად ფიქსირებულ თანხას გადაუხდის და მიაწვდის მონაცემებს, ასოციაციის ავტორთა ნაწარმოებების საქართველოს ტერიტორიაზე დაკვრის რაოდენობის შესახებ. ასოციაცია კი შესაბამის ჰონორარებს, მის ავტორებზე, ამ მონაცემების მიხედვით გადაანაწილებს. შეთანხმების თანხა კონფიდენციალურია.

ის ავტორები, რომლებიც ჩართულნი არიან YouTube-ის მონეტიზაციის პროგრამაში და, ასევე, არიან საავტორო უფლებათა ასოციაციის წევრებიც, სალიცენზიო ჰონორარის წილს ასოციაციისგან მაინც მიიღებენ. კობალაძის ინფორმაციით, მუსიკის ავტორებისთვის ასოციაციაში გაწევრიანება უფასოა.

საავტორო უფლებათა ასოციაციის ჰონორარის ბენეფიციარებში, ქართველ ავტორებთან ერთად, მათი უცხოელი კოლეგებიც შედიან მსოფლიოს მასშტაბით. ეს ნიშნავს, რომ ასოციაცია YouTube-სგან მიღებულ ჰონორარს უცხოური ჰიტების ავტორებს ან შესაბამის ლებლებსაც გაუნაწილებს, საქართველოდან მათი ნაწარმოებების მოსმენების რაოდენობის შესაბამისად.

მსგავსი პრინციპით ანაწილებს ასოციაცია სხვა ადგილობრივი პარტნიორებისგან მიღებულ ჰონორარსაც, რომლებიც მუსიკალური ნაწარმოებების გამოყენების 40-მდე სხვადასხვა ტიპის ლიცენზიას ფლობენ. მათ შორის არიან ტელეკომპანიები, კაფე-ბარები, თეატრები, კონცერტების ორგანიზატორები და სხვ.

ასოციაციის თავმჯდომარის თქმით, მსგავსი შეთანხმება უცხოური ონლაინ-სერვისებიდან ამ ეტაპზე მხოლოდ YouTube-თან და მუსიკის სტრიმინგ-სერვის Deezer-თან აქვთ, თუმცა, გეგმაშია მოლაპარაკებების დაწყება სხვა საიტებთანაც.