რატომ არის მნიშვნელოვანი: უკრაინაში დაწყებული ომის გამო რუსეთი ათეულობით ქვეყანამ დაასანქცირა, საერთაშორისო კომპანიებმა და ბრენდებმა კი რუსული ბაზარი დატოვეს.

  • ევროკავშირის, G7-ის და NATO-ს ქვეყნებმა აგრესორის წინააღმდეგ მნიშვნელოვანი შეზღუდვები დააწესეს, რომელიც შეეხო როგორც ნავთობს, ექსპორტსა და იმპორტს, ასევე, კონკრეტულ პირებს, უმეტესად მაღალჩინოსნებსა და ოლიგარქებს.
  • ამის მიუხედავად, რუსეთი ახერხებს გვერდი აურიოს სანქციებს — ამ კუთხით აგრესორის დახმარებაში საქართველოს ხელისუფლებაც არაერთხელ დაადანაშაულეს, თუმცა ჯერ მტკიცებულებები არ წარუდგენიათ.

დეტალები: როგორც Bloomberg წერს, ევროკავშირი სანქციების მე-11 პაკეტში რუსეთის გავლით ზოგიერთი საქონლის ტრანზიტის აკრძალვას აპირებს, მაგრამ ჯერ ყველა წევრი ქვეყნის თანხმობაა საჭირო.

  • გამოცემა განმარტავს, რომ რუსეთმა რამდენჯერმე მოახერხა სანქცირებული ტექნოლოგიიის მიღება, რაც ომისთვის გამოიყენა.

  • აქვე აღნიშნულია, რომ მათ მიერ ადრე გამოქვეყნებული სავაჭრო მონაცემების მიხედვით, ევროკავშირში და სხვა მოკავშირე ქვეყნებში დამზადებული მოწინავე ჩიპები და სქემები რუსეთში მესამე ქვეყნების გავლით შედის.

  • გამოცემის წყაროების თანახმად, იგეგმება, რომ ტანკერები, რომლებსაც არ აქვთ სანავიგაციო სისტემები, რათა თვალყური ადევნონ მათ მოძრაობას, დაექვემდებარება სანქციებს.
  • პაკეტი მიმართული იქნება, რომ აღმოიფხვრას ხარვეზები და შეზღუდვებზე გვერდის ავლის საშუალებები, მათ შორის მესამე ქვეყნების კომპანიების ჩართულობით.
  • თუმცა, ნაკლებად სავარაუდოა, რომ პაკეტი Rosatom-ს დაასანქცირებს, დასძინეს წყაროებმა, მიუხედავად იმისა, რომ ევროკავშირის მრავალი წევრი ითხოვს ამას.
  • მათი თქმით, ზოგიერთი წევრი ქვეყანა კვლავ ეწინააღმდეგება რუსეთის ბირთვულ სექტორზე სანქციების დაწესებას.

ვოლოდიმირ ზელენსკიმ განაცხადა, რომ ვისაც სურს ომის რაც შეიძლება მალე დასრულება, ერთ-ერთ მთავარ ამოცანად უნდა მიიჩნევდეს, როგორ მოსპოს რუსეთისთვის სანქციების გვერდის ავლის ყველა შესაძლებლობა.

  • "ყოველი სქემა, რომელიც საშუალებას აძლევს რუსეთს, გვერდი აუაროს სანქციებს, ამ ომს დროს მატებს, აგრესორს შესაძლებლობებს მატებს", — განმარტა მან.
  • "შესაბამისად, რაც უფრო მკაცრი იქნება რუსეთის წინააღმდეგ სანქციების რეჟიმი, რაც უფრო მეტი შეზღუდვა იქნება ტერორისტული სახელმწიფოსა და მასთან დაკავშირებული ყველა პირის მიმართ, მთელი რუსეთის ომის ეკონომიკის მიმართ, მით უფრო სწრაფად დასრულდება აგრესია", — აღნიშნა პრეზიდენტმა.