ამის შესახებ ის იუსტიციის უმაღლესი საბჭოს სხდომაზე საუბრობს.

რატომ არის მნიშვნელოვანი: აშშ-ის სახელმწიფო დეპარტამენტმა გავლენიანი ქართველი მოსამართლეები, ე.წ კლანის წევრები, ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე დაასანქცირა.

  • განცხადებაში აღნიშნულია, რომ ისინი მნიშვნელოვან კორუფციულ საქმიანობაში ჩართულობისთვის სანქცირდებიან.
  • სახელმწიფო დეპარტამენტის განცხადებით, მათ ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა.

მურუსიძე აშშ-ის ელჩს თავს ესხმის, სასამართლო სისტემის კონტროლის მცდელობაში ადანაშაულებს და სასამართლო ხელისუფლების ხელში ჩაგდებაზე საუბრობს.

  • მისი მტკიცებით, ეს, თავდაპირველად, არასამთავრობო სექტორის მეშვეობით ხდებოდა და ამბობს, რომ ისინი მიზანმიმართულად საუბრობდნენ ე.წ. სასამართლო კლანზე.
  • "შედეგი რომ ვერ იქნა მიღწეული, რომ ვერ მოხდა სასამართლოს ხელში ჩაგდება და მიტაცება, ვინაიდან სრული პასუხისმგებლობით ვიძახი, რომ საელჩოს ჰქონდა ყოველთვის მცდელობა, რომ მას გაეკონტროლებინა სასამართლო სისტემა, შესაბამისად, მიიღეს ეს გადაწყვეტილება", — ამტკიცებს ის.

დეტალები: მურუსიძეს თავისი მოსაზრებების გამართლებას ცდილობს და რამდენიმე "მაგალითზე" საუბრობს.

  • არგუმენტად კი აშშ-ის ელჩის, კელი დეგნანის განცხადებები მოჰყავს, სადაც ის სასამართლოს კონკრეტულ გადაწყვეტილებებზე ამბობდა, რომ უსამართლოა.
  • "ჩემთვის გასაკვირი იყო ყოველთვის, ელჩი რატომ უნდა ერეოდეს კონკრეტულად საქმეებში, მაგრამ ზუსტად აქ ჩანდა მისი მიზანი".
  • მურუსიძე ცდილობს ისე წარმოაჩინოს, რომ რეალურად, დასანქცირების მიზანი საელჩოს მიერ სასამართლო სისტემაში ჩარევა და გადაწყვეტილებებზე გავლენის მოხდენაა.
  • "სასამართლო სისტემას გაეგზავნა მესიჯი და ეს მდგომარეობს შემდეგში — თუ მოსამართლეები არ გაითვალისწინებენ ელჩის და საელჩოს პოზიციებს კონკრეტულ საკითხთან დაკავშირებით და არ მიიღებს მოსამართლე იმ გადაწყვეტილებას, რაც ელჩისთვის არის მისაღები და რაც შეესაბამება მის პოლიტიკას, ყველას მოგექცევით ისე, როგორც მოვექეცით იმ მოსამართლეებს, რომელიც დავასანქცირეთ".