რატომ არის მნიშვნელოვანი: პუბლიკას დირექტორი, ზურა ვარდიაშვილი 2 მარტს რუსული კანონის საწინააღმდეგო აქციაზე დააკავეს.

  • კადრებში ჩანს, რომ დაკავებამდე ვარდიაშვილი გზის განაპირას დგას, თბილისის საპატრულო პოლიციის უფროსი, ვაჟა სირაძე კი მისი დაკავების მითითებას მას შემდეგ იძლევა, რაც შეძახილი "მოღალატე" ისმის.
  • ამავე ვიდეოშივე ისმის მოქალაქეების სიტყვები, რომ ვარდიაშვილი ჟურნალისტია, პასუხად, სირაძე ამბობს: "რა ჟურნალისტია, პოლიტიკოსი ხარ", რის შემდეგაც მას აკავებენ.
  • როგორც პუბლიკა წერს, ვარდიაშვილის ადვოკატმა გუშინდელ სხდომაზე წარადგინა ვიდეო, სადაც ჩანს სირაძე და ისმის ხმა: "გამოათრიეთ აქედან", დავაი, გაათრიეთ".

დეტალები: ვარდიაშვილის ადვოკატმა პროცესზე რამდენიმე შუამდგომლობა დააყანა, მათ შორის, მოწმის სახით სირაძის გამოკითხვა იყო.

  • გამოცემის ცნობით, დაცვის მხარეს სურდა, კითხვები პირადად დაესვა სირაძისთვის, თუ რა და რატომ ჩათვალა მან ვარდიაშვილის მხრიდან სამართალდარღვევად.

რა მოხდა სასამართლოზე: როგორც პუბლიკა წერს, შსს-ს წარმომადგენლებმა თქვეს, რომ ვარდიაშვილი უშუალოდ პოლიციელმა გიგა მოდებაძემ დააკავა და მისი გამოკითხვა ფაქტობრივი გარემოებების გამოკვლევისთვის საკმარისი იქნებოდა.

  • მათივე ცნობით, გამოკითხულმა გიგა მოდებაძემ სხდომაზე აღნიშნა, რომ ვარდიაშვილი გზის სავალ ნაწილზე დადიოდა და იგინებოდა — ხოლო კითხვაზე, ვისი მისამართით, უპასუხა, რომ კანონის.
  • ამასთან, მოდებაძემ დაადასტურა, რომ ვარდიაშვილი სირაძის მითითებების შემდეგ დააკავა.
  • საბოლოოდ, მოსამართლე ნინო შჩერბაკოვმა ვაჟა სირაძის დაკითხვის შუამდგომლობა არ დააკმაყოფილა.
  • გადაწყვეტილება 18 აპრილს 17:00 საათზე უნდა გამოცხადდეს.

ვარდიაშვილის ადვოკატი 31 მარტს 00:28 საათზე წერდა, რომ პროცესის დაწყებას 15 საათი ელოდებოდნენ და ის რაც სასამართლოებში ხდება ადმინისტრაციული სამართალდარღვევების საქმის განხილვისას არაადამიანური მოპყრობაა.

  • "სასამართლოს შეუძლია ამ სხდომების განხილვა გონივრული ვადით გადადოს, ადამიანურ პირობებში განიხილოს, რადგან არავითარი კანონისმიერი "დაბრკოლება" არ აქვს", — წერდა ის.
  • მისივე ინფორმაციით, სასამართლო რამდენიმე საათის დაგვიანებით, 05:06 საათზე დასრულდა.