სამსახური ბევრი ჩვენგანის ყოველდღიურობის განუყოფელი ნაწილია. თუმცა, იმის მიუხედავად, რამდენად გვიყვარს საკუთარი საქმე, გადაღლისგან ან, უკიდურეს შემთხვევაში, "გადაწვისგან" დაცული არავინ ვართ. მეტიც, სხვადასხვა კვლევის თანახმად, 60-დან 70 პროცენტამდე მერყეობს იმ დასაქმებულების რიცხვი, რომლებიც სამუშაოს გამო მუდმივ გადაღლას გრძნობენ.

არადა, თანამშრომლების მენტალურ კეთილდღეობაზე ზრუნვა რომ სამსახურის ერთ-ერთი პრიორიტეტი უნდა იყოს, ამაზე დამსაქმებლების 86 პროცენტი თანხმდება. ამის მიუხედავად, თითქმის ნახევარს, 49 პროცენტს, დასაქმებულების მენტალურ ჯანმრთელობაზე ზრუნვის სტრატეგია შემუშავებული არ აქვს. სწორედ ამიტომ, პროფესიულ ლექსიკონში ახალი ტერმინია "მენტალური შვებულება" — არასამუშაო დღე, რომელსაც თანამშრომელი საკუთარ თავზე ზრუნვისთვის იყენებს.

1. მენტალური შვებულების საჭიროებაზე ბევრი რამ მიანიშნებს

როგორც ვთქვით, ეგრეთ წოდებული გადაწვა, სამწუხაროდ, ბევრი დასაქმებულისათვის ნაცნობი სიტუაციაა. ამ მდგომარეობაზე კი ბევრი რამ მიანიშნებს: მუდამ გრძნობთ დაღლილობას, მათ შორის, დღის დასაწყისში, პერიოდულად გაქვთ შიშის ან პანიკის განცდაც კი, ადვილად ღიზიანდებით და მოტივაციის ნაკლებობასაც უჩივით. სწორედ ეს "სიმპტომები" მიუთითებს, რომ სახიფათოდ მიუახლოვდით გადაწვის ზღვარს და გჭირდებათ დრო, რათა გარესამყაროსა და პრობლემებისგან დისტანცირდეთ.

2. მენტალური შვებულების დანიშნულება დროის საკუთარი თავისთვის დათმობაა

გარესამყაროსგან დისტანცირება კი იმას ნიშნავს, რომ მეტი დრო უნდა დაუთმოთ საკუთარ თავს და მასზე ზრუნვას. საკუთარი მენტალურ კეთილდღეობაზე ზრუნვას ინდივიდუალური მიდგომა სჭირდება — გააჩნია, თავად რა განიჭებთ სიამოვნებას და როგორ განიტვირთებით. ეს შეიძლება იყოს აქტიური დასვენება, ბუნებაში ხეტიალი, ახალი ჰობის გაჩენა ან სულაც დივანზე გემრიელად მოკალათება და საყვარელი სერიალის, ვინ იცის, მერამდენედ ყურება. მოკლედ, მიზანი ის არის, რომ წინანდელი რუტინისგან დროებით მაინც გათავისუფლდეთ და ყოველდღიური პასუხისმგებლობებით მოგვრილი სტრესი და შფოთვა მოგეხსნათ.

3. მენტალური შვებულება პროდუქტიულობას ზრდის

განტვირთვის დღეები სასიკეთოდ აისახება როგორც ჩვენს მენტალურ კეთილდღეობაზე, ასევე ფიზიკურ ჯანმრთელობაზე. ამდენად, დასაქმებული ბევრად მხნედ და მოტივირებულად გრძნობს თავს. ეს კი, რასაკვირველია, მომგებიანია კომპანიისთვისაც — დასვენებული თანამშრომელი არა მხოლოდ უფრო პროდუქტიულია, არამედ მეტად კრეატიულიც. რუტინისგან გამოთავისუფლებულ დროში ხომ, ძალების აღდგენასთან ერთად, ტვინის "განიავება" და ახალი იდეებისთვის კარის გაღებაა შესაძლებელი. ეს კი კიდევ ერთხელ მიუთითებს, რატომ უნდა იყოს დამსაქმებლისთვის პრიორიტეტული თანამშრომლების მენტალურ კეთილდღეობაზე ზრუნვა.

4. მენტალურ შვებულებას მსოფლიოში არაერთი დიდი კომპანია სთავაზობს თანამშრომლებს

რადგან ვახსენეთ, რომ სამუშაო პირობები მენტალურ ჯანმრთელობაზე ზრუნვასაც უნდა ითვალისწინებდეს, მოდით, ვნახოთ, როგორია პრაქტიკა მსოფლიოში. იმის მიუხედავად, რომ მენტალური შვებულების ცნება მაინცდამაინც ფეხმოკიდებული არაა შრომის ბაზარზე, არაერთმა დიდმა და გავლენიანმა კომპანიამ გადაწყვიტა, თავისი თანამშრომლებისთვის მსგავსი რამ შეეთავაზებინა — სხვა საშვებულებო დღეებისგან ცალკე გამოთავისუფლებული დრო. მაგალითისთვის, LinkedIn თანამშრომლებს 5 დღეს აძლევს მენტალურ ჯანმრთელობაზე ზრუნვისთვის, Nike — ასევე 5 დღეს, ხოლო Google 8 დღეს გამოყოფს ამ მიზნით. დასაქმებულებისთვის მენტალურ შვებულებას გამოყოფენ Airbase და SAP-იც.

5. მენტალური შვებულების პრაქტიკა უკვე საქართველოშიც გამოჩნდა

აღსანიშნავია, რომ მენტალური შვებულების პრაქტიკა უკვე საქართველოშიც შემოვიდა. თიბისი დაზღვევა არა მხოლოდ ქვეყანაში, არამედ ამიერკავკასიის რეგიონშიც პირველი კომპანია გახდა, რომელმაც თანამშრომლებს მენტალური შვებულება შესთავაზა. კომპანიაში დასაქმებულები, სტანდარტული 24-დღიანი დასვენების გარდა, შეძლებენ ისარგებლონ 5 დამატებითი დღით საკუთარ თავზე ზრუნვისთვის. ამასთან, ამ 5 დღის აღება ზუსტად ისევეა შესაძლებელი, როგორც სხვა დანარჩენი საშვებულებო დღეებისა.

როგორც თიბისი დაზღვევაში ამბობენ, მათ, "როგორც მენტალური ჯანმრთელობის მხარდამჭერ კომპანიას, უნდოდათ, კიდევ ერთხელ გაესვათ ხაზი ემოციური კეთილდღეობის მნიშვნელობაზე და თანამშრომლებისთვის შეექმნათ გარემო, სადაც მათი საქმიანობა ერთნაირად იქნებოდა სასარგებლოც და კომფორტულიც".

აღსანიშნავია, რომ თიბისი დაზღვევა თანამშრომლების მენტალურ კეთილდღეობაზე სხვადასხვა საშუალებით აქამდეც ზრუნავდა: მრავალფეროვანი აქტივობების ორგანიზებასთან ერთად, კომპანია დასაქმებულებს "ბედნიერ პარასკევს" სთავაზობს — მოკლე სამუშაო დღეს კვირის დასასრულს.