იურიდიული კომიტეტის სხდომა, სადაც რუსული კანონი განიხილება, კვლავ ხმაურის ფონზე გრძელდება.

დეტალები: ოხანაშვილი ყველა გამომსვლელს, რომლებიც რუსული კანონს აპროტესტებენ, კითხვების დასმისკენ მოუწოდებდა, სიტყვას აწყვეტინებდა და რიგ შემთხვევაში არ ასრულებინებდა.

• მან შაქარაშვილსაც მოუწოდა რამდენჯერმე, რომ კითხვა დაესვა, თუმცა ფორმალურად, რადგან არასამთავრობო ორგანიზაციების მადისკრედიტირებელი განცხადების გაკეთების საშუალება ბოლომდე მისცა.

შაქარაშვილის რამდენიმე წუთი სამოქალაქო სექტორისა და რუსული კანონის ოპონენტების კრიტიკას დაუთმო და ისინი "სხვების" დავალებების შესრულებაში დაადანაშაულა.

• ზუსტად იმეორებდა ქართული ოცნებისა და ანტიდასავლური ძალის ნარატივს და ამტკიცებდა, თითქოს, ისინი უცხო ქვეყნის ინტერესებით, ხარჯებითა და დავალებებით მოქმედებენ.
• "მას შემდეგ, რაც საქართველომ უარი თქვა მეორე ფრონტის გახსნაზე, რაც უარი თქვა იყოს ვასალი სხვა ქვეყნის ინტერესების სამსხვერპლოზე, მას შემდეგ, რაც უარი თქვა, იდგეს ცალ ფეხზე და ასკინკილით შევიდეს ევროკავშირში, მას შემდეგ თქვენმა პატრონებმა მოგცეს დავალება".
• "თქვენ არ გაინტერესებთ არც კანონის შინაარსი, მომავალი, გაინტერესებთ თქვენი ჯიბე, პირადი კეთილდღეობა, პრივილეგიები. გაინტერესებთ სხვისი ინტერესები და არა საკუთარი ქვეყნის ინტერესები".

გარდა ამისა, რუსული კანონის მოწინააღმდეგეთა პროტესტს ყალბი პათეტიკა უწოდა და "უკონტროლო ფულზე" საუბრობდა.

• გამოიყენა ჰომოფობიური რეპლიკაც, რასაც იქ მყოფთა პროტესტი მოჰყვა, თუმცა, ამის მიუხედავად, იურიდიულ საკითხთა კომიტეტის თავმჯდომარემ არა თუ სიტყვა არ გააწყვეტინა, შენიშვნაც არ მიუცია.
• კერძოდ, შაქარიშვილი ამტკიცებდა, რომ ორგანიზაციებიდან მიღებული თანხები "ლიბერალური დიქტატის განმტკიცებას, ეკლესიასთან ბრძოლას, ლგბტ პროპაგანდას, სახელმწიფო ინტერესების მოშლასა და დესტრუქციას" ემსახურება.

რატომ არის მნიშვნელოვანი: 2 მარტს საგარეო და თავდაცვის კომიტეტებმა რუსულ კანონს მხარი დაუჭირეს, რასაც პარალელურად პარლამენტში და მიმდებარე ტერიტორიაზე ჟურნალისტები და არასამთავრობო სექტორის წარმომადგენლები ვაპროტესტებდით.

• კომიტეტების სხდომებზე, მათ შორის, არც დღეს არ შეგვიშვეს მედია, NGO-ები, კრიტიკულად განწყობილი დეპუტატები, თუმცა შეუშვეს ანტიდასავლური მოძრაობის, ხალხის ძალის წევრები და ქართულ ოცნებასთან აფილირებული ე.წ. უფლებადამცველები.
• პარლამენტთან აქციაზე მისულ მედიის წარმომადგენლებსა და აქტივისტებს პოლიცია აპატიმრებდა — უმეტესად იმიტომ, რომ მონას და მოღალატეებს იძახდნენ.
• ხოლო მედიაზე, რომელიც პარლამენტში მიმდინარე პროცესებს აშუქებდა იძალადეს — საკანონმდებლო ორგანოს ეზოდან ძალის გამოყენებით გამოაგდეს On.ge-ის მთავარი რედაქტორი, ნეტგაზეთის ჟურნალისტი და ფორმულას ფოტოგრაფი.
• აქციაზე დააკავეს ტაბულას ჟურნალისტი, ბექა ჯიქურაშვილი და პუბლიკას დირექტორი, ზურა ვარდიაშვილი.

საიაში აცხადებენ, რომ სამართალდამცავებმა უნდა იმოქმედონ საქართველოს კონსტიტუციისა და კონვენციური უფლებების პატივისცემით, არ გამოიყენონ არაპროპორციული ძალა.

• ასოციაცია მოუწოდებს სპეციალურ საგამოძიებო სამსახურს — შეისწავლოს მედია წარმომადგენლების, დემონსტრანტების დაკავების, სავარაუდო დაზიანების ფაქტები და ჰქონდეს ჯეროვანი რეაგირება შეკრებისა და გამოხატვის თავისუფლებაში არაპროპორციულ ჩარევაზე, როგორც ფუნდამენტური უფლების შეზღუდვის მსუსხავი ეფექტის მქონე პრაქტიკაზე.

ეთიკის ქარტია პარლამენტის მხრიდან მედიის წარმომადგენლებისთვის საქმიანობაში ხელის შეშლას და ჟურნალისტების დაკავებას გმობს.

• ქარტია მოუწოდებს თავმჯდომარეს ჟურნალისტების ძალის გამოყენებით გაყვანაზე მკაცრი რეაგირება ჰქონდეს და დაავალოს შესაბამის სამსახურებს, შეისწავლონ დაცვის სამსახურის ქმედებები.
• ასევე მოუწოდებს პარლამენტს, უზრუნველყოს მედიის წარმომადგენლების დაუბრკოლებელი მუშაობა საკანონმდებლო ორგანოში, რათა ჟურნალისტებმა მოახერხონ საზოგადოების დროული და სრული ინფორმირება.