ცნობილი სამოტივაციო ფოტო ხომ გინახავს, 1.01³⁶⁵ რომ 37-ის ტოლია, ხოლო 1³⁶⁵ — 0-ის? მართალია, ეს მაგალითი იმის საჩვენებლად შეიქმნა, რომ ადამიანს მცირე ცვლილებების შედეგი აჩვენოს, თუმცა, იგივე მიდგომა ინვესტირებაშიც ამართლებს. სტატიაში მოგიყვებით, რატომ არის ინვესტირება უფრო მომგებიანი, როდესაც ფულის სისტემატურად აბანდებ და არა ერთჯერადად.

ინვესტირების პროცესში მუდმივი დაბანდება გაცილებით უფრო მომგებიანია. ამას მათემატიკა მარტივად ამტკიცებს. წარმოიდგინე, ყოველთვიურად აბანდებ 100$-ს, ხოლო წლიური ამონაგები 10%-ია. წლის ბოლოს დაბანდებული გაქვს 1200$, ამონაგები 120$-ს შეადგენს, ჯამური თანხა კი — 1320$-ს . თუ გადაწყვეტ, რომ ამონაგები გამოიტანო და მხოლოდ 1200$-ით გააგრძელო ინვესტირება, 10 წლის შემდეგ არაფერი შეიცვლება.

თუმცა, წარმოიდგინე მეორე სცენარი. შენ განაგრძე ინვესტირება 1320$-დან. ამ შემთხვევაში, წლიური ამონაგები 132$ იქნება, დამატებით, 120$, რომელიც ყოველთვიური 100$-ის ინვესტირებით დაგროვდა. ჯამში, ორი წლის შემდეგ, 2652$ გაქვს. ყველაფერი ასე რომ განაგრძო, 10 წლის შემდეგ ჯამში შენ გექნება 21911$, წლიური 2,638$-ის ამონაგებით. ფაქტობრივად, შენი საწყისი ყოველთვიური ინვესტიცია (12000$) 87%-ით გაიზარდა.

დაგვეთანხმები, 21911$ გაცილებით მეტია, ვიდრე 12000. სწორედ ასეთი დიდი ძალა აქვს ე.წ. ნაერთ ინვესტირებას. ინვესტორები ამ მიდგომას ხშირად მიმართავენ, ვინაიდან თავდაპირველი წლიური მცირე ამონაგები იმდენად უმნიშვნელოა, მათთვის ფინანსურად სარგებელი არ მოაქვს, თუმცა, დროთა განმავლობაში, საინვესტიციო პორტფელის ღირებულება იზრდება. ინვესტორები ამ მეთოდს გრძელვადიანი ფინანსური მიზნების მისაღწევად იყენებენ. რა თქმა უნდა, რაც უფრო მეტია ყოველთვიური ინვესტიცია, მით უფრო სწრაფად გროვდება სასურველი თანხა.

კიდევ უფრო საინტერესოა ინვესტირება ისეთ კომპანიებში, რომელთა აქციების ფასები ყოველწლიურად იმატებს. მაგალითად, Apple-ს (AAPL) აქციებში, რომ 10 წლის წინ დაგეწყო ყოველთვიურად 100$-ის ინვესტირება, ხოლო Apple-ს აქციების ფასის საშუალო წლიური ზრდა 20% ყოფილიყო, დღეს 40000$-მდე გექნებოდა. ესეც იმ შემთხვევაში, თუ მართლა მხოლოდ 20%-იანი ამონაგები იქნებოდა. ინვესტორებისთვის ხშირად მთელი მოტივაცია ის არის, რომ ყოველთვიური მცირე ინვესტიციებით, რამდენიმე წლის განმავლობაში გაცილებით მეტი თანხის დაგროვება არის შესაძლებელი, ვიდრე შემოსავლის სხვა წყაროებით.

თუ გინდა, რომ შენით დათვალო გარკვეულ დროში რა თანხის დაზოგვა შეგიძლია, სცადე ონლაინ კალკულატორი Investor.gov. საიტზე ყველა აუცილებელი ფუნქციაა, რომელიც გამოთვლებში დაგეხმარება და საკუთარი ფინანსური გეგმის შემუშავებას უკეთ შეძლებ.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.