ინფორმაციას ამის შესახებ თავად კულტურის სამინისტრო ავრცელებს.

რატომ არის მნიშვნელოვანი: ქალი ავტორებისა და მთარგმნელებისთვის დაფუძნებული პრემიის გამარჯვებულები კაცებმა გამოავლინეს.

  • კულტურის სამინისტროს ინფორმაციით, პრემია "ანას" მიზანი ქალი ავტორებისა და მთარგმნელების შემოქმედებითი საქმიანობის ხელშეწყობა-წახალისება, მათი შემოქმედების პოპულარიზაცია და ახალი სახელების წარმოჩენაა.
  • საკონკურსოდ განიხილებოდა კონკურსის გამოცხადების წინა წელს გამოცემული თანამედროვე ქალი ავტორების ქართულენოვანი და ქართულ ენაზე თარგმნილი ლიტერატურული ნაწარმოებები.
  • საკონსკურსო კომისიის ხუთივე წევრი (ლაშა თაბუკაშვილი, სოსო ჭუმბურიძე, ანდრო ბუაჩიძე, თემურ ჩალაბაშვილი და გია მურღულია) კაცი იყო.

დეტალები: გამარჯვებულები შემდეგ ნომინაციებში გამოვლინდნენ:

  • ქალი პროზაიკოსი — საუკეთესო პროზაული კრებულისთვის;
  • ქალი პოეტი — საუკეთესო პოეტური კრებულისთვის;
  • ქალი მთარგმნელი — საუკეთესო თარგმანისთვის.
  • სამინისტროს ინფორმაციით, საკონკურსო კომისიამ გამარჯვებული ვერ გამოავლინა ნომინაციაში — ქალის თემაზე შექმნილი საუკეთესო ნაწარმოების ავტორი.

კონტექსტი: მას შემდეგ, რაც ლიტერას პრემია კულტურის სამინისტროსადმი მწერლების პროტესტის ფონზე ჩაიშალა, წულუკიანის უწყებამ ახალი ლიტერატურული კონკურსი "წლის საუკეთესო" დააანონსა, მოგვიანებით კი ცნობილი გახდა, რომ სამინისტრომ ახალი პრემია, "ანა" დააფუძნა.

  • ლიტერა 2015 წლიდან არსებობდა და მის ჩაშლას წინ უძღოდა დამოუკიდებელი ჟიურის წევრად კულტურის სამინისტროს წარმომადგენლის, სოსო ჭუმბურიძის დანიშვნა.
  • მისი გაწვევა 100-მდე მწერალმა, მთარგმნელმა და ლიტერას კონკურსანტმა მოითხოვა.
  • საბოლოოდ, ლიტერა მაინც ჩატარდა, ოღონდ სხვა ფორმით და, შესაბამისად, თავისუფალი ლიტერა ეწოდა.
  • სწორედ სოსო ჭუმბურიძეა ერთ-ერთი პრემია ანას 5-კაციანი საკონკურსო კომისიიდან.