აშშ-ში 90 წლის ქალმა ცოტა ხნის წინ ოცნება აიხდინა და უმაღლესი სასწავლებლის დიპლომი მიიღო. ჯოის დეფოუმ უნივერსიტეტი სწავლის დაწყებიდან 71 წლის შემდეგ დაამთავრა.

დეფოუ ჩრდილოეთ ილინოისის უნივერსიტეტში ჯერ კიდევ 1951 წელს ჩაირიცხა, როცა ჯოის ვაიოლა კეინი ერქვა. ახალგაზრდა ჯოისი მაშინ ეკონომისტობას აპირებდა. თუმცა, მერე გეგმები შეიცვალა — ეკლესიაში მომავალი ქმარი გაიცნო და სწავლამაც გვერდზე ჩაიჩოჩა.

"სამწელიწად-ნახევარი ვსწავლობდი, თუმცა, მასთან შეხვედრის შემდეგ უნივერსიტეტის მიტოვება გადავწყვიტე", — იხსენებს დეფოუ.

1951 წელს ჯოისზე გაცემული სტუდენტის მოწმობა

ფოტო: Northern Illinois University

წყვილს სამი შვილი ეყოლა, მაგრამ მათი ოჯახური იდილია დიდხანს არ გაგრძელებულა. ქალი დაქვრივდა, რამდენიმე წლის შემდეგ კი მეორედ იქორწინა.

წლების შემდეგ ჯოისის ოჯახი ისე გაიზარდა, რომ მას ახლა 17 შვილიშვილი და 24 შვილთაშვილი ჰყავს. სწორედ ოჯახის წევრებმა უბიძგეს, ათწლეულების წინ დაწყებული საქმე ბოლომდე მიეყვანა და სწავლა დაესრულებინა.

"მგონი, სადღაც ვახსენე, რომ სწავლის მიტოვებით უკმაყოფილო ვიყავი", — ჰყვება დეფოუ, — "ჩემმა შვილებმა კი მირჩიეს, უნივერსიტეტში დავბრუნებულიყავი".

ასე და მაგვარად, 80 წელს გადაცილებული ჯოისი ჩრდილოეთ ილინოისის უნივერსიტეტში დაბრუნდა და ლექციებზე დასწრება განაგრძო.

"როცა სასწავლებელში დაბრუნების თაობაზე დავრეკეთ და გაიგეს, 50-იანებში ჩარიცხულ სტუდენტზე იყო საუბარი, გაოგნდნენ", — იხსენებს დეფოუს შვილიშვილი.

ალბათ გაოცება არც ჯოისს აკლდა, რადგან ამჯერად კამპუსებში ხეტიალის ნაცვლად კომპიუტერის ეკრანიდან მოუხდა ლექციების მოსმენა. საგანგებოდ ამ საქმისთვის, ქალმა თანამედროვე ტექნოლოგიებით სარგებლობაც ისწავლა.

ჯოისი 1955 წელს — მაშინ, როცა უნივერსიტეტი მიატოვა და 2022 წელს — როდესაც უნივერსიტეტის კამპუსში დაბრუნდა

თუმცა, ყველაფერი ასე მარტივადაც არ ყოფილა. დეფოუს, რა თქმა უნდა, ბევრი წინააღმდეგობა შეხვდა სწავლის პროცესში. ამბობს, ზოგჯერ ვფიქრობდი, საერთოდაც დამენებებინა თავიო. თუმცა, ოჯახში, სამეგობროში და სასწავლებელში ქალს მუდმივად ამხნევებდნენ და დანებების უფლებას არ აძლევდნენ.

უნივერსიტეტის საბაკალავრო პროგრამების ხელმძღვანელი, ჯუდი სანტაკატერინა, ერთ-ერთი იყო, ვინც დეფოუს გულშემატკივრობდა. მისი თქმით, ჯოისი ძალიან მოწესრიგებული სტუდენტი გახლდათ. ამდენად, შრომისმოყვარეობამ შედეგიც გამოიღო — უნივერსიტეტში დაბრუნებიდან სამი, ჩარიცხვიდან კი მთელი 71 წლის შემდეგ ჯოის დეფოუმ ბაკალავრის ხარისხი მიიღო.

ფოტო: Northern Illinois University

"ძალიან სასიამოვნოა, როცა დაწყებულ საქმეს ბოლომდე მიიყვან", — ამბობს ჯოისი ახლა, — "არ დანებდეთ. ვიცი, რომ შეიძლება სირთულეს წააწყდეთ, თუმცა, ცხოვრებაში ყველა საქმეს თან ახლავს მარცხი და წარმატება".