რვა არასამთავრობო ორგანიზაცია მიიჩნევს, რომ მუსტაფა ემრე ჩაბუქის თურქეთისთვის გადაცემის შემთხვევაში, ის შესაძლოა, წამების/არაადამიანური მოპყრობისა ან/და დასჯის მსხვერპლი გახდეს და არ მიეცეს სამართლიან მართლმსაჯულებაზე ხელმისაწვდომობის შესაძლებლობა. ამის შესახებ არასამთავრობი ორგანიზაციებმა ერთობლივი წერილი გაავრცელეს და ხელისუფლებას მოუწოდეს არ გადასცენ ჩაბუქი თურქეთს, რომლის მოქალაქეცაა ის.

"მიგვაჩნია, რომ რომ მუსტაფა ემრე ჩაბუქის თურქეთში ექსტრადიცია არსებითად დაარღვევს ადამიანის უფლებებისა და კანონის უზენაესობის ფუნდამენტურ სტანდარტებს და დააზიანებს ქვეყნის დემოკრატიული განვითარების პროცესს," - აღნიშნავენ არასამთავრობო ორგანიზაციები.

ისინი საქართველოს პარლამენტს მოუწოდებენ უზრუნველყოს ეფექტიანი საპარლამენტო კონტროლის განხორციელება თურქეთის მოქალაქეების შესაძლო უკანონო ექსტრადიციისა და საქართველოში ფეთულაჰჰ გიულენის მოძრაობასთან კავშირში განხილული თურქული სკოლების შესაძლო შევიწროების პრაქტიკაზე და ამ მიმართულებით მიიღოს ყველა შესაბამისი ზომა.

  1. ადამიანის უფლებების სწავლებისა და მონიტორინგის ცენტრი;
  2. საერთაშორისო გამჭირვალობა საქართველო;
  3. ტოლერანტობისა და მრავალფეროვნების ინსტიტუტი;
  4. საქართველოს ახალგაზრდა იურისტთა ასოციაცია;
  5. საქართველოს დემოკრატიული ინიციატივა;
  6. თბილისის ადამიანის უფლებათა სახლი;
  7. სამართლიანი არჩევნებისა და დემოკრატიის საერთაშორისო საზოგადოება;
  8. მედიის განვითარების ფონდი.

2017 წლის 25 მაისს საქართველოს სამართალდამცავმა ორგანოებმა თურქეთის რესპუბლიკის შესაბამისი ორგანოების მოთხოვნის საფუძველზე, თბილისში დააკავა მუსტაფა ემრე ჩაბუქი. მას სასამართლომ სამი თვის ვადით საექსტრადიციო პატიმრობა შეეფარდა.